Go Ineela ka Boitumelo mo Taolong
“Loa tla loa nna ba ba utlwañ ka pelo.”—BAROMA 6:17.
1, 2. (a) Go bonala moya ofe mo lefatsheng gompieno, mme motswedi wa one ke ofe le gone o dira eng? (b) Batlhanka ba ba ineetseng ba ga Jehofa ba bontsha jang gore ba farologane?
“MŌEA o gompiyeno o dihañ mo baneñ ba ba [sa utlweng, NW]” o bonala ka tsela e e tshosang thata gompieno. Ke moya wa go itaola ka tsela e e feteletseng, o o tswang mo go Satane, “kgōsana ea thata ea loapi.” Moya ono, “loapi” lono, kana boikutlo jo bo anameng jwa bopelotshetlha le go tlhoka kutlo, o na le “thata,” kana taolo, mo bontsing jwa batho. Leno ke lengwe la mabaka a go bo lefatshe le le mo go se se bidiwang go twe ke bothata jwa taolo.—Baefesia 2:2.
2 Se se itumedisang ke gore, batlhanka ba ba ineetseng ba ga Jehofa gompieno ga ba tlatse makgwafo a bone a semoya ka “loapi,” kana moya wa botsuolodi. Ba itse gore “bogale yoa Modimo bo tla mo baneñ ba ba [sa utlweng, NW].” Moaposetoloi Paulo o oketsa ka go re: “Ke gōna, lo se ka loa amogana nabō.” (Baefesia 5:6, 7) Go na le moo, Bakeresete ba boammaaruri ba leka thata gore ba ‘tladiwe ka moya wa ga Jehofa,’ mme ba nwa “botlhale yo bo cwañ kwa godimo,” jo e leng gore “bo simologa bo le boitshèkō, hoñ bo nne kagishō, bo bonōlō, bo [bofefo go utlwa, NW].”—Baefesia 5:17, 18; Yakobe 3:17.
Go Iketleeletsa Go Ineela mo Bolaoding jwa ga Jehofa
3. Ke eng se se thusang gore re iketleeletse go ineela, mme hisitori e re ruta thuto efe e kgolo?
3 Selo sa konokono se se ka dirang gore motho a iketleeletse go ineela ke fa a amogela taolo e e tshwanelegang kafa molaong. Hisitori ya motho e bontsha gore batho ba ba ganang bolaodi jwa ga Jehofa ga ba bone boitumelo. Go bo gana jalo ga go a ka ga tlisetsa Adame le Efa boitumelo, lefa e le ene yo o ba tlhotlheleditseng gore ba tsuologe, Satane Diabolo. (Genesise 3:16-19) Mo boemong jwa gagwe jwa gone jaanong jo bo maswe, Satane o “tletse bogale” ka gonne o itse gore nako ya gagwe e khutshwane. (Tshenolō 12:12) E le gore batho, ee, lobopo lotlhe, lo bone boitumelo le kagiso go tlhokega gore lo amogele bolaodi jwa ga Jehofa jwa tshiamo.—Pesalema 103:19-22.
4. (a) Jehofa o batla gore batlhanka ba gagwe ba bontshe boineelo le kutlo tsa mofuta ofe? (b) Re tshwanetse ra dumela eng, mme mopesalema o tlhalosa seno jang?
