Ke ka Ntlhayang Fa O Tlhoka go Nna Teng kwa Dipokanong tsa Bokeresete

ROSARIO, yo o nnang kwa Amerika Borwa, o ne a itumelela go ithuta Bibela le Elizabeth ka dikgwedi di le dintsi. Go ne ga itumedisa Rosario thata go ithuta ka Bogosi jwa Modimo le ka moo bo tla tlisang maemo a Paradaise mo lefatsheng ka gone. Lefa go ntse jalo, nako le nako fa Elizabeth a mo laletsa go tla kwa dipokanong kwa Holong ya Bogosi, o ne a gana. O ne a ikutlwa gore a ka nna a ithuta Bibela kwa gae mme a bo a diragatsa se e se bolelang, kwantle ga go ya kwa dipokanong tsa phuthego. A o kile wa ipotsa gore a tota dipokano tsa Bokeresete di go solegela molemo? Ke ka ntlha yang fa Modimo o rulaganya gore batho ba gagwe ba kopane mmogo?

Ereka Bakeresete ba lekgolo la ntlha la dingwaga ba ne ba farologane thata le batho ba ba neng ba ba dikologile, e ne e le selo sa botlhokwa gore ba itsalanye le batho ba ba siameng gore ba tle ba falole. Moaposetoloi Paulo o ne a kwalela phuthego nngwe ya Bakeresete ba pele jaana: ‘Lo ne lo le bana ba Modimo ba ba senang bogole mo gare ga losika lo lo kgopo lo lo logwadi, mme lo ne lwa nna mo go bone jaaka masedi mo lefatsheng.’ (Bafilipi 2:15) Bakeresete ba ne ba tshela bokete tota kwa Judea, ke gone ka moo Paulo a neng a ba kwalela jaana: “A re gopolaneñ re tlhotlheletsanyeñ mo loratoñ le mo ditihoñ tse di molemō; re se ka ra bakèla go phuthèga ga rona, yaka mokgwa oa bañwe, me re laelanè; me bogolo thata ka lo bōna motlha o atamèla.” (Bahebera 10:24, 25) Re tlhotlheletsana jang mo loratong le mo ditirong tse di molemo ka go kopana mmogo?

Ka Moo Bakeresete Ba ‘Lootsanang’ ka Teng

Lefoko la Segerika leo Paulo a le dirisitseng le le ranotsweng jaaka go ‘tlhotlheletsa’ totatota le raya go “lootsa.” Seane sa Bibela se tlhalosa ka moo Bakeresete ba ‘lootsanang’ ka gone fa e re: “Tshipi e lootsa tshipi; motho o lootsa yalo sehatlhōgō sa tsala ea gagwè.” (Diane 27:17; Moreri 10:10) Re tshwana le didirisiwa tse di tlhokang go loodiwa nako le nako. Ereka go supa lorato lwa rona mo go Jehofa mmogo le go dira diphetso go ikaegile ka tumelo ya rona go raya gore re se ka ra tshwana le lefatshe, re tshwanetse go tswelela re tsamaya ka tsela e e farologaneng le e batho ba bantsi ba tsamayang ka yone, jaaka go ne go ka tualo.

Go tswelela re ntse re tshotse tsela e e farologaneng go ka re dira gore re se ka ra tlhola re nna matlhagatlhaga mo go direng ditiro tse di molemo. Mme fa re na le ba bangwe ba ba ratang Jehofa, re a lootsana—re a tlhotlheletsanya mo loratong le mo ditirong tse di molemo. Kafa letlhakoreng le lengwe, fa re le nosi fela, go re dira gore re itseele kwa tlhogong thata. Megopolo ya boitshwaro jo bo maswe, ya bogagapa kana ya boeleele e ka tsena mo ditlhaloganyong tsa rona. “Eo o itomololañ o batla keleco ea gagwè ka esi, me a shakgalèle botlhale yotlhe yo bo itekanetseñ.” (Diane 18:1) Ke sone seo Paulo a neng a kwalelela phuthego ya kwa motsemogolong wa Thesalonia ka gore: “Laanañ, me lo agèlèlanè, hèla yaka lo nntse lo diha.”—1 Bathesalonia 5:11.

Fa Rosario a fetsa go ithuta dithuto tsa motheo tsa Bibela, o ne a santse a ikgogona mo go kopaneleng le phuthego. Ka jalo, ereka Elizabeth a ne a sa kgone go mo thusa go feta moo, o ne a tlogela go tlhola a mo etela. Morago ga dikgwedi di le mmalwa molebedi yo o etang o ne a etela Rosario mme a mmotsa jaana: “Lefa gone mongwe le mongwe fela yo o mo lapeng a ka bona dijo tse di monate ka go ya go ja kwa lebenkeleng la bojelo, ke eng seo botlhe ba ba leng mo lapeng ba ka se se boneng fa ba sa je mmogo mo gae?” Rosario one a araba ka go re: “Ba ka latlhegelwa ke go tsalana mmogo jaaka lelapa.” O ne a tlhaloganya gore seo se ne se raya eng mme a simolola go tla ka metlha kwa dipokanong. O ne a di fitlhela di le mosola fela thata mo e leng gore fa e sale go tloga ka nako eo o ne a nna gone mo e ka nnang mo pokanong nngwe le nngwe.

