A Modimo wa Reetsa Fa O Rapela?

MOLAODIMOGOLO ke ene a swetsang gore a o tla abela mongwe gore e nne ene a rarabololang kgang nngwe kana o tla e rarabolola ka namana. Ka tsela e e tshwanang, Mmusi le Molaodi wa lobopo le ene a ka itlhophela gore o tla tsena go le kana kang mo kgannyeng epe fela. Dikwalo di re ruta gore Modimo o ile wa itlhophela gore o tla araba dithapelo tsa rona ka boene mme ke gone ka moo a re laelang gore re di lebise kwa go ene.—Pesalema 66:19; 69:13.

Tsela e Modimo o tlhophang go dira dilo ka yone mo kgannyeng eno e senola gore o kgatlhegela ka namana dithapelo tsa batlhanka ba gagwe ba batho. Go na le gore a kgobe batho ba gagwe marapo gore ba se ka ba mmolelela sengwe le sengwe se ba se akanyang le se se ba tshwenyang, o ba kgothatsa jaana: “Lo rapeleñ ka go bisa go khutla,” “lo nnèlè rure mo thapeloñ,” “latlhèla morwalō oa gago mo go Yehofa,” ‘latlhelang tlhobaelo yotlhe ya lona mo [Modimong].’—1 Bathesalonia 5:17; Baroma 12:12; Pesalema 55:22; 1 Petere 5:7.

Fa e le gore Modimo o ne o sa batle go reetsa dithapelo tsa batlhanka ba gagwe, a ka bo a se kile a baakanyetsa gore ba kgone go mo atamela ka tsela eno gape o ne a ka se ba kgothaletse gore ba go dire ka kgololesego. Ka gone, selo seno sa gore Modimo o itlhophele ka boone gore batho ba gagwe ba kgone go mo atamela ke lengwe la mabaka a go dumela gore tota o a reetsa. Ee, o reetsa thapelo nngwe le nngwe ya batlhanka ba gagwe.

Ntlha e e sa tshwanelang go tlodisiwa matlho gape ke ya go bo Bibela e bolela ka phepafalo fela gore Modimo o reetsa thapelo. Ka sekai, moaposetoloi Johane o kwala jaana: “Me mo ke yōna botlhōka poihō yo re nañ nayō ntlheñ ea gagwè, go re, ha re lōpa señwe kaha go rateñ ga ōna, oa re utlwa.” (1 Yohane 5:14) Kgosi Dafide o ne a bitsa Jehofa Modimo a re ke “Eo o utlwañ thapèlō” a bo a gatelela ka tsholofelo a re: “O tla utlwa lencwe ya me.”—Pesalema 55:17; 65:2.

Ka jalo le mororo go rapela kwa ntle ga pelaelo go solegela molemo, Dikwalo di bontsha gore go na le dilo tse dintsi tse di amegang fa motho yo o siameng a rapela. Go na le motho mongwe yo o reeditseng. Motho yo o reeditseng yoo ke Modimo.—Yakobe 5:16-18.

Dithapelo Tse Di Neng tsa Utlwiwa

Bibela e tletse ka dikgang tsa batho bao tota ba neng ba utlwiwa le go arabiwa ke Modimo. Boitemogelo jwa bone bo gatelela ka phepafalo fela gore thapelo e molemo tota go gaisa fela gore e a alafa ka go bo motho a kgona go itse se a se akantseng ka phepafalo le go se bolela. E akaretsa go le gontsi go feta fela maiteko a motho a a dirang ka namana go dumalana le dithapelo tsa gagwe.

Ka sekai, Kgosi Dafide o ne a rapela jaana fa a ne a lebane le botsuolodi jo bo neng bo dirwa ke Abesalome jwa go tsaya bogosi jwa Iseraele: “Yehofa, kea gu rapèla, a ko u hetolè kgakololō ea ga Ahitofele (mogakolodi wa ga Abesalome) bonyana hèla.” Ga se koponyana fela e nnye, ereka “kgakololō ea ga Ahitofele, . . . e ne e chwana yaka ekete ha motho a botsa kwa bobuèloñ yoa Modimo: kgakololō eotlhe ea ga Ahitofele e ne e nntse yalo.” Morago ga foo, Abesalome o ne a gana leano la ga Ahitofele la go tsaya puso ya ga Kgosi Dafide ka dikgoka. Ka ntlha yang? “Gonne Yehofa o na a laotsè go senya kgakololō e e molemō ea ga Ahitofele, e le gore Yehofa a tlisè boshula mo go Abesalome.” Go phepafetse gore thapelo ya ga Dafide e ne ya utlwiwa.—2 Samuele 15:31; 16:23; 17:14.