4 Lefa go ntse jalo, ka ntlha ya dinonofo tsa gagwe tse di lekanetseng ka tsela e e gakgamatsang, Jehofa ga a kgotsofadiwe ke go utlwiwa fela mme go sa bontshiwe maikutlo ape. Ee ruri, thata yone o na le yone! Mme lefa go ntse jalo ga se mokgokgontshi. Ke Modimo yo o lorato, mme o batla gore dibopiwa tsa gagwe tse di botlhale di iketleeletse go mo obamela, di dira jalo ka lorato. O batla gore di ineele mo bolaoding jwa gagwe ka gonne di tlhophile ka pelo yotlhe gore di ipeye kafa tlase ga taolo ya gagwe e e siameng le e e tshwanelegang kafa molaong, di tlhomamisa gore go ka se ke go nne le sepe se se botoka go na le gore di mo utlwe ka bosakhutleng. Mofuta wa motho yo Jehofa a mmatlang mo lobopong lwa gagwe o na le maikutlo a a tshwanang le a mopesalema yo o neng a kwala a re: “Molaō oa ga Yehofa o itekanetse, o rudisa mōea: chupō ea ga Yehofa e tlhōmamō, e tlhalehisa ba ba sa tlhalehañ. Ditaeō tsa ga Yehofa di siame, di itumedisa pelo: taolō ea ga Yehofa e itshekile, e tsenya matlhō lesedi. Poihō ea ga Yehofa e ntlè, e nntse ka bosakhutleñ: dikatlholō tsa ga Yehofa di boamarure, di siame hèla gotlhe.” (Pesalema 19:7-9) Go ikanya ka pelo yotlhe gore bolaodi jwa ga Jehofa bo tshwanetse e bile bo siame—ke gone kafa re tshwanetseng ra ikutlwa ka gone fa re batla go tshela mo lefatsheng la ga Jehofa le lesha.
Go Ineela ka Boitumelo mo Kgosing ya Rona
5. Jesu o ne a duelelwa kutlo ya gagwe jang, mme re bolela eng ka go rata?
5 Keresete Jesu ka boene ke sekao se sentle thata sa go ineela mo go Rraagwe wa selegodimo. Fa re bala re utlwa gore o ne “a ikokobetsa, a ineèla hèla le mo loshuñ, eboñ e e leñ losho loa mokgōrō.” Paulo o oketsa jaana: “Ke gōna ka mouō Modimo le ōna o mo godisitseñ thata, me oa mo naea yeōna leina ye le hetañ maina aotlhe; gore mañōlè aotlhe a khubamè ka leina ya ga Yesu, a dilō tse di kwa legodimoñ, le a dilō tse di mo lehatshiñ, le a dilō tse di kwa tlhatse ga lehatshe, le gore diteme cotlhe di bolèlè ha Yesu Keresete e le Morèna, kgalalecoñ ea Modimo Rara.” (Bafilipi 2:8-11) Ee, re khubama ka mangole ka boitumelo fa pele ga Moeteledipele le Kgosi ya rona e e busang, Keresete Jesu.—Mathaio 23:10.
6. Jesu o ile a itshupa jang gore ke mosupi le moeteledipele wa ditlhopha tsa merafe, mme “pushō” ya gagwe e tla tswelela pele jang morago ga sepitla se segolo?
6 Jehofa o ne a perofesa jaana kaga Keresete e le Moeteledipele wa rona: “Bōna, ke mo ntshitse gore a nnè moshupi mo dichabeñ, gore a nnè mogogi le molaodi mo dichabeñ.” (Isaia 55:4) Jesu o itshupile e le “moshupi eo o boikañō le boamarure” wa ga Rraagwe mo bathong ba merafe yotlhe ka bodihedi jwa gagwe jwa fa a ne a le mo lefatsheng le ka fa a neng a kaela tiro ya go rera mo lefatsheng lotlhe ka gone a le kwa legodimong morago ga gore a swe a bo a tsosiwe. (Tshenolō 3:14; Mathaio 28:18-20) Ditlhopha tseo tsa merafe jaanong di na le maloko mo dipalong tse di ntseng di gola tsa “boidiidi yo bogolo,” jo bo tla falolang ‘sepitla se segolo’ Keresete a eteletse pele. (Tshenolō 7:9, 14) Mme lefa go ntse jalo boeteledipele jwa ga Jesu ga bo felele foo. “Pushō” ya gagwe e tla tsaya lobaka lwa dingwaga di le sekete. Mo bathong ba ba utlwang, o tla tshela go dumelana le leina la gagwe la “Kgakgamaco, Mogakolodi, Modimo Mothata, Rara oa Bosakhutleñ, Kgōsana ea Kagishō.”—Isaia 9:6, 7; Tshenolō 20:6.
