A O A Gakologelwa?

A o ile wa fitlhela ditokololo tsa bosheng tsa Tora ya Tebelo di le mosola mo go wena? He ke eng fa o sa leke go bona gore a o ka gakologelwa dilo tse di latelang:

▫ Boikaelelo jo bogolo jwa ga Jesu fa a ne a fodisa e ne e le eng?

Se go neng go se supa ke se gompieno se kgothatsang ba boidiidi jo bogolo jwa dinku di sele gore ba ba tla falolang Hara-Magedona ba tla fodisiwa ka bonako fela morago ga Hara-Magedona. (Isaia 33:24; 35:5, 6)—12/15, tsebe 12.

▫ Ke ka ntlha yang fa re tlhoka go nna re gakololwa seno ka metlha: “Lo nnèlè rure mo thapeloñ”? (Baroma 12:12)

Dikgatelelo tsa botshelo le boikarabelo jwa jone ka dinako tse dingwe di ka nna tsa re imela mo re ka lebalang go rapela. Kana mathata a ka re fekeetsa, a re dira gore re se ka ra tlhola re itumelela tsholofelo ya Bogosi, le eleng go re dira gore re tlogele go rapela. Ka jalo, re tlhoka dikgakololo tse di re kgothaletsang go rapela mme ka tsela eno re atamele Jehofa.—12/15, tsebe 14.

▫ Ke eng se se supang tota gore Morwalela wa motlha wa ga Noa o ne wa ama batho ka tsela e ba ka se e lebaleng?

Go ile ga fopholediwa gore go na le ditlhamane tsa Morwalela tse di fetang 500 tse di bolelwang ke merafe le batho ba ba fetang 250. Ditlhamane tseno tsotlhe di fitlhelwa di na le dilo dingwe tse di tshwanang.—1/15, tsebe 5.

▫ Baperofeti ba gompieno ba maaka ba tshwana jang le ba motlha wa ga Jeremia?

Baperofeti ba gompieno ba maaka, ba ipolela gore ba emela Modimo, mme ba utswa lefoko la Modimo ka go rera dilo tse di dirang gore batho ba se ka ba tlhokomela se Bibela e se bolelang. Seno se boammaaruri segolobogolo kaga seo ba se rutang kaga Bogosi. (Yeremia 23:30)—2/1, tsebe 4.

▫ Ke eng se se kaiwang ke fa motho a kolobediwa mo leineng la moya o o boitshepo?

Seno se kaya gore yo o kolobediwang o iketleeditse go dirisana mmogo le moya, a sa dire sepe se se tla o kgoreletsang gore o se ka wa dira mo bathong ba ga Jehofa. Ka gone, motho yoo o tshwanetse go dirisana mmogo le motlhanka yo o boikanngo le yo o botlhale le thulaganyo ya phuthego ya go nna le bagolwane. (Bahebera 13:7, 17; 1 Petere 5:1-4)—2/1, tsebe 18.

▫ Ke ka ntlha yang fa go obamela ditshwantsho go le kotsi mo mothong yo o di obamelang?

Bibela e bontsha gore ditshwantsho di makgapha mo go Jehofa Modimo ebile ga di thuse ka gope ba ba ineetseng mo go tsone go atamela Modimo. (Duteronome 7:25; Pesalema 115:4-8) Satane Diabolo o ‘foufaditse megopolo’ ya batho gore boammaaruri bo se ka jwa ba “phatsimèla.” (2 Bakorintha 4:4) Ka jalo fa motho a rapela ditshwantsho, totatota o a bo a itumedisa badimona. (1 Bakorintha 10:19, 20)—2/15, ditsebe 6-7.

▫ Ke ka ntlha yang fa dinku e ne e le leruo la botlhokwa mo metlheng ya Bibela?

Boboa bo nna bo tlhoga gape fa bo sena go pomiwa mme ka gone bo ne bo ka dirisediwa go direla balelapa diaparo kana jwa rekisiwa. Dinaka tsa diphelehu di ne di dirisiwa go itsise Jubile kana di ne di ka nna tsa dirisiwa go opa mokgosi kana go kaela masole mo ntweng. Ereka dinku e ne e le dingwe tsa diphologolo tse di itshekileng tse Baiseraele ba neng ba ka di ja, fa o ne o na le motlhape wa dinku o ne o na le dijo, mme gape di ne di ntsha mashi a a nowang le a a dirang tšhisi.—3/1, ditsebe 24-5.

▫ Batho ba ba ratang Modimo ba a bo ba kopa eng fa ba rapelela gore Bogosi jwa Modimo bo tle? (Mathaio 6:10)

Se ba se kopang ke gore Bogosi jwa Modimo jwa selegodimo bo tseye kgato ya bofelo bo senye ditsamaiso tsa dipuso tse di dirilweng ke motho, tseo di ileng tsa palelwa go fitlhelela tsholofetso ya tsone ya go lere kagiso le polokesego. (Daniele 2:44)—3/15, tsebe 6.

▫ Balwelatumelo e ne e le bomang, mme a ba ne ba ruta thuto ya Tharonngwe?

Balwelatumelo e ne e le banna ba kereke ba ba neng ba tshela mo karolong ya bofelo ya lekgolo la bobedi la dingwaga. Ba ne ba kwala dikwalo go femela Bokeresete jo ba neng ba bo itse kgatlhanong le botlhajana jo bo neng bo tletse mo lefatsheng la Roma. Ga go ope wa bone yo a neng a ruta ka Tharonngwe.—4/1, ditsebe 24-9.

▫ A rraagwe Johane Mokolobetsi ebong Sakaria o ne a dirwa susu le semumu, jaaka go lebega ekete Luke 1:62 e supa jalo?

Gabariele o ne a bolela gore Sakaria o ne a tla amega mo puong, eseng mo go utlweng. (Luke 1:18-20) Luke 1:64 e bolela jaana: “Me molomo oa [ga Sakaria] oa mumuloga ka bonakō, le loleme loa gagwè loa hunologa, me a bua, a baka Modimo.” Tlhokomela gore ga go umakiwe sepe kaga go utlwa ga gagwe gore go ne go amegile ka tsela nngwe. Go umakiwa ga go “gwètlha” mo go Luke 1:62 go ka nna ga kaya gore go ne ga buiwa ka matsogo gore Sakaria a dire tshwetso.—4/1, tsebe 31.