Ka tsela e e tshwanang, Hesekia o ne a fola fa a sena go rapela Modimo gore o mo fodise bolwetsi jo bo neng bo tla mmolaya. A seno e ne e le fela ka ntlha ya tsela e Hesekia a neng a simolola go akanya ka yone ka ntlha ya go bo a ne a rapela? Eleruri nnyaa! Molaetsa o Jehofa a neng a o romelela Hesekia ka moperofeti Isaia o ne o re: “Ke utlwile morapèlō oa gago, ke bonye dikeledi tsa gago: bōna, ke tla gu hodisa.”—2 Dikgosi 20:1-6.

Moengele wa ga Jehofa o ne a tlhomamisetsa Daniele yo thapelo ya gagwe e neng ya arabiwa moragonyana go feta kafa a neng a akantse ka teng jaana: “Mahoko a gago a utlwilwe.” Dithapelo tsa batho ba bangwe gape, jaaka tsa ga Hana, barutwa ba ga Jesu, molaodi wa mephato ebong Korenelio, di ne tsa arabiwa ka ditsela tse go ka se kang ga twe seo se kgonnwe ka nonofo ya motho fela. Bibela he, e ruta ka phepafalo fela gore dithapelo tse di rapelwang go dumalana le thato ya Modimo, Modimo o a di reetsa, o a di utlwa, le go di araba.—Daniele 10:2-14; 1 Samuele 1:1-20; Ditihō 4:24-31; 10:1-7.

Mme gone Modimo o araba jang dithapelo tsa batlhanka ba gagwe ba ba ikanyegang gompieno?

Go Arabiwa ga Dithapelo

Dithapelo tse di umakilweng fa godimo di ne tsa arabiwa ka ditsela tse di kgatlhang le tse di gakgamatsang. Lefa go ntse jalo, tsweetswee gakologelwa gore le eleng mo metlheng ya Bibela ditsela tse dithapelo di neng di arabiwa ka tsone kgapetsakgapetsa di ne di sa lemogiwe motlhofo. Seno ke ka gonne di ne di amana le go nonotshiwa le go sedifalediwa, di dira gore batlhanka ba Modimo ba kgone go tshwarelela mo tseleng e e siameng. Mme mo Bakereseteng segolobogolo, dikarabo tsa dithapelo tsa bone di ne di akaretsa dilo tse e neng e le tsa semoya thata, eseng ditiro tse di tlhomologileng kana tse dikgolo.—Bakolosa 1:9.

Ka gone o se ka wa hutsafala fa dithapelo tsa gago di sa arabiwe ka tsela e o neng o e lebeletse kana e o e ratang. Ka sekai, go na le gore a tlose teko nngwe, Modimo a ka nna a tlhopha go go naya “bogolo yo bo leñ bogolo thata yoa nonohō” gore o e itshokele. (2 Bakorintha 4:7; 2 Timotheo 4:17) Ga re a tshwanela le ka motlha ra nyatsa kafa maatla ao a leng botlhokwa ka teng, kana gone go swetsa ka gore Jehofa tota ga a araba thapelo ya rona ka gope.

A o ko o akanye ka kgang ya yo tota e leng Morwa Modimo, Jesu Keresete. Jesu o ne a rapela jaana fa a ne a amegile ka gore o tlile go swa jaaka ekete motho yo o tlhapatsang: “Rra, Ha e le go rata ga gago, tlosa senwèlō se mo go nna.” A Modimo o ne wa utlwa thapelo eno? Ee, fela jaaka Bahebera 5:7 e supa jalo. Jehofa ga a ka a golola Morwawe gore a se ka a swela mo koteng ya pogisetso. Go na le moo, “ga bōnala moengele kwa go èna, a cwa legodimoñ, a mo thatahatsa.”—Luke 22:42, 43.