7. Fa re batla gore Keresete Jesu a re gogele kwa ‘metsweding ya metsi a botshelo,’ re tshwanetse go dira eng kwantle ga go diega, mme ke eng se se tla dirang gore re ratwe ke Jesu le Jehofa?
7 Fa re batla go solegelwa molemo ke ‘metswedi ya metsi a botshelo’ a Kwana, Keresete Jesu, a gogelang batho ba ba dipelo tse di siameng kwa go one, re tshwanetse gore kwantle ga tiego epe re supe ka tsela e re dirang dilo ka yone gore re ineetse ka boitumelo kafa tlase ga taolo ya gagwe jaaka Kgosi. (Tshenolō 7:17; 22:1, 2; bapisa Pesalema 2:12.) Jesu o ne a bolela jaana: “Ha lo nthata, lo tla tshegetsa ditaolō tsa me. Eo o nañ le ditaolō tsa me, a di tshegetsa, ke èna eo o nthatañ: me eo o nthatañ, o tla ratwa ke Rrè, le nna ke tla mo rata.” (Yohane 14:15, 21) A o batla go ratiwa ke Jesu le Rraagwe? Ineele he mo taolong ya bone.
Balebedi Ba Utlwa ka Boitumelo
8, 9. (a) Keresete o ntshitse eng gore se agelele phuthego, mme banna bano ba tshwanetse go nna dikao mo letsomaneng jang? (b) Go ineela ga balebedi ba Bakeresete go tshwantshiwa jang mo bukeng ya Tshenolō, mme ba tshwanetse ba batla ‘pelo e e utlwang’ jang fa ba tshwere dikgang tsa boatlhodi?
8 “Phuthègō e ineetse mo go Keresete.” Jaaka Molebedi wa yone, o ntshitse “banna bao eleng dimpho,” (NW) gore ba “agèlèlè” phuthego. (Baefesia 4:8, 11, 12; 5:24) Banna bano ba ba godileng semoyeng ba bolelelwa gore ba ‘dise letsomane la Modimo le ba le tlhokometseng,’ e se “ka mokgwa oa go rèna mo go ba lo ba chwaecweñ, ha e se ka go itiha dikaō mo lecomaneñ.” (1 Petere 5:1-3) Letsomane ke la ga Jehofa, mme Keresete ke ‘modisa wa lone yo o molemo.’ (Yohane 10:14) E re ka balebedi ba solofela ka tshwanelo gore dinku tse Jehofa le Keresete a di tsentseng mo tlhokomelong ya bone di iketleeletse go dirisana le bone sentle, bone ka bosi ba tshwanetse ba nna dikao tse di molemo tsa go ineela.—Ditihō 20:28.
9 Mo lekgolong la ntlha la dingwaga, go ne go bolelwa ka tsela ya tshwantshetso gore balebedi ba ba tloditsweng ba “mo” seatleng sa ga Keresete se segolo, go bontsha gore ba ineetse mo go ene jaaka Tlhogo ya phuthego. (Tshenolō 1:16, 20; 2:1) Go ntse fela jalo le gompieno, balebedi ba ba mo diphuthegong tsa Basupi ba ga Jehofa ba tshwanetse ba ineela mo kaelong ya ga Keresete le go ‘ikokobetsa fa tlase ga letsogo le le nonofileng la Modimo.’ (1 Petere 5:6) Fa ba kopiwa gore ba tshware dikgang tsa boatlhodi, ba tshwanetse gore jaaka Solomone mo dingwageng tsa fa a ne a ikanyega, ba rapele Jehofa jaana: “Ke gōna, naea motlhanka oa gago pelo e e [utlwang, NW] gore a tlè a atlholè chaba ea gago, gore ke harologanyè molemō le boshula.” (1 Dikgosi 3:9) Pelo e e utlwang e tla tlhotlheletsa mogolwane gore a bone dilo ka tsela e Jehofa le Keresete Jesu ba di lebang ka yone gore tshwetso e e dirwang mo lefatsheng e tshwane thata kafa go ka kgonegang ka gone le e e dirwang kwa legodimong.—Mathaio 18:18-20.
