O ka Kgona go Gomotsega ka Dinako tsa Fa O Ngomogile Pelo
RE TSHWANETSE go leba go ikutlwa o ngomogile pelo jang? Fa e le gore re setse re ineetse mo go Jehofa, a re tshwanetse go go leba go sa tlwaelega gonne re na le tsholofelo e e molemolemo ebile re na le dilo tsa semoya tse di re tshegetsang? A fa re ikutlwa ka tsela eo go raya gore semoyeng ga re a tshwanela tirelo ya Modimo?
“Eliya e ne e le motho eo o maikutlō a a chwanañ le a rona,” morutwa Jakobe o ne a kwala jalo. (Yakobe 5:17) Le mororo Modimo o ne wa dirisa Elija ka tsela e e tlhomologileng thata, le eleng ene moperofeti yo o ikanyegang yoo o ne a tle a ngomoge pelo. “Go lekanye,” Elija ne a tlhaeletsa jalo ka nako nngwe. “Yehofa, tlosa botshelō yoa me; gonne ga ke gaise borra echo ka molemō.” (1 Dikgosi 19:4) Monna yo o bolokang bothokgami ebong Jobe, mosadi yo o ikanyegang ebong Hana, le batlhanka ba bangwe ba ba ikanyegang ba ga Jehofa le bone ba ne ba a tle ba ngomoge pelo. Le eleng mopesalema Dafide yo a neng a rata Modimo o ne a rapela jaana: “Dikhuduègō tsa pelo ea me di goletse pele; a u ko u nntshè mo dipitlaganoñ tsa me.”—Pesalema 25:17.
Lebaka la go bo Jehofa a dirisa batho gore ba mo direle ga le ba dire gore ba se ka ba tshwenyega ka gope. Ba santse ba na le makoa le maikutlo jaaka batho ebile ba ka ngomoga pelo fa ba lekwa. (Ditihō 14:15) Lefa go ntse jalo, batlhanka ba Modimo ba na le dilo tse di botoka tse di ba thusang go itshokela go ngomoga maikutlo go feta batho ba bangwe. A re sekasekeng dikai di sekae tsa Bibela mme re bone gore batho ba bangwe ba ne ba thusiwa ke eng gore ba fenye go tshwenyega thata mo maikutlong le go ngomoga pelo.
Moaposetoloi Yo O Ngomogileng Pelo O A Gomodiwa
Moaposetoloi Paulo o ne a itse gore go utlwala jang go tshwenyega thata mo maikutlong. “Gonne,” o ne a bolela, “e rile re tsile mo Makedonia, nama ea rona ea se ka ea bōna boiketlo . . . kwa ntlè ga bo go le ditlhabanō, mo teñ ga bo go le dipoihō. Leha go nntse yalo, eo o gomotsañ baikokobetsi, eboñ Modimo, oa re gomotsa ka go tla ga Tito.” (2 Bakorintha 7:5, 6) Paulo o ne a tshwenyegile thata mo maikutlong ka ntlha ya maemo mangwe a le mmalwa a a ngomolang pelo a a neng a diragala ka nako e le nngwe. Mo godimo ga moo, “kwa ntlè ga bo go le ditlhabanō”—pogiso e e botlhoko e e neng e baya botshelo mo kotsing. (Bapisa 2 Bakorintha 1:8.) Mo godimo ga moo, “mo teñ ga bo go le dipoihō” tse e neng e le go tshwenyega thata ka diphuthego, jaaka e e neng e le kwa Korintha.
