Re Tshwanetse go Rapela Modimo Jang?
FA MORUTWA mongwe a ne a kopa kaelo malebana le thapelo, Jesu ga a ka a gana go mo e neela. Go ya ka Luke 11:2-4, o ne a araba jaana: “E re fa lo rapela lo re: ‘Rra, leina la gago a le itshepisiwe. Bogosi jwa gago a bo tle. Re neele gompieno sejo sa rona sa letsatsi. O re itshwarele dibe tsa rona; gonne le rona re itshwarela mongwe le mongwe yo o molato le rona. O se re gogele mo thaelong.’” (Douay Version ya Katoliki) Gantsi e bidiwa Thapelo ya Morena. E na le tshedimosetso e ntsi tota.
Selo sa ntlha, lefoko la ntlha fela le re bolelela gore re tshwanetse ra isa dithapelo tsa rona kwa go mang—kwa go Rraarona. Ela tlhoko gore Jesu ga a ka a dira gore go nne le sebaka sepe fela sa go rapela motho o sele, setshwantsho, “moitshepi,” kana le e leng ene tota. Kana gone, Modimo o ne a boletse jaana: “Kgalalelo ya me ga nketla ke e naya o sele, le fa e le pako ya me ditshwantsho tse di setilweng.” (Isaia 42:8, Dy) Ka jalo dithapelo tse di isiwang kwa go sepe fela kana ope fela kwa ntle ga Rraarona wa selegodimo, ga a ka ke a di reetsa, lefa moobamedi a ka tswa a tlhoafetse go le kana kang. Mo Baebeleng, Jehofa Modimo ke ene fela a bidiwang “Moutlwi wa thapelo.”—Pesalema 65:2, NW.
Batho bangwe ba ka bolela gore “baitshepi” ke babueledi fela ba rona mo Modimong. Mme Jesu ka boene o ne a laela jaana: “Ke nna tsela, le boammaaruri, le botshelo; ga go tle ope mo go Rara fa e se ka nna. Mme se lo tlaa se lopang, le fa e ka nna eng, ka leina la me, sone ke tlaa se dira, gore Rara a galalediwe mo go Morwawe.” (Johane 14:6, 13) Ka jalo Jesu o ne a dira gore go bonale sentle gore kgopolo ya gore motho ope yo o bidiwang moitshepi o ne a ka direla jaaka mmueledi ga e a tshwanela. Ela tlhoko gape se moaposetoloi Paulo a neng a se bolela malebana le Keresete: “Ga a ka a re swela fela—o ne a tsoga mo baswing, mme a le kafa letsogong le legolo la Modimo o re emetse e bile o a re kopela.” “O tshelela ruri gore a buelele botlhe ba ba tlang kwa Modimong ka ene.”—Baroma 8:34; Bahebere 7:25, Jerusalem Bible ya Katoliki.
Leina le le Tshwanetseng go Itshepisiwa
Mafoko a a latelang a thapelo ya ga Jesu a ne a re: “Leina la gago a le itshepisiwe.” Motho o ne a ka itshepisa kana a tseela leina la Modimo kwa godimo jang fa a sa le itse e bile a sa le dirise? Mo “Kgolaganong e Kgologolo” ka makgetlho a a fetang 6 000, Modimo o bidiwa ka leina la gagwe, Jehofa.
Ntlhanyana e e kwa tlase mo go Ekesodo 6:3 ya Douay Version ya Katoliki e bolela jaana ka leina la Modimo: “Batho bangwe ba segompieno ba tlhamile leina la Jehofa . . . , ka gonne tsela ya boammaaruri e leina [la Modimo] le bidiwang ka yone, le le mo dikwalong tsa Sehebera, ga e tlhole e itsiwe sentle ka gonne e le lobaka lo lotelele e sa tlhole e dirisiwa.” Ka jalo New Jerusalem Bible ya Katoliki e dirisa leina Yahweh. Lefa bakanoki bangwe ba rata tsela eo ya go le bitsa, “Jehofa” ke tsela e e siameng e bile e sa bolo go dirisiwa ya go bitsa leina la Modimo ka puo ya Setswana. Dipuo tse dingwe di na le ditsela tsa tsone tsa go bitsa leina la Modimo. Selo sa botlhokwa ke gore re dirise leina leo gore re le itshepise. A kereke ya gago e go rutile go dirisa leina Jehofa fa o rapela?
Dilo Tse di Tshwanetseng go Rapelelwa
Go tswa foo Jesu o ne a ruta barutwa ba gagwe go rapela ba re: “Bogosi jwa gago a bo tle.” Efangele ya ga Mathaio e oketsa ka mafoko ano: “Thato ya gago a e dirwe mo lefatsheng jaaka kwa legodimong.” (Mathaio 6:10, Dy) Bogosi jwa Modimo ke puso e e mo diatleng tsa ga Jesu Keresete. (Isaia 9:6, 7) Go ya ka boporofeti jwa Baebele, bo tla tloga bo fedisa dipuso tsotlhe tsa batho mme bo tlise motlha wa kagiso ya lefatshe lotlhe. (Pesalema 72:1-7; Daniele 2:44; Tshenolo 21:3-5) Ka gone Bakeresete ba boammaaruri ba dira gore go tla ga Bogosi e nne sengwe se ba se umakang kgapetsa mo dithapelong tsa bone. A kereke ya gago e go rutile go dira jalo?