10. Balebedi botlhe ba tshwanetse ba leka go etsa Jesu jang ka tsela e a neng a tshwara dinku ka yone?
10 Balebedi ba ba etang le bagolwane ba phuthego le bone ba tla leka go etsa sekao sa ga Keresete sa kafa a neng a tshwara dinku ka gone. Ka go sa tshwane le Bafarasai, Jesu o ne a se ka a baya melao e mentsi e go neng go le thata go e latela. (Mathaio 23:2-11) O ne a raya ba sekadinku a re: “Tlañ kwano go nna lotlhe ba lo lapileñ, ba lo imèlwañ, me ke tla lo lapolosa. Ipeleseñ yokwe oa me, lo ithutè ga me; gonne ke bonōlō le boiñōtlō mo peduñ: me lo tla bōnèla meōea ea lona tapologō. Gonne yokwe oa me o monate, le morwalō oa me o motlhoho.” (Mathaio 11:28-30) Lefa go le boammaaruri gore Mokeresete mongwe le mongwe o tshwanetse go “ithwalèla morwalō oa gagwè,” balebedi ba tshwanetse go gakologelwa sekao sa ga Jesu mme ba thuse bakaulengwe ba bone gore ba utlwe morwalo wa boikarabelo jwa bone jwa Bokeresete o le “monate,” o le “motlhoho,” ebile go itumedisa go o rwala.—Bagalatia 6:5.
Go Ineela ka Tsela ya Puso ya Modimo
11. (a) Motho a ka tlotla botlhogo jang mme a sa dire dilo ka tsela ya puso ya Modimo tota? Tshwantsha. (b) Go nna wa puso ya Modimo tota go kaya eng?
11 Puso ya Modimo ke puso e Modimo e leng kgosi mo go yone. E akaretsa molaomotheo wa botlhogo o o mo go 1 Bakorintha 11:3. Mme e kaya se sentsi go feta moo. Motho a ka nna a lebega a tlotla botlhogo, mme lefa go ntse jalo a sa dire dilo ka tsela ya puso ya Modimo ka botlalo. Seno se ka direga jang? Go tshwantsha, temokerasi ke puso ya batho ka batho, mme motemokeratiki o ile a tlhalosiwa e le “motho yo o dumelang mo mekgeleng ya temokerasi.” Motho mongwe a ka nna a iphaka gore ke motemokeratiki, a tsenelela ditlhopho, e bile e le rapolotiki yo o tlhagafetseng. Mme lefa go ntse jalo, fa e le gore ka tsela e a itshwarang ka yone mo dilong tse dingwe, o tseela kwa tlase moya wa temokerasi le melaometheo yotlhe ya yone, a go ka twe ke motemokeratiki tota? Ka tsela e e tshwanang, gore motho a nne wa puso ya Modimo tota, o tshwanetse a dira se se fetang go ineela mo botlhogong ka leina fela. O tshwanetse a etsa ditsela le dinonofo tsa ga Jehofa. Tota o tshwanetse gore a laolwe ke Jehofa ka ditsela tsotlhe. Mme e re ka Jehofa a neetse Morwawe taolo e e feletseng, go nna wa puso ya Modimo gape go kaya gore a etse Jesu.
12, 13. (a) Tota go nna wa puso ya Modimo go akaretsa eng? (b) A go ineela ka tsela ya puso ya Modimo go akaretsa go obamela melao e mentsi? Tshwantsha.
