Go Kaya Eng go Rata Modimo?

MO E ka nnang dingwaga di le dikete tse thataro tse di fetileng, ngwana wa ntlha wa motho o ne a tsholwa. Fa a sena go tsholwa, mmaagwe e bong Efa o ne a re: “Ke bonye monna ka thuso ya ga Jehofa.” (Genesise 4:1) Mafoko a ga Efa a senola gore, lefa ene le monna wa gagwe, Atame, ba ne ba setse ba atlholetswe loso ka ntlha ya go tsuologa ga bone, ba ne ba santse ba lemoga gore Jehofa ke ene Modimo. Moragonyana ba ne ba nna le ngwana wa bobedi wa mosimane. Basimane bano ba ne ba bidiwa Kaine le Abele.

Fa barwa bano ba ntse ba gola, kwantle ga pelaelo ba ne ba ithuta go le gontsi kaga lorato lwa ga Jehofa ka go tlhatlhoba popo ya gagwe fela. Ba ne ba kgatlhiwa ke mebala e mentle ya popo le mefutafuta ya diphologolo le dimela. Modimo ga a ka a ba naya botshelo fela mme gape o ne a dira gore ba kgone go itumelela botshelo.

Ba ne ba ithuta gore batsadi ba bone ba ne ba bopilwe ba itekanetse le gore boikaelelo jwa ga Jehofa jwa ntlhantlha e ne e le gore batho ba tshelele ruri. Atame le Efa ba tshwanetse ba bo ba ne ba ba tlhalosetsa kaga tshingwana e ntle ya Etene, mme ba ne ba tshwanelwa ke go tlhalosa ka tsela nngwe gore ba ne ba kobetswe eng kwa legaeng leo la sekaparadaise. Kaine le Abele ba ka tswa ba ne ba itse gape le kaga boporofeti jwa Modimo jo bo kwadilweng mo go Genesise 3:15. Jehofa o ne a dirisa boporofeti joo go tlhalosa boikaelelo jwa gagwe jwa go baakanya dilo fa nako e ntse e ya gore ba ba mo ratang le ba ba ikanyegang mo go ene ba solegelwe molemo.

Go ithuta kaga Jehofa le dinonofo tsa gagwe go tshwanetse ga bo go ile ga dira gore Kaine le Abele ba batle go ratiwa ke Modimo. Ka jalo ba ne ba ya kwa go Jehofa ka go mo isetsa ditshupelo. Pego ya Baebele ya re: “E rile motlha mongwe Kaine a tlisa ga loungo lwa mmu, a direla Jehofa tshupelo. Abele, le ene a tlisa ga maitibolo a letsomane la gagwe, a na le mahura a lone.”—Genesise 4:3, 4.

Go eletsa ga bone go ratiwa ke Modimo go ne ga thaya motheo wa gore ba tsalane le ene. Kaine o ne a feleletsa a tsuologela Modimo, fa Abele a ne a tswelela pele a rotloediwa ke go rata Modimo ka lorato lwa mmatota. Abele o ka bo a sa tsalana le Modimo jalo fa a ne a sa nna le kitso kaga botho jwa ga Jehofa le maikaelelo a gagwe pele.

Le wena o ka simolola go itse Jehofa. Ka sekai, o ka ithuta mo Baebeleng gore Modimo ke motho wa mmatota, ga se maatla fela a a sa tsheleng a a tsamayang a bopa dilo fela a sa ikaelela. (Bapisa Johane 7:28; Bahebere 9:24; Tshenolo 4:11.) Baebele gape e ruta gore Jehofa ke “Modimo o o tletseng bopelotlhomogi, o o tsalano, o o bonya go galefa, le o o letlotlo la boutlwelo botlhoko le boammaaruri.”—Ekesodo 34:6.

“Go Utlwa go Molemo Bogolo go go Isa Tshupelo”

Jaaka go bontshitswe ke pego kaga Kaine le Abele, go nna le kitso kaga Modimo le go eletsa go tsalana le ene ga go a lekana. Ke boammaaruri gore barwa bano ba babedi ba ne ba isetsa Modimo ditshupelo. Lefa go ntse jalo, “Jehofa [o ne] a itumelela Abele le tshupelo ya gagwe; a se ka a itumelela Kaine le tshupelo ya gagwe. Jalo Kaine a nna bogale thata, le sefatlhogo sa gagwe sa befa.”—Genesise 4:3-5.

