Pego Ya Baboledi Ba Bogosi
Go Neela Bosupi go Nna le Matswela Kwa Gae le Kwa Sekolong
BOTSHELO jwa Mokeresete bo akaretsa go direla batho ba bangwe molemo, bogolo jang ka go ba abela mafoko a a molemo a Bogosi jwa Modimo. Diane 3:27 ya re: “Ba ba tshwanetsweng ke go direlwa molemo, o se ka wa gana ka one, fa go le mo thateng ya seatla sa gago go o dira.” Mosupi mongwe yo mmotlana kwa Argentina yo o neng a le mo ngwageng wa gagwe wa boraro a le mo sekolong se segolwane o ne a batla go abela tsala ya gagwe ya kwa sekolong mafoko a a molemo a Bogosi. Go dira jalo go ne ga nna le matswela a magolo thata.
Letsatsi lengwe Mosupi yono yo mmotlana o ne a bolelela tsala ya gagwe gore ga se madumedi otlhe a a siameng. Fa lekawana leno le ne le araba ka gore ga le dire sepe se se bosula, Mosupi o ne a re: “Mme le gone ga o direle Modimo sepe.” Seno se ne sa dira gore mosha yono a akanye. Moragonyana Mosupi o ne a tlhalosa gore eno ke metlha ya bofelo le gore fa motho a batla go amogelwa ke Modimo, o tshwanetse a nna le kitso e e tlhomameng ya Baebele a bo a e dirisa. Tsala ya gagwe ya kwa sekolong e ne ya dumela. A mme ba lelapa la gaabo ba ne ba tla mo letla gore a ithute Baebele? Gore a neele tsala ya gagwe sengwe se a ka akanyang ka sone, Mosupi yono o ne a mo kopa gore a bale buka ya O Ka Tshelela Ruri mo Lefatsheng la Paradaise.
Go ne ga feta nako, mme tsala ya tlogela sekolo. Go ne ga se ka ga utlwalelwa sepe ka ene ka lobaka lo lo fetang ngwaga. Go tswa foo letsatsi lengwe Mosupi yo mmotlana yono o ne a gakgamalela go amogela mogala o o tswang kwa tsaleng ya gagwe a mmolelela gore o ne a bona gore boperofeti jwa Baebele ruri bo a diragadiwa. Gone fela foo Mosupi o ne a rulaganyetsa go ithuta Baebele le ene.
Fa a ya kwa legaeng la gaabo mosha yono yo ba kileng ba tsena sekolo mmogo, o ne a lemoga gore batsadi ba tsala ya gagwe ba ne ba tshwenyegile thata ka gore morwa wa bone o ne a itsenya mo go eng. Tota le monnawe tsala ya gagwe wa mosimane o ne a akanya gore mogolowe o simolola go ja ditlhare ka meno. Ka jalo batsadi ba ne ba dira gore monnawe a nne a reetse fa ba tla go ithuta gape. Morago ga thuto, lekawana leno le ne la bolelela batsadi ba lone le putlaputla dikeledi gore tota mogolowe o ne a sa tsenwe, ke fa mmaabone a tla goa a re, “Ke ntse ke na le bothata bo le bongwe fela, jaanong a mabedi!”
Ka jalo, fa ba ithuta gape ene mmè o ne a nna teng a ba a tshwanelwa ke go dumela gore basimane bano ba ne ba sa tsenwe. Moragonyana go ne ga rulaganngwa gore ene le monna wa gagwe le bone ba rutiwe Baebele. Go ise go ye kae lelapa lotlhe le ne la simolola go nna gone kwa dipokanong tsa phuthego kwa Holong ya Bogosi. Kgabagare, rremogoloabone le mmemogoloabone le bone ba ne ba simolola go ithuta Baebele le go ya kwa dipokanong. Fa e sale ka nako eo, lekawana la ntlha le ne la kolobediwa. O ne a nyala, mme ene le mosadi wa gagwe ke baboledi ba ba tlhagafetseng.
Mo godimo ga moo, ka go neela bosupi jo e seng jwa ka tlwaelo kwa sekolong, Mosupi yo mmotlana yono o thusitse batho ba bangwe ba le babedi ba a neng a tsena sekolo le bone mmogo le mmaagwe mongwe wa bone le kgaitsadie gore ba simolole go ithuta Baebele. Fa ba feletse, batho ba le 11 ba ithutile boammaaruri jwa Baebele ka gonne Mosupi yo mmotlana a ne a se ka a tlhoka go direla balekane ba gagwe ba sekolo molemo. A bo e le matswela a a itumedisang jang ne! Eleruri, “Go sego tšhaba e Modimo wa yone e leng Jehofa.”—Pesalema 144:15