Ke Ka Ntlha Yang Fa Re Tshwanetse Go Direla Jehofa?
“LETSATSI la ga Jehofa le atametse! ‘Sepitla se segolo’ se gaufi, mme ga o kake wa se falola fa o sa direle Modimo.” Fa mongwe a ne a ka go raya jalo o ne o tla itshwara jang?—Sefania 2:2, 3; Mathaio 24:21.
Ke boammaaruri, gore re tshwanetse go nna re akantse ka letsatsi la ga Jehofa, mme gore motho a tle a kgone go falola sepitla se segolo se se tla tlogang se tla go ikaegile ka gore motho a direle Modimo ka boikanyegi. Lefa go le jalo a dilo tseno e tshwanetse ya nna tsone dilo tsa konokono tseo di re dirang gore re direle Jehofa Modimo tirelo e e itshekileng? Ke ka ntlha yang fa wena o direla Jehofa?
Go Botlhokwa go Nna le Maikutlo A A Tshwanetseng
Fa motho a sa direle Modimo ka maikutlo a a tshwanetseng, a ka nna a tlogela go tlhola a mo direla fa se a se solofetseng se sa diragale mo lobakeng lo lo rileng. Ka sekai, batho bangwe ba ne ba lebeletse gore Jesu Keresete o ne a tla boa gape a tla ka 1843 kgotsa ka 1844, e leng dingwaga tse di ileng tsa iphetela fela go sa diragala sepe. Go a kgatlhisa go ela tlhoko se se ileng sa kwalwa ke George Storrs, yo e neng e le mogatisi wa buka ya Bible Examiner mme ya re moragonyana a tlwaelana thata le Charles Taze Russell, yo e neng e le mookamedi wa ntlha wa Mokgatlho wa Watch Tower. Mo go Bible Examiner ya September 1846, Storrs o ne a kwala jaana:
“Selo se se re tlamang go obamela Modimo ke sengwe se se fetang kgakala kgang ya gore letsatsi le gaufi. . . . Tsela e batho ba tla itshwarang ka yone fa dingwaga tse tsa ’46 le ’47 di ka iphetela fela jaaka go ka nna ga diragala gore di iphetele fela batho ba sa bona go tla ga bobedi, e tla nna go kgobega marapo ka selekanyo se se boitshegang. Tiragalo e e kileng ya diragala e supa seno—ke raya tiragalo e e kileng ya diragala ka ’43 le ’44. Ba kae batho ba bantsi ba ba neng ba ipolela fa ba ‘tlhotlheletsegile go direla Modimo,’ jaaka ba ne ba tshwanetse, e le fela ka ntlha ya go bo ba ile ba bolelelwa gore ke nako ya go tla ga Morena? Mme ke ipoa kgatsu ka re—BA KAE!!! Ke motho a le mongwe mo go ba ba ka nnang lesome ba bone yo o santseng a dira tumelanong le maiphako a gagwe a Sekeresete. Ke ka ntlha yang fa go le jalo? Ke ka gonne ba ile ba tlhotlhelediwa ke maikutlo a a phoso. Ba ile ba gogelwa ka ntlha ya bogagapa jwa bone mme ba tlhagafala ka ntlha ya jone. Ba ne ba tshwana fela le moleofi yo o akanyang gore o tloga a swa ka ntlha ya bolwetsi jo a bo lwalang kana ka ntlha ya go bo a le mo garegare ga lewatle le le šhakgetseng. O bolela fa a tla fetoga Mokeresete fela ka gonne a le gaufi le go swa. Fa a ne a itse gore ga a mo kotsing o ne a tla tswelela pele ka botlhogoethata jwa gagwe.”