Ke eng fa Jehofa a ne a sa amogele setlhabelo sa ga Kaine? A go ne go na le sengwe se se phoso ka boleng jwa tshupelo ya gagwe? A Jehofa o ne a kgopisiwa ke go bo Kaine a ne a isa “loungo lwa mmu” a sa ise setlhabelo sa phologolo? E seng jalo tota. Moragonyana, Modimo o ne a amogela ka diatla tsoopedi ditshupelo tsa mabele le maungo a mangwe a mmu a a neng a tlisiwa ke baobamedi ba gagwe ba le bantsi. (Lefitiko 2:1-16) Ka jalo, go bonala sentle gore go ne go na le sengwe se se phoso ka pelo ya ga Kaine. Jehofa o ne a kgona go bona pelo ya ga Kaine mme a mo tlhagisa jaana: “Ana o galefetseng? Le sefatlhogo sa gago se befetseng? A ga ke re fa o dira sentle o tlaa amogelesega? Mme fa o sa dire sentle, boleo bo ipobile fa mojakong; mme keletso ya jone e tlaa nna mo go wena.”—Genesise 4:6, 7.

Go rata Modimo ka lorato lwa mmatota ga go akaretse go isa ditlhabelo fela. Ke gone ka moo Jehofa a neng a kgothaletsa Kaine gore a “dire sentle.” Modimo o ne a batla go utlwiwa. Go utlwa Modimo jalo go ka bo go thusitse Kaine gore a nne le motheo o o molemo wa go tsalana ka lorato le Mmopi. Baebele e gatelela botlhokwa jwa go utlwa ka mafoko ano: “A Jehofa o ka itumelela ditshupelo tse di fisiwang le ditlhabelo, jaaka a itumelela go [utlwa, NW] lentswe la ga Jehofa? Bona, go utlwa go molemo bogolo go go isa tshupelo, le go reetsa bogolo go mahura a diphelefu.”—1 Samuele 15:22.

Kgang eno e ne ya gatelelwa sentle moragonyana ka mafoko ano a 1 Johane 5:3: “Gonne lo ke lone lorato lwa Modimo, gore re boloke ditaolo tsa one; ditaolo tsa one ga di tlhokofatse.” Tsela e e molemolemo e re ka bontshang ka yone gore re rata Jehofa ke ka go ineela mo taolong ya gagwe. Seno se kaya go utlwa molao wa Baebele wa boitsholo. (1 Bakorinthe 6:9, 10) Se kaya go rata se se molemo le go ila se se bosula.—Pesalema 97:10; 101:3; Diane 8:13.

Sengwe sa botlhokwa se se bontshang gore re rata Modimo ke go rata moagelani wa rona. Baebele e re bolelela jaana: “Fa motho a re: ‘Ke rata Modimo,’ mme a [ila] mogagabo, o maaka; gonne yo o sa rateng mogagabo yo o mmonang ka matlho, ga a ka ke a rata Modimo, o a iseng a o bone.”—1 Johane 4:20.

Go ka Kgonega go Tsalana le Modimo

Batho bangwe ba ka re, ‘Ke obamela Jehofa. Ke utlwa melao ya gagwe. Ke tshwara mongwekanna sentle. Ke dira dilo tseo tsotlhe. Lefa go ntse jalo, tota ga ke ikutlwe ke le gaufi le Modimo. Ga ke ikutlwe ke mo rata thata, mme seo se dira gore ke ikutlwe ke le molato.’ Ba bangwe ba ka akanya gore ga ba tshwanele go tsalana jalo le Jehofa.

Morago ga go direla Jehofa ka boineelo dingwaga di ka nna 37, Mokeresete mongwe o ne a kwala jaana: “Gantsi mo botshelong jwa me ke ile ka ikutlwa e kete ke direla Jehofa ga seomodiro fela, gore gongwe e bile ke ne ke sa mo direle go tswa mo pelong. Mme lefa go ntse jalo ke ne ke itse gore go direla Jehofa e ne e le selo se ke neng ke tshwanetse go se dira, e bile ke ne nka se iteseletse go tlogela. Lefa go ntse jalo, nako le nako ke ne ke a tle ke bale ka mongwe yo o neng a re ‘pelo ya gagwe e ne e penologa ka lorato lwa go rata Jehofa,’ ke bo ke ipotsa ke re, ‘Nna ke rileng, ka gore ga ke ise ke tsamaye ke ikutlwe jalo?’” Re ka tsalana le Modimo jang?