Dikgwedi di se kae pele ga foo, Paulo o ne a kwaletse Bakeresete ba kwa Korintha lokwalo lwa gagwe lwa ntlha. Mo go lone o ne a kgala maemo mangwe a le mmalwa a a maswe thata a a neng a le mo phuthegong mme go lebega a ne a tshwenyegile thata kaga gore ba ne ba dira jang fa ba utlwa lekwalo la gagwe. Lefa go ntse jalo, Paulo o ne a gomotsega fa Tito a ne a goroga a tswa kwa Korintha a mo tlela ka pego e e itumedisang ya gore ba ne ba tsaya kgato efe. Ka tsela e e tshwanang, Jehofa a ka nna a dirisa mongwe wa batlhanka ba gagwe ba motlha wa segompieno go tla go re bolelela dikgang tse di monate a bo a nyeletsa go ngomoga pelo ga rona.
Kafa Re Tshwanetseng go Leba Tiro E Re E Filweng Ke Modimo ka Teng
Bakeresete bangwe ba ngomoga pelo ka ntlha ya bodihedi jwa bone. Eleruri, bangwe ba batlhanka ba ga Jehofa ba ile ba akanya gore ga ba kake ba kgona go dira ditiro tse ba di filweng ke Modimo ka botlalo. Ka sekai, Moshe o ne a ikutlwa a sa tshwanele go emela bana ba Iseraele mo Modimong fa ba ne ba le kwa Egepeto. Gareng ga dilo tse dingwe o ne a re ga a itse go bua sentle. (Ekesodo 3:11; 4:10) Moshe o ne a simolola go dira tiro e a e neetsweng a ikantse Modimo ebile a na le Arone jaaka mmueledi wa gagwe.
Fa nako e ntse e tsamaya Moshe o ne a sa tlhole a ikaega ka Arone. Ka tsela e e tshwanang bangwe kwa tshimologong ba ka fitlhela bodihedi jwa Bokeresete bo le bokete tota, mme lefa go ntse jalo ba a katisiwa ba bo ba nna bareri ba ba ditswerere. Ka sekai, Basupi ba bantsi ba babotlana ba ga Jehofa ba ile ba nna bareri ba nako e e tletseng ba babulatsela le barongwa. Go gomotsa tota go itse gore re ka ikaega ka metlha ka Jehofa gore re thuse ba bangwe go tshwanela go nna badihedi ba Bakeresete le go ba nonotsha gore ba dire tiro ya bone e ba e filweng ke Modimo.—Sekaria 4:6; 2 Bakorintha 2:14-17; Bafilipi 4:13.
Kgomotso ya Fa O Ngomogile Pelo ka Ntlha ya go Swaba
Re ka nna ra hutsafala ka gonne re swabisitswe ke gore ga re a dira mo go oketsegileng mo tirelong ya Modimo. Mokaulengwe mongwe yo o neng a nna dingwaga a ntse fa fatshe o ne a simolola go nna le seabe gape mo bodiheding jwa tshimo. Ka bonako fela morago ga foo, o ne a tsenwa ke bolwetsi jo bo masisi tota mme a nnela ruri mo diphateng. Mokaulengwe yo o neng a hutsafetse yono o ne a bolela jaana: “Ke ne ka tila go dira boikarabelo jwa me pele ga fano ka nako ya fa ke ne nka kgona go nna tlhaga. Jaanong, ka nako ya fa ke batla go nna tlhaga, ga ke kgone.”
A go tla bo go se botlhale gore re dire bojotlhe jwa rona jaanong go na le gore re tle go dirisa nonofo ya maikutlo a rona mo go seo se re diragaletseng mo nakong e e fetileng? Bakaulengwe ba ga Jesu ka mmaagwe ba senama ebong Jakobe le Jude ba ne ba dumela fela fa a sena go swa le go tsosiwa mo baswing. Fa e le gore ba ne ba swabela seno, ga go a ka ga ba thibela gore ba se ka ba nna batlhanka ba Modimo le eleng bakwadi ba Bibela.