Go Direla O Tlhotlhelediwa ke Maikutlo A A Tshwanetseng
Bangwe ba ka tlhotlheletsega go dira thato ya ga Jehofa e le fela ka ntlha ya maikutlo a bogagapa le go tshaba go nyelediwa. Ba bangwe bone ba ka gapiwa maikutlo thata ke tsholofelo ya Paradaise mo ba ka direlang Modimo e le fela ka ntlha ya yone. Go ntse go le jalo, fa batho bano ba ba tlhotlhelediwang segolobogolo ke dilo tse di ntseng jalo ba ka akanya gore letsatsi la ga Jehofa le sepitla se segolo ga di gaufi go le kalo, ba ne ba ka nna ba se ke ba sekamele mo go obameleng Modimo ka tlhagafalo.
Ke boammaaruri gore ga se bogagapa go itumelela ditsholofetso tsa Modimo le masego a a boleletsweng pele. O batla re itumelela ditebelelo tse rona ba re leng balatedi ba ga Morwawe e leng Jesu Keresete re di beetsweng kwa pele. Moaposetoloi Paulo o ne a re: “Lo itumèlè mo choloheloñ,” a bo a oketsa ka gore: “Lo nnè pelotelele mo pitlaganoñ; lo nnèlè ruri mo thapeloñ.” (Baroma 12:12) Thapelo mmogo le “boitumèlō yoa ga Yehofa” di re thusa gore re kgone go itshokela diteko le go letela go diragadiwa ga ditsholofetso tsa Modimo ka bopelotelele. (Nehemia 8:10) Mme lefa go le jalo, re ka nna ra bo re na le mabaka a le mantsi a a re dirang gore re direle Jehofa. Mangwe a one ke afe?
Boikarabelo le Tshiamelo
Ka jaana Jehofa e le Molaodi wa Lobopo, o tshwanelwa ke tlotlo e e sa tshwaneng le epe ebile o batla gore re mo neele yone. (Ekesodo 20:4, 5) Ka jalo Mokeresete mongwe le mongwe o tlamega ka tsela e e tshwanang go direla Modimo go sa kgathalesege gore a sepitla se segolo se tla kamoso, ngwaga e e tlang, kgotsa morago ga moo. O tlamega go direla Jehofa kwantle ga bogagapa ka gonne a rata Modimo ka pelo yotlhe, ka moyasebele wa gagwe otlhe, tlhaloganyo yotlhe, le nonofo yotlhe. (Mareko 12:30) Bakeresete bangwe ba pele ba ne ba akanya gore letsatsi la ga Jehofa le ne le le gaufi, lefa go le jalo ga go a ka ga diragala jaaka ba ne ba solofetse, ka gone ba ne ba swa ba sa bona tiragalo eo. (1 Bathesalonia 5:1-5; 2 Bathesalonia 2:1-5) Lefa go ntse jalo, fa e le gore balatedi bao ba ba tloditsweng ba ga Keresete ba ile ba nna ba ntse ba ikanyegile go fitlhela ba a swa, e ne ya re kgabagare ba amogela tuelo ya bone ya go tsosediwa botshelong jwa selegodimo.—Tshenolō 2:10.
Basupi ba ba kolobeditsweng ba ga Jehofa ba tshwanetse go mo direla ka boikanyegi gonne ba ile ba ithaopela go dira thato ya gagwe ka go rata. A o ke o akanye fela! Le rona fela jaaka baengele ba ba boitshepo re ka kgona go dira thato ya Molaodi wa Lobopo. (Dipesalema 103:20, 21) Jesu o ne a tseela tshiamelo eo kwa godimo thata mo a ileng a re: “Seyō sa me ke go diha go rata ga eo o nthomileñ le go wetsa tihō ea gagwè.” (Yohane 4:34) Fa e le gore re na le moya o o tshwanang, re tla baka Jehofa ka tlhagafalo le go bolelela ba bangwe ka ga maikaelelo a gagwe jaaka fa a senotswe mo Dikwalong. Ka tsela eno, re na gape le tshiamelo ya go thusa ba bangwe semoyeng. Mme eleruri, go dira thato ya Modimo e le ka gonne re mo rata ke tshiamelo e kgolo go sa kgathalesege gore letsatsi la ga Jehofa le tla simolola leng.