Se se kgatlhang ke gore, Jesu gape o ne a bontsha gore dithapelo tsa rona di ka akaretsa mathata a a amang rona ka namana. O ne a re: “Re neye ka letsatsi lengwe le lengwe sejo sa letsatsi. O re itshwarele dibe tsa rona; gonne le rona re itshwarela mongwe le mongwe yo o molato le rona. O se re gogele mo thaelong.” (Luke 11:3, 4, Dy) Mafoko a ga Jesu a kaya gore re ka batla se e leng thato ya Modimo mo dikgannyeng tsa letsatsi le letsatsi, gore re ka buisana le Jehofa kaga sengwe le sengwe se re ka tswang re tshwenyega ka sone kana se sa re jese diwelang. Go kopa Modimo jaana ka metlha go re thusa gore re lemoge kafa re ikaegileng ka ene ka teng. Ka jalo re lemoga thata gore o laola matshelo a rona. Go kopa Modimo ka malatsi otlhe gore a re itshwarele melato ya rona le gone go mosola. Ka go rialo re lemoga makoa a rona thata—mme re kgona go itshokela diphoso tsa ba bangwe botoka. Kgothatso ya ga Jesu ya gore re rapelele gore a re golole mo thaelong le yone e a tshwanela, segolobogolo ka ntlha ya maitsholo a a senyegelang pele a lefatshe leno. Go dumalana le thapelo eo, re ela tlhoko gore re tile maemo a a ka re gogelang mo go direng bosula.
Kwantle ga pelaelo, he, Thapelo ya Morena e re bolelela go le gontsi kaga go rapela dithapelo tse di itumedisang Modimo. A mme Jesu o ne a ikaeletse gore re nne re boaboeletsa thapelo eno ka metlha?
Kgakololo e e Oketsegileng Kaga Thapelo
Jesu o ne a neela ditaelo tse di oketsegileng malebana le thapelo. Re bala jaana mo go Mathaio 6:5, 6: “Fa lo rapela lo se ka lwa nna jaaka baitimokanyi; gonne bone ba rata go rapela ba eme mo matlong a thuto, le fa makopanelong a mebila gore ba bonwe ke batho. . . . Mme wena, e re fa o rapela, o tsene mo ntlwaneng ya gago e e kwa teng, o re o sena go tswala, o rapele Rraago yo o mo sephiring, mme Rraago yo o bonang mo sephiring o tlaa go duela.” Mafoko ano a re bontsha gore thapelo ga e a tshwanela go dirwa ka tsela ya go ipontsha, ya go leka go kgatlha mongwe. A o tshololela Jehofa pelo ya gago mo sephiring, jaaka Baebele e rotloetsa?—Pesalema 62:8.
Jesu o ne a tlhagisa jaana: “Fa lo rapela, lo se ka lwa boaboela fela jaaka baheitane ba tle ba dire, gonne ba gopola gore ba tlaa utlwiwa ka ntlha ya go nna mafokomantsi.” (Mathaio 6:7, JB) Go phepafetse gore Jesu o ne a sa dumalane le go tshwara dithapelo ka tlhogo—lefa e le go di bala mo bukeng nngwe. Mafoko a gagwe gape a bontsha gore go dirisiwa ga rosari ga go a tshwanela.
Buka nngwe ya Katoliki ya dipina tsa mmisa e bolela jaana: “Thapelo ya rona e e siameng thata e ka nna mafoko a dikakanyo tsa rona fela a a itlelang fa re mo leboga kana re tlhoka sengwe, ka dinako tsa mahutsana, kana fa re mo galaletsa fela ka malatsi otlhe.” Mafoko a dithapelo tsa ga Jesu ka boene a ne a itlela fela, a sa a tshwara ka tlhogo. Ka sekai, bala thapelo ya ga Jesu e e kwadilweng mo go Johane kgaolo 17. E lateletse thapelo ya sekao, e gatelela keletso ya ga Jesu ya go bona leina la ga Jehofa le itshepisiwa. Thapelo ya ga Jesu e ne e itlela fela e bile e tswa mo pelong tota.
Dithapelo Tse Modimo a di Utlwang
Fa e le gore o rutilwe go rapela dithapelo tse o di tshwereng ka tlhogo, go rapela “baitshepi” kana ditshwantsho, kana go dirisa dilo tsa bodumedi, tse di jaaka rosari, la ntlha o ka nna wa ikutlwa o tshaba go rapela jaaka Jesu a tlhalositse. Lefa go ntse jalo, o ka thusiwa ke go itse Modimo—leina la gagwe, maikaelelo a gagwe, botho jwa gagwe. O ka dira seno ka go ithuta Baebele ka kelotlhoko. (Johane 17:3) Basupi ba ga Jehofa ba ipaakantse e bile ba iketleeditse go go thusa mo go seno. Kana ebu, ba thusitse dimilione tsa batho mo lefatsheng lotlhe gore ba ‘leke mme ba bone gore Jehofa o molemo’! (Pesalema 34:8) Fa o ntse o itse Modimo mo go oketsegileng, o tla tlhotlheletsega thata gore o mmake ka thapelo. Mme fa o ntse o atamela Jehofa ka thapelo o mo tlotla, tsalano ya gago le ene e tla gola.
Ka jalo, baobamedi ba Modimo botlhe ba rotloediwa gore ba ‘rapele ka go bisa go khutla.’ (1 Bathesalonika 5:17) Tlhomamisa gore dithapelo tsa gago ruri di dumalana le Baebele, go akaretsa le ditaelo tsa ga Jesu Keresete. Ka tsela eno o ka tlhomamisa gore dithapelo tsa gago di tla amogelwa ke Modimo.
[Setshwantsho mo go tsebe 7]
Fa re ntse re ithuta mo go oketsegileng ka ga Jehofa, re tlhotlheletsega thata gore re mo rapele go tswa mo pelong