O Se Ka wa Tlogela go Rapela le ka Motlha
Batho ba Modimo ba tshwanetse go rapela ba le tlhaga tota ka nako ya fa ba tshwenyegile thata mo maikutlong. Ebile tota, Dikwalo di na le dithapelo tse dintsi tse di neng tsa rapelwa ka nako ya fa motho a ne a ngomogile pelo. (1 Samuele 1:4-20; Pesalema 42:8) Bangwe ba ka nna ba akanya jaana: ‘Ke tshwenyegile maikutlo thata mo ke sa kgoneng go rapela.’ He ke ka ntlha yang fa o sa akanye ka Jona? O ne a bolela jaana fa a ne a le mo mpeng ya tlhapi: “E rile mōea oa me o idibala mo teñ ga me, ka gakologèlwa Yehofa; me morapèlō oa me oa ea go tsèna kwa go wèna, mo tempeleñ ea gago e e boitshèpō. . . . Me nna ke tla gu isetsa setlhabèlō ka lencwe ya tebogō; ke tla leha se ke se ikanneñ. Poloka ke ea ga Yehofa.” (Yona 2:4-9) Ee, Jona o ne a rapela, mme Modimo o ne wa mo gomotsa wa bo wa mmoloka.
Le mororo kgaitsadi mongwe wa kwa Sweden a ne a na le dingwaga tse dintsi e le mmulatsela, o ne a ikutlwa a tshwenyegile thata mo maikutlong ebile a lapile thata le mororo bodihedi jwa gagwe bo ne bo duela tota. O ne a bolelela Jehofa kafa a hutsafetseng ka teng. Malatsi a sekae morago ga foo, o ne a lelediwa mogala ke mokaulengwe mongwe go tswa kwa ofising ya lekala ya Mokgatlho wa Watch Tower. O ne a mmotsa gore a o ne a ka kgona go thusa letsatsi le le lengwe ka beke mo tirong ya go oketsa Bethele. Moragonyana kgaitsadi yono o ne a bolela jaana: “Tsela e go neng go ntse ka yone kwa Bethele mmogo le go nna le tshono ya go bona tiro eno ya go oketsa le go nna le seabe mo go yone go ne ga nnaya maatla a a oketsegileng a ke neng ke a tlhoka.”
Fa re tshwenyegile thata mo maikutlong, go molemo go gakologelwa gore thapelo ke tsela e nngwe ya go lwa le go tshwenyega mo maikutlong. (Bakolosa 4:2) Jehofa a ka araba dithapelo tsa rona ka go re bulela kgoro e e re isang kwa go reng re dire tiro e kgolwane mo tirelong ya gagwe, kana a ka segofatsa bodihedi jwa rona ka gore bo ungwe thata. (1 Bakorintha 16:8, 9) Lefa go ka nna jang, “tshegōhacō ea ga Yehofa ea humisa, me ga a ke a e oketsa ka bohutsana.” (Diane 10:22) Seno eleruri se tla nametsa maikutlo a gago.
A o Ngomoga Pelo ka Ntlha ya Dipelaelo?
Gangwe le gape, mongwe wa batlhanka ba ga Jehofa a ka nna a belaela. Fa e le gore seno se ka re diragalela, ga re a tshwanela gore ka bonako fela re bo re swetsa ka gore Modimo ga o tlhole o re rata. Jesu ga a ka a latlha moaposetoloi Thomase fa a ne a belaela dipego tsa ba ba neng ba bolela gore Mong wa gagwe o tsositswe mo baswing. Go na le moo, Jesu o ne a thusa Thomase ka lorato gore a tlogele go belaela. Mme abo Thomase a ne a itumela jang ne fa a ne a lemoga gore Jesu o ne a tshela!—Yohane 20:24-29.