Go Batla go Supa Tebogo go A Tlhotlheletsa
Go lebogela lorato lwa Modimo ka go bo a ile a re neela setlhabelo sa thekololo ka Morwawe le gone go tshwanetse ga re tlhotlheletsa go direla Jehofa. Ka nako nngwe re kile ra ne re kgaogane le Jehofa Modimo ka ntlha ya boleo. Lefa go ntse jalo, Jesu o ne a re: “Modimo o ratile lehatshe [la batho] mo go kalo kalo, oa ntsha Morwa ōna eo o tsecweñ a le esi, gore leha e le mañ eo o dumelañ mo go èna a se ka a nyèlela, me a bōnè botshelō yo bo sa khutleñ.” (Yohane 3:16) Mo go seno, ke Jehofa a ileng a tsaya kgato pele jaaka fa Paulo a ile a kwala: “Modimo ōna, o re tlhōmamiseditse loratō loa ōna, ka e rile re sa nntse re le baleohi, Keresete a re shwèla.” (Baroma 5:8) Go lebogela tsela eno e Modimo a re bontshitseng lorato ka yone go tshwanetse ga re tlhotlheletsa gore re mo direle ka pelo yotlhe.
Go anaanela ga rona dilo tsa semoya le tsa senama tseo Jehofa a re nayang tsone go re naya lebaka le lengwe gape la go mo direla ka boikanyegi. Lefoko la Modimo ke kaelo ya mmatota—lesedi la tselana ya rona. Dikgatiso tse re di bonang go tswa go “motlhanka eo o boikañō le eo o botlhale” di re thusa gore re dumalanye matshelo a rona le thato ya Modimo. (Mathaio 24:45-47; Dipesalema 119:105) Mme e bile ka gonne re batla Bogosi pele, Jehofa gape o re tlamela ka dilo tsa senama. (Mathaio 6:25-34) A o supa fa o anaanela dilo tseno?
Go lebogela ga rona kgololesego e re e filweng ke Modimo go tswa mo bodumeding jwa maaka go re naya lebaka le lengwe gape la go direla Jehofa ka boikanyegi. Seaka sa bodumedi ebong Babelona yo Mogolo “se [dutse] mo metsiñ a mantsi,” mo go rayang “dichaba, le boidiidi yoa batho, le merahe, le dipuō.” (Tshenolō 17:1, 15) Go ntse go le jalo, ga a a dula mo batlhankeng ba ga Jehofa, a ba tlhotlheletsa ka tsela ya sedumedi le go ba laola. Ka sekai, ba gana thuto ya bodumedi jwa maaka ya gore moyasebele wa motho ga o swe. Ba tlhaloganya gore motho o ne a bopiwa e le “[moyasebele] o o tshedileñ,” gore batho ba ba suleng “ga ba itse sepè,” le gore go tla nna le tsogo. (Genesise 2:7; Moreri 9:5, 10; Ditihō 24:15) Ka gone ga ba obamele baswi le fa e le go ba boifa. A go lebogela ga gago kgololesego eno ya semoya go go dira gore o ganane le botenegi le gore o kgomarele kobamelo e e itshekileng ya ga Jehofa?—Yohane 8:32.
Go anaanela ga rona tsela e Jehofa a re thusang ka yone letsatsi le letsatsi go tshwanetse ga nonotsha go iketleetsa ga rona go mo direla ka boikanyegi. Mopesalema Dafide o ne a bolela jaana: “A go bakwè Yehofa, eo o rwalañ merwalō ea rona ka malatsi.” (Dipesalema 68:19) Go gongwe gape mopesalema o ne a re: “Gonne rrè le mmè ba ntatlhile, me Yehofa o tla nchola.” (Dipesalema 27:10) Ee, motho yo o direlang Jehofa ka boikanyegi o ka latlhela merwalo ya gagwe ya tshwantshetso mo Modimong e e tshwanang le dilo tseo a amegileng ka tsone le diteko. A o supa fa o anaanela tshegetsho e e sekeng e retelelwa ya ga Jehofa ka go mo direla ka boikanyego?—Dipesalema 145:14.