Fa ruri o rata mongwe, o akanya ka ene gantsi. O eletsa thata gore o nne gaufi le ene ka gonne o amega ka ene. Fa o ntse o mmona, o bua le ene, e bile o akanya ka ene, lorato lo o mo ratang ka lone lo a gola. Molaomotheo ono o a dira le fa o godisa tsela e o ratang Modimo ka yone.

Mo go Pesalema 77:12, mokwadi yo o tlhotlheleditsweng a re: “Ke tlaa akanya tiro ya gago yotlhe, ke kanka ka ga tse o di dirang.” Go tlhatlhanya go botlhokwa fa o godisa tsela e o ratang Modimo ka yone. Seno se boammaaruri segolobogolo ka gonne ga re kgone go mmona. Mme fa o ntse o akanya ka ene, o tla mo tsaya e le motho wa mmatota. Ke gone fela o ka tsalanang le ene go tswa mo pelong le ka tsela e e lorato—ka gonne o mo tsaya e le motho wa mmatota.

Go rata go tlhatlhanya ka ditsela tsa ga Jehofa le ditiro tsa gagwe gangwe le gape go tla ikaega ka gore o mo reetsa go le kana kang. O mo reetsa ka go bala le go ithuta Lefoko la gagwe e leng Baebele ka metlha. Mopesalema o bua ka monna yo o itumetseng e le yo “go itumela ga gagwe go mo molaong wa ga Jehofa; mme o akanya mo molaong wa gagwe motshegare le bosigo.”—Pesalema 1:1, 2.

Selo se sengwe sa botlhokwa ke thapelo. Ke gone ka moo Baebele e re rotloetsang kgapetsakgapetsa gore re rapele—“ka metlha yotlhe,” ‘re ineele mo thapelong,’ ‘re nnele ruri mo thapelong,’ re bo ‘re rapele ka go bisa go khutla.’ (Baefeso 6:18; 1 Bakorinthe 7:5; Baroma 12:12; 1 Bathesalonika 5:17) Fa re rapela Jehofa ka go bisa go khutla seo se tla dira gore a re rate, mme go itse gore o a reetsa go tla dira gore re mo rate. Seno se ne sa tlhomamisiwa ke mopesalema, fa a ne a bolela jaana: “Ke rata Jehofa, gonne o utlwile lentswe la me, le mekokotlelo ya me. Ka a ntshekegetse tsebe ya gagwe, ke gone ke tlaa nnang ke mmitsa ka ke sa ntse ke tshedile.”—Pesalema 116:1, 2.

Go Etsa Modimo o o Lorato

Jehofa o molemo mo go rona. E re ka e le Mmopi wa lobopo, ruri o na le dilo tse dintsi tse a tshwanetseng go di akanyetsa le go amega ka tsone. Lefa go ntse jalo, Baebele e re bolelela gore lefa a le mogolo jaana, o santse a amega ka popo ya gagwe e e leng batho. O a re rata. (1 Petere 5:6, 7) Mopesalema o tlhomamisa seno ka mafoko ano a gagwe: “Jehofa, Morena wa rona, a bo leina la gago le le lentle mo lefatsheng lotlhe! Wena yo o tlhomileng kgalalelo ya gago godimo ga magodimo. E a re fa ke akanya magodimo a gago, tiro ya menwana ya gago, kgwedi le dinaledi tse o di baakantseng; kana motho e be e le eng, fa e bo ne ne o mo gopola, le morwa motho, fa e bo ne ne o mo lekola?”—Pesalema 8:1, 3, 4.

Jehofa o ntse a gopola motho jang? Baebele e araba jaana: “Lorato lwa Modimo lo bonatsheditswe rona ka gone moo, ka Modimo o romile Morwa one yo o tsetsweng a le esi mo lefatsheng, gore re tshele ka ene. Lorato lo mo, e seng gore re ratile Modimo, fa e se gore, o ratile rona, mme wa roma Morwa one go tla a nna seletlanyo se se ntsheditsweng dibe tsa rona.”—1 Johane 4:9, 10.