12 Gakologelwa, Jehofa o batla gore re iketleeletse go ineela mo go ene re tlhotlhelediwa ke lorato. Ke yone tsela eo a laolang lobopo ka yone. Ke lorato ka bolone. (1 Yohane 4:8) Keresete Jesu ke “marañ a kgalalèlō ea ōna, le sechwanō sebele sa bomodimo yoa ōna.” (Bahebera 1:3) O batla gore barutwa ba gagwe ba boammaaruri ba ratane. (Yohane 15:17) Ka jalo go nna wa puso ya Modimo ga go akaretse go ineela fela gape go akaretsa go nna lorato. Kgang eno e ka sobokanngwa jaana: Puso ya Modimo ke puso e Modimo e leng kgosi mo go yone; Modimo ke lorato; ka jalo puso ya Modimo ke puso e go renang lorato mo go yone.
13 Mogolwane mongwe a ka nna a akanya gore bakaulengwe ba tshwanetse gore ba obamele mefuta yotlhe ya melao e le gore e nne ba puso ya Modimo. Bagolwane bangwe ba ile ba tsaya dikakantsho tse di ntshiwang kgapetsakgapetsa ke “motlhanka eo o boikañō le eo o botlhale” ba di fetola melao. (Mathaio 24:45) Ka sekai, go kile ga akantshiwa gore go ka nna molemo gore motho a se ka a nna mo setulong se le sengwe fela ka metlha kwa Holong ya Bogosi e le gore a tle a itse bakaulengwe ba ba mo phuthegong motlhofo. Seno e ne e le kakantsho fela e e dirang, e seng molao o o gagametseng. Mme lefa go ntse jalo bagolwane bangwe ba ka nna ba e fetola molao mme ba akanya gore ba ba sa o lateleng ga se ba puso ya Modimo. Mme lefa go ntse jalo, go ka nna ga bo go na le mabaka a le mantsi a a utlwalang a go bo mokaulengwe kana kgaitsadi mongwe a ka batla go nna mo lefelong lengwe le le rileng. Fa mogolwane a sa akanyetse dilo tse di ntseng jalo ka lorato, a ene ka namana ruri ke wa puso ya Modimo? Gore lo nne ba puso ya Modimo, “gotlhe mo lo go dihañ, a go dihwè ka loratō.”—1 Bakorintha 16:14.
Go Direla ka Boitumelo
14, 15. (a) Mogolwane mongwe o ka dira jang gore bakaulengwe bangwe le bokgaitsadi ba se ka ba itumela fa ba direla Jehofa, mme ke ka ntlha yang fa seno se tla bo se sa bontshe gore ke wa puso ya Modimo? (b) Jesu o ne a bontsha jang gore o anaanela lorato lo re lo bontshang ka go mo direla, go na le selekanyo se re se dirang? (c) Bagolwane ba tshwanetse go akanyetsa eng?
14 Go nna wa puso ya Modimo gape go kaya go direla Jehofa ka boitumelo. Jehofa ke “Modimo o o itumetseng.” (1 Timotheo 1:11, NW) O batla gore bao ba mo obamelang ba mo direle ka boitumelo. Bao ba ngaparelang melao thata ba tshwanetse go gakologelwa gore mongwe wa melawana e Baiseraele ba neng ba tshwanetse ‘go tlhokomela go e dira’ o ne o re: “U tla itumèla ha pele ga Yehofa Modimo oa gago mo go cotlhe tse u di baeañ seatla.” (Duteronome 12:1, 18) Sengwe le sengwe se re se dirang mo tirelong ya ga Jehofa se tshwanetse sa itumedisa, e seng go nna morwalo. Balebedi ba ka dira mo gontsi go dira gore bakaulengwe ba ikutlwe ba itumelela go dira kafa ba kgonang ka teng fa ba ntse ba direla Jehofa. Go fapaana le seo, fa bagolwane ba se kelotlhoko, ba ka dira gore bangwe ba bakaulengwe ba se ka ba itumela. Ka sekai, fa ba bapisa batho, ba akgola ba ba tshwereng kana ba fetile palokakaretso ya diura tse phuthego e di dirisitseng mo go neeleng bosupi mme ka jalo go raya gore ba kgala ba ba sa e fitlhelelang, batho ba ba ka tswang ba nnile le mabaka a a utlwalang a go bo ba begile nako e e kwa tlase thata ba tla ikutlwa jang? A seno se ka se ke se ba dire gore ba ikutlwe ba le molato thata go sa tlhokege mme sa dira gore ba se ka ba tlhola ba itumela?
