O A Amogelwa mo Kopanong ya Kgaolo ya “Poifo ya Bomodimo”!

EE, NAKO ya dikopano tsa kgaolo tsa 1994 tsa Basupi ba ga Jehofa e setse e atamela. Go tloga ka June 1994 go fitlha ka January 1995, kopano ya kgaolo ya malatsi a le mararo e tla tshwarwa mo ditoropokgolong di le dintsintsi go dikologa lefatshe—pele kwa Amerika Bokone, morago kwa Botlhaba le Bophirima jwa Yuropa, Asia, Bogare le Borwa jwa Amerika, Afrika, Australia, le kwa ditlhaketlhakeng tsa lewatle.

“Poifo ya Bomodimo”—a bo e le setlhogo se se tshikinyang mogopolo jang ne! Eno ga se poifo e e boitshegang e motho a nang le yone fa botshelo jwa gagwe bo le mo kotsing mme ke poifo ya Modimo, poifo e e dirang gore o nne le kagiso ya mogopolo le boitumelo. Seane sengwe sa Bibela se re: “Tuèlō ea boiñōtlō, le go boiha Yehofa ke khumō, le letlōtlō, le botshelō.” (Diane 22:4) Go boifa Modimo go ka tlisa jang “khumō, le letlōtlō, le botshelō”? Seno se tla phepafala fa setlhogo sa kopano se ntse se tlhalosiwa mo malatsing a le mararo ao mo go one go tla nnang le dipuo, dipuisano, dipontsho, le terama.

Moaposetoloi Paulo o ne a kwala gore re se ka ra ‘bakela go phuthega ga rona.’ (Bahebera 10:25) Basupi ba ga Jehofa ba tsaya kobamelo ya bone le go tla mo thutong ya phuthego gararo ka beke e le selo se se botlhokwa thata. Lefa go ntse jalo, kopano ya kgaolo ya ngwaga le ngwaga ke e e kgethegileng. Ba bonela pele go nna gone kwa kopanong ka boitumelo mme ba nna ba ntse ba bua ka yone dikgwedi fa e sena go feta. Go sa kgathalesege gore bodumedi jwa gago ke bofe, re go laletsa ka bopeloephepa go kopanela le bone kwa kopanong ya bone o bo o itumelele kutlwano e e bothitho ya Bokeresete le tshedimosetso e e botlhokwa ya semoya. Leloko lengwe la phuthego ya Basupi ba ga Jehofa mo lefelong la gago le tla itumela thata go go itsise gore kopano e e fa gaufi le wena e tla tshwarwa leng le kwa kae.