Go Boga ga Batho—A Go Tla Tsamaya Go Fela?

DILO tse di tsitsibanyang mmele tse di neng di bonwa morago ga gore bomo e thunye kwa mmarakeng o o neng o tletse batho kwa Sarajevo; go ganyaolwa ga batho mo go setlhogo le thubakanyo kwa Rwanda; bana ba ba bolawang ke tlala ba lelela dijo kwa Somalia; malapa a a mo tlalelong a bala ditshenyegelo tsa one morago ga thoromo ya lefatshe kwa Los Angeles; batho ba ba feletsweng ke tshepo ba ba amilweng ke morwalela fa o sena go senya kwa Bangladesh. Re bona batho ba boga jalo malatsi otlhe mo thelebisheneng kana mo dimakasineng le mo dipampiring tsa dikgang.

Phelelo e e hutsafatsang ya go boga ga batho ke gore go dira gore batho ba bangwe ba se ka ba tlhola ba dumela mo Modimong. “Go nna gone ga bosula ka metlha go ile ga kgoreletsa thata gore motho a nne le tumelo,” go bolela jalo mafoko mangwe a a gatisitsweng ke setlhopha sa bodumedi sa Sejuta kwa United States. Bakwadi bano ba ne ba bolela ka dintsho tsa batho ba ba swetseng kwa dikampeng tsa pogisetso tsa Bonazi tse di jaaka Auschwitz le tse di bakilweng ke dibomo tse di jaaka e e neng ya thunya kwa Hiroshima. “Potso e e reng Modimo o o tshiamo le o o maatla o ka letlelela jang gore batho ba le bantsi ba ba senang molato ba bolawe, e tshwenya segakolodi sa modumedi ope fela e bile e a gakgamatsa,” go bolela jalo bakwadi bano.

Se se hutsafatsang ke gore dipego tsa masetla-pelo tse di sa feleng di ka nna tsa kgwaralatsa maikutlo a batho. Batho ba le bantsi ga ba tlhole ba amega fa ba bangwe ba boga, fa fela ditsala tsa bone le ba losika ba sa amiwe ke seo.

Lefa go ntse jalo, lebaka la go bo re kgona go utlwela ba bangwe botlhoko, segolo jang baratiwa ba rona, le tshwanetse la re bolelela sengwe ka Modiri wa rona. Baebele e bolela gore motho o ne a bopiwa “mo setshwanong sa Modimo” le “ka fa setshwanong sa [one].” (Genesise 1:26, 27) Seno ga se bolele gore batho ba tshwana le Modimo ka tebego. Nnyaa, ka gonne Jesu Keresete o ne a tlhalosa gore “Modimo ke Mowa,” e bile “mowa ga o na nama le marapo.” (Johane 4:24; Luke 24:39) Go bo re dirilwe mo tshwanong ya Modimo go bolela gore re ka kgona go bontsha dinonofo tse di tshwanang le tsa Modimo. Ka gone, e re ka batho fela ba ka utlwela ba ba bogang botlhoko, re tshwanetse go fetsa ka gore Mmopi wa batho, e bong Jehofa Modimo, o kutlwelobotlhoko le gore o utlwela batho ba gagwe ba ba bogang botlhoko.—Bapisa Luke 11:13.

Tsela e nngwe e Modimo a bontshitseng ka yone gore o na le kutlwelobotlhoko ke ka go kwalela batho a ba tlhalosetsa lebaka la go bo ba boga jaana. O dirile seno mo Lefokong la gagwe, Baebele. Baebele e bontsha sentle gore Modimo o ne a bopetse motho gore a ipelele botshelo, e seng gore a boge. (Genesise 2:7-9) Gape e bontsha gore batho ba ntlha ba ne ba iteretse pogo ka gore ba gane puso e e siameng ya Modimo.—Duteronome 32:4, 5; Baroma 5:12.

Go sa kgathalesege seno, Modimo o santse o utlwela batho ba ba bogang botlhoko. Seno se bontshitswe sentle ke go bo a ne a solofetsa gore o tla fedisa go boga ga batho. “Bonang, boago jwa Modimo bo mo bathong, o tlaa aga nabo, ba tlaa nna batho ba one, le Modimo ka osi o tlaa nna nabo, o tlaa nna Modimo wa bone. O tlaa phimola dikeledi tsotlhe mo matlhong a bone; ga go ketla go tlhola go le loso; le gone ga go ketla go tlhola go le bohutsana, le fa e le selelo, le fa e le botlhoko; dilo tsa pele di fetetse ruri.”—Tshenolo 21:3, 4; bona gape le Isaia 25:8; 65:17-25; Baroma 8:19-21.

Ditsholofelo tseno tse di molemolemo di supa gore Modimo o amega ka tsela e batho ba bogang ka yone le gore o iketleeditse go e fedisa. Mme totatota ke eng se se bakileng gore batho ba boge kwa tshimologong, le gone ke ka ntlha yang fa Modimo a go letleletse go tswelela pele gore go fitlhe le mo motlheng wa rona?

[Motswedi wa Setshwantsho mo go tsebe 2]

Cover and page 32: Alexandra Boulat/Sipa Press

[Motswedi wa Setshwantsho mo go tsebe 3]

Kevin Frayer/Sipa Press