15 Palonyana ya diura tse bangwe ba ka di dirisang ba neela bosupi phatlalatsa ba ka nna ba bo ba e dirile ka maiteko a magolo go feta a bao ba dirisitseng diura tse dintsi ba rera, bangwe e le ka ntlha ya dingwaga tsa bosha, botsogo jo bo botoka, le maemo a mangwe. Bagolwane ga ba a tshwanela go ba atlhola mo ntlheng eno. Eleruri, Rara o neetse Jesu “thata ea go diha katlholō.” (Yohane 5:27) A Jesu o ne a nyatsa motlholagadi wa mohumanegi ka gonne moneelo wa gagwe o ne o le kwa tlase ga wa bontsi jwa batho? Nnyaa, o ne a lemoga gore tota madinyana ao a mabedi a ne a kaya eng mo go ene. E ne e le “gotlhe mo a nañ nagō, eboñ gotlhe mo o tshelañ ka gōna.” A ne a supa gore o rata Jehofa tota! (Mareko 12:41-44) A bagolwane ga ba a tshwanela go lemoga fela jalo maiteko a a dirwang ka lorato a bao gotlhe mo ba nang le gone go leng kwa tlase ka palo go “palokakaretso”? Fa go lejwa lorato lwa bone go Jehofa, maiteko ao a ka nna a bo a feta a bontsi jwa batho kgakala!
16. (a) Fa balebedi ba umaka dipalo mo dipuong tsa bone, ke ka ntlha yang fa ba tlhoka temogo le go lekalekanya dilo sentle? (b) Bakaulengwe ba ka thusiwa jang botoka gore ba oketse tirelo ya bone?
16 A jaanong mafoko ano a tshwanetse a dirwa “molao” o mosha wa gore dipalo—lefa e le palokakaretso—ga di a tshwanela go umakiwa le ka motlha? Eseng jalo ruri! Ntlha ke gore balebedi ba tshwanetse go nna tekatekano fa ba kgothatsa bakaulengwe gore ba atolose bodihedi jwa bone le fa ba ba thusa gore ba dire se ba ka se kgonang ka boitumelo. (Bagalatia 6:4) Mo setshwantshong sa ga Jesu sa ditalenta, morena wa batlhanka o ne a ba neela dilwana tsa gagwe “moñwe le moñwe a neèlwa kaha nonohoñ ea gagwè.” (Mathaio 25:14, 15) Bagolwane le bone ba tshwanetse go akanyetsa dilo tse mmoledi mongwe le mongwe wa Bogosi a ka di kgonang. Seno se tlhoka temogo. Gone go ka direga gore bangwe tota ba bo ba tlhoka go kgothadiwa gore ba dire mo go oketsegileng. Ba ka nna ba anaanela go thusiwa gore ba rulaganye ditiro tsa bone botoka. Lefa go ntse jalo, fa ba ka thusiwa go dira se ba ka se kgonang ka boitumelo, boitumelo joo bo ka nna jwa ba nonotsha gore ba atolose tiro ya bone ya Bokeresete fa go kgonega.—Nehemia 8:10; Pesalema 59:16; Yeremia 20:9.
Kagiso E E Tswang mo go Ineeleng ka Boitumelo
17, 18. (a) Go ineela ka boitumelo go ka re tlisetsa kagiso le tshiamo jang? (b) Fa tota re utlwa ditaolo tsa Modimo, re ka nna le eng?