“Batho ba ba sa reñ Modimo sepè” ba ba neng ba kukunetse mo phuthegong ya Bokeresete ya lekgolo la ntlha la dingwaga ba ne ba dira gore ba bangwe ba ngomoge pelo ke go belaela ka dithuto tsa bone tsa maaka, go ngongorega le tse dingwe. Ke gone ka moo, morutwa Jude a neng a kwala jaana: “Me bañwe lo ba utlwèlè botlhoko, eboñ ba ba akabalañ; Me bañwe lo ba bolokè ka go ba shwatola mo moleloñ.” (Yude 3, 4, 16, 22, 23) E le gore Modimo o tswelele o ntse o ba utlwela botlhoko, ba ba neng ba obamela le Jude—segolobogolo bagolwane ba phuthego—ba ne ba tlhoka go utlwela botlhoko ba ba neng ba belaela ebile ba tshwanelwa go utlwelwa botlhoko. (Yakobe 2:13) Ba ne ba le mo kotsing ya go latlhegelwa ke botshelo jo bo sa khutleng, gonne ba ne ba le mo kotsing ya go bolaelwa ruri ke ‘molelo.’ (Bapisa Mathaio 18:8, 9; 25:31-33, 41-46.) Mme abo go itumedisa jang ne fa badumedi ka rona ba ba belaelang ba thusiwa ka bopelonomi mme ba boa ba nonofa gape semoyeng!
Fa re lekwa ka tsela e e utlwisang botlhoko mme seno se re dira gore re belaele gore Modimo o na le rona, re tlhoka go bolela mathata a rona ka tlhamalalo fa re rapela. Fa re le mo maemong a a ntseng jalo, a re ke re ganeleleng mo go kopeng Jehofa gore a re neye botlhale. O re naya ka bopelotshweu a sa re kgobe ka gore ga re botlhale le ka gore re a bo rapelela. Re tshwanetse go ‘kopa ka tumelo, re sa belaele sepe,’ gonne motho yo o belaelang o “chwana le makhubu a lewatlè a a kgweediwañ, a phailakwa ke phehō” e a isa kwa le kwa. Modimo ga o neye batho ba ba ntseng jalo sepe gonne ba maikutlo mabedi, ba a ‘akgaakgega’ mo dithapelong tsa bone le mo ditseleng tsotlhe tsa bone. (Yakobe 1:5-8) Ka jalo a re dumeleng gore Jehofa o tla re thusa gore re lebe diteko tsa rona ka tsela e e siameng mme re di itshokele. Re ka tlhokomedisiwa Dikwalo dingwe ke badumedi ka rona kana fa re ithuta Bibela. Ditiragalo tse di kaelwang ke Modimo ka botlhale le ka go bo a amega ka rona di ka nna tsa re thusa go bona gore re tshwanetse go dira eng. Baengele ba ka nna le seabe mo go re kaeleng, kana re ka kaelwa ke moya o o boitshepo. (Bahebera 1:14) Selo se segolo ke go rapelela botlhale re ikantse Modimo wa rona o o lorato.—Diane 3:5, 6.
Gakologelwa Gore Jehofa O A Gomotsa
Paulo o ne a ikaega ka Jehofa ka thapelo ebile o ne a itse gore ke Motswedi wa kgomotso. Moaposetoloi yono o ne a kwala jaana: “A go bakwè Modimo le Rra Morèna oa rona Yesu Keresete, Rra mautlwèlō botlhoko, le Modimo oa kgomoco eotlhe; O o re gomotsañ mo pitlaganoñ eotlhe ea rona, gore re tlè re nonohèlè go gomotsa ba ba mo pitlaganoñ ñwe le ñwe, ka kgomoco e rona ka rosi re gomodiwañ ka eōna ke Modimo.”—2 Bakorintha 1:3, 4.
Modimo o o gomotsang ka ditsela tsotlhe o itse kafa batlhanka ba gagwe ba ngomogang pelo ka teng ebile o batla go ba imolola. Mo kgannyeng ya fa Paulo a ne a tshwenyegile ka Bakorintha, o ne a gomotsega ka tsala ya gagwe ya Mokeresete ebong Tito. Eno ke nngwe ya ditsela tse re ka gomotsegang ka tsone gompieno. Ka gone re tshwanetse go tila go nnela kwa thoko re le esi ka nako ya fa re ngomogile pelo. (Diane 18:1) Go kopana le Bakeresete ba bangwe ke nngwe ya ditsela tse Modimo o re gomotsang ka tsone. Re ka nna ra akanya jaana: ‘Ke hutsafetse mo ke senang le yone nonofo ya go kopana le ditsala tsa me tsa Bakeresete.’ Lefa go ntse jalo, re tshwanetse go lwa le maikutlo a a ntseng jalo mme re se ka ra ithontsha go gomodiwa ke badumedi ba bangwe.