Fa o ntse o utlwa batho ba bangwe ba bontsha tumelo mo dilong tse le wena o di dumelang go a go kgothatsa gape o kgona le go bona ka moo tumelo e e ntseng jalo e fetotseng matshelo a bone ka gone. Paulo o ne a iponela seno go tswa mo go se se mo diragaletseng, mme o ne a kwalela phuthego ya kwa Roma ka go re: “Ke tlhologelecwe go lo bōna, gore ke lo abèlè nèō ñwe ea semōea, gore lo tlè lo nitamisiwè; ke go re, nna le lona mmōgō re gomotsègè mmōgō mo go lona, moñwe le moñwe ka tumelō ea eo moñwe, ea lona le ea me.” (Baroma 1:11, 12) Ebile tota, go ne go setse go fetile dingwaga di le dintsi thata pele ga fa Paulo a ne a etela Roma, mme ka nako ya fa a ne a kwala lokwalo lono, e ne e le legolegwa mo diatleng tsa Baroma. Mme fa a bona bakaulengwe ba ba neng ba tswa kwa Roma ba ba neng ba tsamaile dikilometara di feta 60 go tswa kwa motsemogolong oo go tla go mo kgatlhantsha, ‘Paulo o ne a leboga Modimo mme a nametsega.’—Ditihō 28:15.

Go Bona Dijo Tsa Semoya mo Dinakong Tse Di Tlhokofatsang

Ka nako ya fa Paulo a ne a le kwa ntlong ya kgolegelo kwa Roma, o ne a kwalela Bahebera ka gore ba se ka ba bakela go kopana mmogo. Seno se botlhokwa thata mo go rona ka jaana a ne a oketsa ka go re: “Me bogolo thata ka lo bōna motlha o atamèla.” (Bahebera 10:25) Basupi ba ga Jehofa ba ile ba bontsha ka go sa kgaotse go tswa mo Dikwalong gore ngwaga wa 1914 o ne o supa go simologa ga nako ya go fela ga lefatshe leno le gore “letsatsi ya tshekishō le ya tshenyègō ea baikepi” le atametse. (2 Petere 3:7) Go ya ka buka ya Bibela ya Tshenolō, ka nako ya fa Diabolo a ne a kobiwa kwa legodimong kwa tshimologong ya nako ya bofelo, o ne a tlala bogale thata mme a “tlhasèla ba ba setseñ . . . ba ba nntseñ ba bolokile ditaolō tsa Modimo, ba dumetse chupō ea ga Yesu.” (Tshenolō 12:7-17) Ka jalo, go boloka melao ya Modimo ga go motlhofo segolo bogolo gone jaanong; re tlhoka go kopana le badumedi ka rona ka moo re ka kgonang ka gone. Dipokano di tla re thusa go nonotsha tumelo ya rona le lorato la rona go Modimo gore re tle re kgone go emelana le ditlhaselo tsa ga Diabolo.

Go rata Modimo le go nna le tumelo ga go tshwane le dikago tse di nnelang ruri fa fela di setse di agilwe. Go na le moo, go tshwana le dilo tse di tshelang tse di golang ka bonya fa di ntse di otlwa mme di bo di swaba le go swa fa di sa bone dijo. Ke ka lebaka leo Jehofa a ntshang dijo tsa semoya ka metlha go nonotsha batho ba gagwe. Rotlhe re tlhoka dijo tse di ntseng jalo, mme ke kae koo re ka di bonang teng kwantle ga mo phuthegong ya Modimo le mo dipokanong tsa yone? Ga go na gope go sele.—Duteronome 32:2; Mathaio 4:4; 5:3.