Tlotlomatsa Jehofa le Go Busa ga Gagwe
Keletso ya go galaletsa Jehofa le yone e tshwanetse go re tlhotlheletsa gore re mo direle. Dibopiwa tsa selegodimo di tlhalosiwa di galaletsa Modimo ka mafoko ano: “Go gu chwanetse, Morèna oa rona, le Modimo oa rona, oa bo u bōna kgalalèlō, le tlotlō, le thata: gonne u tlhodile dilō cotlhe, me di ne di leeō, me tsa bopiwa ka ntlha ea go rata ga gago.” (Tshenolō 4:11) Kgosi Dafide o ne a tlotlomatsa Modimo ka go re: “Bogolo ke yoa gago, Yehofa, le thata, le kgalalèlō, le phenyo, le borèna . . . bogosi ke yoa gago, Yehofa . . . Khumō le eōna tlotlō di cwa mo go wèna, me u busa gotlhe hèla . . . Modimo oa rona, rea gu leboga, re baka leina ya gago ye le galalèlañ.” (1 Ditihalō 29:10-13) Jaaka batlhanka ba ga Jehofa, a ga re ikutlwe re patelesega go mo galaletsa ka se se tswang mo melomong ya rona le ka ditiro jaaka fa re ntse re letetse go diragadiwa ga ditsholofetso tsa gagwe?—1 Bakorintha 10:31.
Tlhotlheletso e e maatla ya go batla go bua kaga Bogosi jwa Modimo e re naya lebaka le lengwe gape le le re rotloeletsang go batla go direla Jehofa. Tlhotlheletso eo e e molemo e tlhalosiwa sentle ke mafoko ano a ga mopesalema: “Ditihō cotlhe tsa gago di tla gu ntshetsa malebogō, Yehofa; le baitshepi ba gago ba tla gu baka. Ba tla bua kaga kgalalèlō ea bogosi yoa gago, ba bua kaga thata ea gago; Go itsise bana ba batho ditihō tsa gagwè tsa bonatla, le kgalalèlō ea borèna yoa bogosi yoa gagwè. Bogosi yoa gago ke bogosi yo bo senañ bokhutlō, le pushō ea gago e eme go ea ditshikatshikeñ cotlhe.” (Pesalema 145:10-13) Go rera molaetsa wa Bogosi ke tiro e Bakeresete ba e filweng e bile ke tiro e e botlhokwa go di feta tsotlhe tse di kileng tsa dirwa mo motlheng wa rona. (Mathaio 24:14; 28:19, 20) A o na le keletso e e maatla ya go tlotlomatsa Jehofa le go bolelela ba bangwe kaga Bogosi jwa gagwe?
Go itshepisiwa ga leina la ga Jehofa le go tlotlomadiwa ga bolaodi jwa gagwe e tshwanetse go nna dilo tsa botlhokwa thata mo go rona mo go ka re dirang gore re batle go mo direla ka boikanyegi. Re ka rapelela gore leina la ga Jehofa le itshepisiwe le gore bolaodi jwa gagwe bo tlotlomadiwe. (Mathaio 6:9) Re ka dira tumalanong le dithapelo tsa rona ka go nna le seabe mo bodireding jwa Bokeresete ka metlha le go anamisa boammaaruri jo bo leng malebana le dilo tseno tse di botlhokwa.—Esekiele 36:23; 39:7.