O Se ka wa Itlhoboga!
Bangwe ba rona ba ka tswa ba ise ba lekwe ka teko e e maatla mo ba neng ba bo ba tshwenyega thata mo maikutlong. Mme bolwetsi jo bo go tlogelang o le bokoa, go swelwa ke molekane wa lenyalo, kana boemo bope fela jo bongwe jo bo lekang tota bo ka dira gore o ngomoge maikutlo. Fa go ka diragala jalo, re se ka ra swetsa gore re lwala semoyeng. Motho yo o tshwenyegileng mo maikutlong a ka nna a bo a tshwanela sentle go direla Modimo, ebile a kgona go thusa ba bangwe semoyeng. Paulo o ne a kopa bakaulengwe gore ba ‘nametse ba ba lapang pelo,’ ba se ka ba ba akanyetsa ba ba belaela gore ba ka tswa ba dirile sengwe se se phoso le gore ba lwala semoyeng. (1 Bathesalonia 5:14) Le mororo go tshwenyega thata mo maikutlong ka dinako dingwe go amana thata le go bo motho a dirile phoso kana molato mongwe, ga go ke go nna jalo ka bao ba direlang Modimo ba le peloephepa. Jehofa o amogela kobamelo ya bone, lefa gongwe ba obamela ba na le mathata a a masisi. O a ba rata ebile o ba thusa kafa ba tlhokang ka teng le go ba gomotsa.—Pesalema 121:1-3.
Bao ba bopang masalela a Iseraele wa semoya ba ne ba ngomogile pelo tota fa ba ne ba lekwa ka ngwaga wa 1918. (Bapisa Bagalatia 6:16.) Thulaganyo ya bone ya go rera e ne e batlile e senngwa, bangwe ba bone ba ne ba tsentswe mo kgolegelong ba sena molato, le bontsi jwa bao ba neng ba kopanela le bone pele e ne ya nna batenegi ba ba sa ikanyegeng, ba ba ganetsang. Mo godimo ga moo, batlodiwa ba ba ikanyegang ba ne ba sa tlhaloganye gore ke ka ntlha yang fa Modimo o ne o letlile gore dilo tseno tsotlhe di diragale. Ba ne ba ‘jala ka dikeledi’ ka lobakanyana, mme ba ne ba se ka ba itlhoboga. Ba ne ba nna ba direla Jehofa le go nna ba itshekatsheka. Go ne ga felela jang? Ba ne ba ‘tla ba itumetse, mongwe le mongwe dingata tsa gagwe a na natso.’ (Pesalema 126:5, 6) Batlodiwa jaanong ba lemoga gore Modimo o ne o letla diteko tse di ntseng jalo gore ba itshoke ba tle ba dire tiro e e neng e atamela ya go roba mo merafeng yotlhe.
Fa go ka diragala gore re ngomoge pelo gonne re lekwa ka ditsela tse di farologaneng, re ka solegelwa molemo ke seo se neng sa diragalela masalela a a tloditsweng. Go na le gore re itlhoboge, a re nneng re dire se se siameng, le eleng lefa re ka dira seo re ntse re lela. Fa nako e ntse e tsamaya re tla kgona go tswa mo ditekong tsa rona, mme re tla ‘itumela.’ Ee, re tla bona boitumelo—leungo la moya wa Modimo o o boitshepo—ka go bo re tla bo re itshoketse diteko. Mo go rona, Jehofa eleruri o tla itshupa gore ke “Modimo oa kgomoco eotlhe.”