Jesu o ne a botsa potso e e ka re thusang go bona ka moo a fepang phuthego ya Bokeresete ka gone. O ne a botsa jaana: “Ana, motlhanka eo o boikañō le eo o botlhale ea bo e le mañ, eo morèna a gagwè o mo tlhomileñ go laola ba ntlo ea gagwè, go ba abèla diyō ka dipaka tse e leñ cōna? Go segō motlhanka eo e tla reñ morèna oa gagwè a tla, a mo hitlhèle a nntse a diha yalo.” (Mathaio 24:45, 46) Ke mang yo Jesu a neng a mo tlhopha mo lekgolong la ntlha la dingwaga gore a fepe balatedi ba gagwe, mme ke mang yo o mo fitlhetseng ka boikanyego a ntse a ba fepa fa a boa ka thata ya Bogosi? Kwa ntle ga pelaelo, ga go na motho ope yo o kileng a tshela makgolo ano otlhe a dingwaga. Bosupi bo bontsha gore motlhanka yoo e ne e le phuthego ya Bakeresete e e tloditsweng ka moya, fela jaaka morafe wa Iseraele e ne e le motlhanka wa Modimo ka nako ya pele ga motlha wa Bokeresete. (Isaia 43:10) Ee, Jesu o ntsha dijo tsa semoya ka setlhopha seo sa lefatshe ka bophara sa Bakeresete ba ba tloditsweng ka moya, seo gompieno se tsamaisang dijo tsa semoya ka diphuthego tse di gaufi tsa Basupi ba ga Jehofa.

Tsela e Jesu a ntshang dijo tsa semoya ka yone e ne ya tlhalosiwa ka mo go oketsegileng ke moaposetoloi Paulo ka go re: “E rile a tlhatlogèla godimo, a gōgèla bogolègwa kgolegoñ, me a naea batho dinèō . . . A neèla bañwe gore ba nnè baaposetoloi; le ba bañwe gore ba nnè baperofeti; le ba bañwe barèri ba Mahoko a a Molemō; le ba bañwe badisa ba phuthègō, le baruti: Gore baitshepi ba itekanèdiwè, le gore ba dihè tihō ea tihèlō ea phuthègō, le gore ba agèlèlè mmele oa ga Keresete: go tlo go tsamaeè re hitlhè rotlhe mo boñweheleñ yoa tumèlō, le yoa kicō ea Morwa Modimo, go ea go hitlha boemoñ yoa monna eo o godileñ, le mo selekanyoñ sa go gola ga botlalō yoa ga Keresete.”—Baefesia 4:8, 11-13.

Totatota, e ne e le teng mo diphuthegong tse di gaufi—kwa dipokanong—koo ‘dineo tseno tsa batho’ di agang bakaulengwe. Ka sekai, kwa Antioka, “Yudase le Silase, ka le bōnè e le baperofeti, ba laea bakauleñwe ka mahoko a le mantsi, ba ba nitamisa.” (Ditihō 15:32) Dipolelo tse di neelwang ke banna ba ba agegileng sentle mo semoyeng gompieno, ka go tshwana di tla nonotsha tumelo ya rona gore e se ka ya swaba kana ya nna bokoa.

Go ka tswa go le boammaaruri gore re ile ra dira botswelelopele jo bontle ka ntlha ya go thusiwa ke leloko lengwe la phuthego lefa gone re ka tswa re ise re simolole go tla dipokanong. Bibela e bolela gore go na le nako ya fa o ‘tlhokang gore mongwe a go rute ditlhaka tsa tshimologo tsa mafoko a Modimo; . . . gape o tshwanetswe ke mashi, e seng ke dijo tse di loileng.’ (Bahebera 5:12) Mme lefa go ntse jalo, motho ga a kake a nnela ruri mo mashing. Dipokano tsa Bokeresete di nna di ntse di re fa dithuto tsa ka metlha tsa Bibela tse di diretsweng go boloka lorato lwa Modimo le tumelo mo go ene di ntse di le teng mmogo le go re neela thuso ya kafa re ka dirisang “kgakololō eotlhe ea Modimo” ka teng. (Ditihō 20:27) Seno ke sengwe se se fetang “mashi.” Bibela e tswelela ka go re: “Diyō tse di loileñ ke tsa banna ba ba godileñ, eboñ bōnè ba ea reñ ka ba nntse ba diha, maikutlō a bōnè a tlwaediwe go lemoga molemō le boshula.” (Bahebera 5:14) Kwa dipokanong go sekasekwa dilo di le dintsi tseo di ka tswang e se karolo ya thuto ya motheo ya thuto ya Bibela ya legae, jaaka go sekaseka temana ka temana ya boperofeti jwa Bibela jo bo botlhokwa le ditlhaloso tse di tseneletseng kwa teng tsa kafa re ka etsang Modimo mo matshelong a rona ka gone.

Dikgakololo tsa ga Jehofa—Di Ntse Jaaka Lentswe fa Morago ga Gago

Jehofa ka metlha o re gakolola gore re tshwanetse go nna batho ba mofuta ofe, ka go dirisa dithuto tse di ntseng jalo tsa phuthego. Dikgakololo tse di ntseng jalo di botlhokwa. Kwa ntle ga tsone go bonolo gore re nne bogagapa, boikgogomoso le bopelotshetla. Dikgakololo tse di tswang mo Dikwalong di tla re thusa gore re atlege mo go nneng le botsalano jo bo itumetseng le batho ba bangwe le Modimo ka boene. “Ke akanya mekgwa ea me, me ka bosetsa dinaō tsa me mo [dikgakololong] tsa gago” go ne ga dumela jalo mokwadi wa Pesalema 119:59.