Boipelo le Kgotsofalo
Go direla Jehofa ka boikanyegi go re dira gore re kgotsofadiwe ke go itse gore re dira se se itumedisang pelo ya gagwe le go supa fa Diabolo e le moaki. Lefa gone Satane a ntsha maiphako a maaka a gore batho ba direla Modimo fela ka ntlha ya mabaka a bogagapa, go direla ga rona Jehofa ka boikanyegi, re mo direla ka gonne re mo rata, go tla supa fa maiphako a motho yo o kgobang yono e le maaka. (Jobe 1:8-12) Seno se re naya mabaka a a utlwalang a go dira se go buiwang ka sone mo go Diane 27:11: “Morwaaka u tlhalehè, me u ipedisè pelo ea me, gore ke tlè ke hetolè èna eo o nkgōbañ.” Mo godimo ga moo, fa re direla Jehofa ka boikanyegi go sa kgathalesege dilo tsotlhe tse Satane a lekang go re kgoreletsa ka tsone, tsela eno e re supang ka yone gore re boloka bothokgami e ka nna ya nonotsha badumedi ka rona.—Bafilipi 1:12-14.
Boipelo le kgotsofalo tse re nnang le tsone ka ntlha ya go nna le seabe mo thobong ya semoya le tsone di tshwanetse tsa re tlhotlheletsa go direla Jehofa ka boikanyegi. Jesu o ne a itumelela go thusa batho, segolobogolo go ba thusa semoyeng. Mathaio 9:35-38 ya re: “Yesu a tlhatlologanya metse le metsana eotlhe, a èta a ruta mo matluñ a bōne a thutō, a rèra Mahoko a a Molemō a bogosi, a hodisa dipobolō diñwe le diñwe cotlhe, le malwetse mañwe le mañwe aotlhe hèla. Me ea re a bōna machutichuti a batho, a ba tlhomogèla pelo, ka ba patikegile ba gasagasame, yaka dinku tse di senañ modisa. Hoñ a raea barutwa ba gagwè, a re, Thōbō e kgolo rure, me barobi ba bannye. Me ke gona, rapèlañ Morèna oa thōbo, gore a romè barobi mo thoboñ ea gagwè.” Fa tiro ya go roba e tsaya lobaka lo loleele ka tsela eo re neng re sa solofela ka yone, seno se ka re naya sebaka se se oketsegileng sa go ipelela le go kgotsofalela go thusa ba bangwe semoyeng. Eno ke tsela e nngwe ya go supa lorato loo re lebeletsweng go nna le lone mo baagisaning ba rona.—Mathaio 22:39.
Ke Ka Ntlha Yang Fa O Direla Modimo?
Re sekasekile mabaka a se makae fela ao ka one re patelesegang go direla Jehofa ka boikanyegi. Ke selo se se molemo gore re akanyetse ka thapelo gore ke mabaka afe a a re dirang gore re direle Modimo, ka gonne mongwe le mongwe wa rona o tla ikarabela mo go ene. (Baroma 14:12; Bahebera 4:13) Modimo ga a kake wa amogela batho ba ba mo direlang ba tlhotlhelediwa ke bogagapa.
Ke eng se se ka lebelelwang fa re tshwenyegile segolobogolo kaga go itshepisiwa ga leina la ga Jehofa le go neela Modimo kobamelo e e boitshepo re tlhotlhelediwa ke maikutlo a e seng a bogagapa? Ee, Jehofa o tla re segofatsa a ba a segofatsa le bodiredi jwa rona! (Diane 10:22) Gape re tla amogela botshelo jo bo sa khutleng ka gonne re ile ra direla Jehofa ka boikanyegi.
[Setshwantsho mo go tsebe 9]
Diketekete di direla Jehofa kwa Japane
[Setshwantsho mo go tsebe 10]
Go direla Jehofa kwa Côte d’Ivoire
[Motswedi wa Setshwantsho mo go tsebe 8]
SIX SERMONS, by George Storrs (1855)