A seo ke karabo e kgolo e e gakgamatsang? E ne e tla lebega jalo mo go ope fela wa rona! Mme lefa go ntse jalo, mo go Jehofa Modimo, motswedi wa maatla, e ne e se kgakgamatso. Mme Jesu ene o ne a tlwaetse seno go ya ka boitemogelo jwa gagwe jwa ditiragalo tse di fetileng tsa ka nako ya fa a santse a nna kwa legodimong fa baengele ba ne ba a tle ba tle mo bathong. Ka jalo o ne a ka se ka a gakgamadiwa ke go bonala ga moengele jaaka rona. Lefa go ntse jalo, moengele yono, yoo ka phepafalo Jesu a neng a mo itse ka namana mo botshelong jwa Gagwe jwa pele e nna motho, o ne a Mo thusa gore a nonofele teko e e neng e le fela fa pele.

Fa a araba dithapelo tsa batlhanka ba gagwe ba ba ikanyegang gompieno, Jehofa o ba naya maatla a go itshoka gangwe le gape. A ka ba tshegetsa ka go ba kgothatsa ka baobamedi ka bone bao ba ba itseng ka namana. A go na le ope fela wa rona yo a neng a ka gana kgothatso e e ntseng jalo, gongwe a konela ka gore ereka batlhanka ba bangwe ba ise ba lekiwe ka tsela e e tshwanang le ya rona, ga ba kake ba kgona go re nonotsha? Jesu le ene o ne a ka nna a leba moengele yo a neng a bonala kwa go ene ka tsela eo. Go na le moo, o ne a amogela kgothatso eo jaaka karabo ya ga Jehofa ya thapelo ya gagwe mme ka jalo o ne a kgona go wetsa go dira thato ya ga Rraagwe ka boikanyegi. Le rona re tla rata go amogela ka lorato nonofo e Modimo o e re nayang fa a araba dithapelo tsa rona. Gakologelwa gape gore dipaka tse di ntseng jalo tsa go itshoka ka bopelotelele gantsi di latelwa ke masego a a seng kana ka sepe.—Moreri 11:6; Yakobe 5:11.

Tlhomamisega Gore Modimo O A Reetsa

O se ka le ka motlha wa bo wa latlhegelwa ke tsholofelo ya gore thapelo e mosola fa o sa arabiwe ka yone nako eo. Dikarabo tsa dithapelo tse dingwe tse di tshwanang le tsa go rapelela go gololesega mo matshwenyegong kana mo boikarabelong jo bo oketsegileng jwa tirelo e motho a e direlang Modimo, di ka nna tsa letisiwa nako e Modimo a tla bong a itse gore e siame ebile e tshwanetse sentle. (Luke 18:7, 8; 1 Petere 5:6) Fa o rapelela kgang nngwe e e go amang thata ka namana, bontsha Modimo ka go rapela o sa kgaotse gore o eletsa seo tota, gore maikaelelo a gago a molemo le gore ke a mmatota. Jakobe o ne a supa moya ono fa a ne a bolelela moengele jaana a sena go lwa le ene thata le ka lobaka lo loleele a re: “Ga nketla ke gu lesa u tsamaea ha u sa ntshegōhatse.” (Genesise 32:24-32) Re tshwanetse go tlhomamisega ka tsela e e tshwanang gore fa re tswelela pele re kopa, re tla amogela masego ka nako e e tshwanetseng.—Luke 11:9.

Kgopolo ya bofelo. Ke tshiamelo e kgolo tota gore Molaodi wa lobopo a go sekegele tsebe. Mabapi le seno, a re reetsa ka kelotlhoko fa Jehofa Modimo a re bolelela dilo tse a di batlang mo go rona ka Lefoko la gagwe? Ereka dithapelo tsa rona di re atametsa thata mo Mmoping wa rona, re tla ela tlhoko sengwe le sengwe se a se re bolelelang ka bomasisi.

[Setshwantsho mo go tsebe 6]

Modimo o reetsa dithapelo. A rona re a mo reetsa ka go reetsa Lefoko la gagwe?