Fa re ntse re ya kwa dipokanong tsa Bokeresete ka metlha, re kgona go iponela jaaka boperofeti jono jwa ga Jehofa jo bo mo lokwalong lono lwa ga Isaia bo diragadiwa ka botlalo: ‘Moruti yo Mogolo ga a kitla a tlhola a subega gope, me matlho a gago a tla bona Moruti wa gago yo Mogolo. Le ditsebe tsa gago di tla utlwa lefoko sehularong sa gago, le re: Tsela ke e, tsamaya mo go yone.’ Jehofa o tlhokometse botswelelopele jwa rona mme o re gakolola ka lorato fa re tsaya tsela e e sa siamang. (Isaia 30:20, 21; Bagalatia 6:1) Ebile o re naya thuso e e oketsegileng go feta eno.

Go Bona Moya O O Boitshepo go Tswa mo Phuthegong

Ka go nna gone ka metlha kwa dipokanong tsa Bokeresete le Basupi ba ga Jehofa, re nonotshiwa ke moya o o boitshepo wa Modimo, o o ntseng mo bathong ba gagwe. (1 Petere 4:14) Mo godimo ga moo, balebedi ba Bakeresete ba ba mo phuthegong ba tlhophilwe ka moya o o boitshepo. (Ditihō 20:28) Maatla ano a a dirang a a tswang kwa Modimong a na le tlhotlheletso e e nonofileng mo Mokereseteng. Bibela e bolela jana: “Louñō loa Mōea ke loratō, le boitumèlō, le kagishō, le bopelotelele, le bopelonomi, le molemō, le boikañō, le boiñōtlō, le boikgapō.” (Bagalatia 5:22, 23) Moya o o Boitshepo, o o dirang ka phuthego ya Modimo, o tla re thusa gape gore re tlhaloganye sentle seo Jehofa a se boloketseng ba ba mo ratang. Morago ga fa Paulo a sena go tlhalosa gore batho ba maemo a a kwa godimo ba tsamaiso eno ya dilo ga ba kake ba tlhaloganya maikaelelo a Modimo, o ne a kwala jaana: “Modimo o di senoletse rona ka Mōea.”—1 Bakorintha 2:8-10.

Kwantle ga dijo tsa semoya tse di nonotshang tumelo, phuthego e katisa bao ba ratang go nna le seabe mo tirong ya konokono ya phuthego. Yone ke efe?

Katiso E Re E Neelwang ke Phuthego

Phuthego ya Bokeresete ga se lefelo la go kopana mmogo koo batho ba itlosang bodutu fela teng gongwe ebile ba gakololana gore ba ka tshela jang matshelo a a botoka. Jesu o ne a laela phuthego gore e ise mafoko a a molemo a Bogosi kwa go bao ba mo lefifing la semoya. (Ditihō 1:8; 1 Petere 2:9) Go simologa ka letsatsi le e neng e tlhomiwa ka lone, ka Pentekosete ya 33 C.E., e ne e le phuthego ya bareri. (Ditihō 2:4) A o kile wa nna le maitemogelo a go leka go bolelela mongwe ka maikaelelo a ga Jehofa mme wa se ka wa atlega go mo dira gore a dumele tota se o se buang? Dipokano tsa phuthego di a go katisa gore o nne le bokgoni jwa go ruta. Ka go ithuta ka dikai tsa Bibela, re ithuta gore re dirise jang kgang e re tla dumalanang ka yone le motho gore re tle re ba bontshe mabaka, gore re ka dirisa jang Dikwalo jaaka motheo wa kgang e e nang le mabaka, le gore re ka thusa jang ba bangwe go ntsha mabaka ka go dirisa dipotso le ditshwantsho. Bokgoni jo bo ntseng jalo bo ka go thusa go nna le boitumelo jo o ka se kgoneng go bo tlhalosa jwa go thusa motho yo mongwe go tlhaloganya boammaaruri jwa Bibela.

Phuthego ya Bokeresete ke botshabelo jwa mmatota jwa semoya, mo lefatsheng leno le le sentsweng ke dintwa, le le tletseng ka boitshwaro jo bo maswe. Lefa gone e dirilwe ka batho ba ba sa itekanelang, ke lefelo la botshabelo la kagiso le lorato. Ka jalo, nna gone mo dipokanong tsotlhe tsa yone mme o iponele wena ka bowena boammaaruri jwa mafoko a ga mopesalema a a reng: “Bōnañ, go molemō yañ, go monate yañ, ha bana ba monna ba aga mmōgō . . . Yehofa o laoletse tshegōhacō gōna, eboñ botshelō ka bosakhutleñ.”—Pesalema 133:1, 3.