17 Go ineela ka boitumelo mo bolaoding jo bo tshwanelegang kafa molaong jwa ga Jehofa go re leretse kagiso tota. Mopesalema o ne a rapela Jehofa jaana: “Ba ba ratañ molaō oa gago ba na le kagishō e kgolo; me ga ba na go kgopiwa gopè.” (Pesalema 119:165) Fa re utlwa molao wa Modimo, re solegelwa molemo ka borona. Jehofa o ne a bolelela Iseraele jaana: “Go bua yana Yehofa, Morekolodi oa gago, Moitshepi oa Iseraela, a re, Ke Nna Yehofa, Modimo oa gago, eo ke gu rutañ go itemohalèla, eo ke gu gōgañ mo tseleñ e u chwanetseñ go tsamaea ka eōna. A bo u ka bo u reeditse ditaolō tsa me, kagishō ea gago e ka bo ne ne hano e nntse yaka noka, le tshiamō ea gago yaka dintèlō tsa lewatlè.”—Isaia 48:17, 18.
18 Setlhabelo sa ga Keresete sa thekololo se dira gore re agisane le Modimo. (2 Bakorintha 5:18, 19) Fa re na le tumelo mo mading a a rekololang a ga Keresete mme re leka thata gore re lwantshe makoa a rona le go dira thato ya Modimo, ga re tlhole re ikutlwa re le molato. (1 Yohane 3:19-23) Tumelo e e ntseng jalo, e tshegediwa ke ditiro, e dira gore re nne le boemo jo bo siameng le Jehofa le tsholofelo e e molemo ya go falola ‘sepitla se segolo’ le go tshelela ruri mo lefatsheng le lesha la ga Jehofa. (Tshenolō 7:14-17; Yohane 3:36; Yakobe 2:22, 23) Re ka diragalelwa ke seno sotlhe ‘fa fela re ka reetsa ditaolo tsa Modimo tota.’
19. Go itumela ga rona gone jaanong le tsholofelo ya rona ya botshelo jo bo sa khutleng go ikaegile ka eng, mme Dafide o ne a tlhalosa jang se re se dumelang go tswa pelong?
19 Ee, boitumelo jwa rona gone jaanong le tsholofelo ya rona ya go tshelela ruri mo lefatsheng la paradaise di ikaegile ka gore re ineele mo taolong ya ga Jehofa jaaka Morena Molaodi wa lobopo lotlhe. E kete ka metlha re ka nna le maikutlo a a tshwanang le a ga Dafide, yo o neng a re: “Bogolo ke yoa gago, Yehofa, le thata, le kgalalèlō, le phenyo, le borèna: gonne cotlhe tse di kwa legodimoñ le tse di mo lehatshiñ ke tsa gago; bogosi ke yoa gago, Yehofa, me u goledicwe u le tlhōgō mo godimo ga cotlhe. Me ke gōna yana, Modimo oa rona, rea gu leboga, re baka leina ya gago ye le galalèlañ.”—1 Ditihalō 29:11, 13.
Dintlha tse Re Tshwanetseng go Di Gakologelwa
◻ Jehofa o batla gore batlhanka ba gagwe ba bontshe boineelo le kutlo tse di ntseng jang?
◻ Jesu o ne a duelelwa kutlo ya gagwe jang, mme re tshwanetse go supa eng ka tsela e re dirang dilo ka yone?
◻ Balebedi botlhe ba tshwanetse ba etsa Jesu jang ka tsela e a neng a tshwara dinku ka yone?
◻ Go nna wa puso ya Modimo go akaretsa eng?
◻ Go ineela ka boitumelo go re tlisetsa masego afe?
[Setshwantsho mo go tsebe 24]
Bagolwane ba kgothaletsa letsomane go dira sengwe le sengwe se ba ka se kgonang ka boitumelo
[Setshwantsho mo go tsebe 26]
Jehofa o itumelela bao ba mo obamelang go tswa mo pelong