Setlhabelo seno sa thekololo ke bosupi jo bogolo thata jwa lorato lwa Modimo ka tsela efe? A re sekasekeng se se diragetseng kwa tshimong ya Etene. Atame le Efa ba ne ba tshwanetse go tlhopha gore a ba ineele mo molaong wa ga Jehofa ba bo ba tshelela ruri ba itekanetse, kana ba tsuologele Jehofa ba bo ba swa. Ba ne ba tlhopha go tsuologa. (Genesise 3:1-6) Ka go dira jalo gape ba ne ba atlholela batho botlhe loso. (Baroma 5:12) Ka boikgodiso ba ne ba re rontsha sebaka sa go itirela tshwetso. Ga go na ope wa rona yo o nnileng le sebaka sa go itirela tshwetso mo kgannyeng eno.

Lefa go ntse jalo, Jehofa o ntse a gopotse motho ka lorato, a lemoga bothata jo a leng mo go jone. Ka loso lwa setlhabelo lwa Morwawe, Jesu Keresete, Jehofa o dirile gore go nne le sebaka se se kafa molaong sa gore mongwe le mongwe wa rona a ka itlhophela botshelo kana loso, go utlwa kana go tsuologa. (Johane 3:16) Go ntse jaaka e kete Jehofa o re neetse sebaka kwa kgotleng—sebaka sa gore re boele kwa Etene, jaaka go ka tualo, mme re itirele tshwetso. Seno ke sesupo se segolo thata sa lorato se se kileng sa dirwa.

Akanya fela ka botlhoko jo Jehofa a neng a bo itshokela fa a bona morwawe wa leitibolo a tlhapadiwa, a bogisiwa, a bo a kokotelwa jaaka senokwane. Mme Modimo o ne a itshokela seo gore re solegelwe molemo. Lebaka la go bo re itse gore Jehofa o tsere kgato pele a re rata pele, le tshwanetse la re tlhotlheletsa gore le rona re mo rate re bo re mo senke. (Jakobe 1:17; 1 Johane 4:19) Baebele e re laletsa gore re ‘batle Jehofa le thata ya gagwe; re batle sefatlhogo sa gagwe ka bosakhutleng. Re gakologelwe ditiro tsa gagwe tse di gakgamatsang tse a di dirileng, dikgakgamatso tsa gagwe, le dikatlholo tsa molomo wa gagwe.’—Pesalema 105:4, 5.

Go atamela Modimo le go tsalana le ene ka tsela e e lorato, go nna tsala ya gagwe, ga se sengwe se se ka sekang sa kgonega. Se ka kgonega. Ke boammaaruri gore re ka se ka ra lekanya lorato lo re ratang Modimo ka lone ka tlhamalalo le botsalano jwa rona le batho. Lorato lo re ratang yo re nyalaneng le ene ka lone, batsadi ba rona, bomorwarraarona, bana ba rona, kana ditsala tsa rona ga lo tshwane le lo re ratang Modimo ka lone. (Mathaio 10:37; 19:29) Go rata Jehofa go akaretsa gore re mo direle ka bojotlhe, re mo obamele, re bo re ineele mo go ene re sa sie sepe kwa thoko. (Duteronome 4:24) Ga go na botsalano bope jo bongwe jo bo akaretsang dilo tseo. Lefa go ntse jalo, re ka nna le maikutlo a a nonofileng ka Modimo ka tsela ya go mo tlotla, ka go mmoifa.—Pesalema 89:7.

Lefa o sa itekanela, o ka kgona go rata Mmopi wa gago fela jaaka Kaine le Abele ba ne ba ka kgona. Kaine o ne a itlhophela, a tsamaya le Satane, mme a nna motho wa ntlha go bolaya motho. (1 Johane 3:12) Go farologana le seo, Abele o tla gopolwa ke Jehofa e le monna yo o nang le tumelo e bile a siame mme o tla duelwa ka go newa botshelo mo Paradaiseng e e tlang.—Bahebere 11:4.

Le wena o ka tlhopha. Ka thuso ya moya wa Modimo le Lefoko la gagwe, ruri o ka simolola go rata Modimo “ka pelo yotlhe ya gago, le ka mowa otlhe wa gago, le ka nonofo ya gago yotlhe fela.” (Duteronome 6:5) Jehofa le ene o tla tswelela pele a go rata, ka gonne ke “moduedi wa ba ba o batlang.”—Bahebere 11:6.

[Setshwantsho mo go tsebe 7]

Setlhabelo sa ga Abele se ne se amogelwa ke Modimo