Lebaka la Go Bo O Tshwanetse Wa Nna Gone

LO TLA nna le malatsi a le mane a a nang le mosola a go rutiwa semoyeng kwa Kopanong ya Kgaolo ya “Thuto ya Bomodimo,” e e tla bong e tshwerwe mo metseng e megolo mo lefatsheng lotlhe monongwaga. Mo mafelong a le mantsi, thulaganyo e tla simolola ka Labone ka 1:20 p.m. mme e konele ka Sontaga ka 4:15 p.m. Kwa dikopanong dingwe sengwe se se tlhomologileng e tla bo e le dipego tse di tlang ka barongwa, ba ba ileng ba thusiwa go boela kwa dinagagaeng tsa bone gore ba nne gone mo tiragalong eno e e itumedisang.

Lefa o ka tswa o le mogolo kana o le mosha—monna yo o nyetseng, mosadi yo o nyetsweng, rrabana, mmabana, mosha wa dingwaga tsa bolesome, kana ngwana—o tla rutiwa ka tsela e e utlwalang, e e gogelang e e tla go solegelang molemo. Ka sekai, batho ba le bantsi gompieno ba botsa jaana, Lebaka la Go Bo Botshelo Bo Le Gone Ke Lefe? Ka Labotlhano mo mosong, o tla rata go utlwa jaaka go tlotlwa ka potso eno mme o tla itumelela go bona gore o tla amogela eng gore o thuse ba bangwe go tlhaloganya kgang eno.

Ka Labotlhano thapama kgangkgolo ya thulaganyo e tla bo e le dikarolo tse di reng “Go Dira Lenyalo Tshwaragano ya Bosakhutleng,” “Dira Ka Natla Gore Lelapa la Gago le Bolokwe,” le “Batsadi—Bana ba Lona ba Tlhoka Tlhokomelo E E Kgethegileng.” Morago fela ga tseno, go tla lebisiwa tlhokomelo e e kgethegileng mo mathateng a basha ba lebanang le one le kafa ba ka dirisanang le one ka gone. Ba tla kgothadiwa ke motshameko wa motlha wa segompieno wa setlhogo se se reng Basha Ba Ba Gakologelwang Mmopi wa Bone Gone Jaanong.

Ka Matlhatso kgangkgolo ya thulaganyo e tla bo e le boperofeti jwa ga Jesu kaga metlha ya bofelo mme bogolo jang mafoko ano a gagwe: “Me gauchwane, moragō ga sepitla sa metlha euō, letsatsi le tla hihala.” (Mathaio 24:29) O tla rata go utlwa tlhaloso ya gore sepitla seo se tla diragala leng. Ka Matlhatso thulaganyo gape e tla sekaseka rekoto ya Basupi ba ga Jehofa mo metlheng ya gompieno mme e bontshe gore ba fitlheletse eng.

Ka Sontaga motshameko o mongwe, wa setlhogo se se reng O Se Ka Wa Tsietsega kana Wa Sotla Modimo, o tla bua ka kgwetlho e e lebaneng bothokgami jwa Mokeresete ka ntlha ya dibidio tse di ratwang ke ba le bantsi le mmino. Puo ya phatlalatsa thapama e tla bo e na le etlhogo se se reng “Thuto E E Nang Le Mosola mo Metlheng Ya Rona E E Kotsi” Thulaganyo e tla konela ka kgothatso eno “Nna O Ntse O Tshwere Thuto ya Bomodimo.”

Kwantle ga pelaelo, o tla solegelwa molemo fa o nna gone malatsi otlhe a mane! O lalediwa ka lorato gore o nne gone. Gore o bone lefelo le le gaufiufi le fa gaeno, ikopanye le Holo ya Bogosi ya Basupi ba ga Jehofa e e mo lefelong la lona kana o kwalele bagatisi ba makasine ono.