A o Etsa Modimo wa Rona Yo o Sa Tlhaoleng?

GO SA TLHAOLE BATHO—go ka bonwa kae? Go na le Mongwe yo o sa tlhaoleng gotlhelele, yo o senang letlhoo la tlhaolele, go sena batho ba ba rileng ba a ba ratang go feta ba bangwe, e bile a sena tlhaolele. Motho yoo ke Jehofa Modimo, Mmopi wa batho. Lefa go ntse jalo, mokwadi mongwe wa Moesemane e bong Charles Lamb wa lekgolo la bo19 la dingwaga o ne a kwala jaana a sa potapote malebana le batho: “Fa ke tlhalosa ka mafoko a a tlhamaletseng fela, ke na le letlhoo la tlhaolele le le feteletseng—ke na le dilo tse ke di ratang le tse ke sa di rateng.”

Fa go buiwa ka go sa tlhaole, dikamano tsa batho di tlhaela seno thatathata. Makgolokgolo a dingwaga a a fetileng Kgosi Solomone yo o botlhale wa Iseraele o ne a bolela gore, “motho o na le thata mo go yo mongwe go mo utlwisa botlhoko.” (Moreri 8:9, bapisa NW.) Letlhoo la lotso, dikgotlhang tsa ditšhaba, le dikomang tsa malapa di ntse di oketsega. Ka jalo, a go a utlwala go dumela gore batho ka bobone, ba ka kgona go bopa setšhaba se se sa tlhaoleng?

Go tlhokega gore re dire maiteko a magolo gore re laole maikutlo a rona le go tlosa maikutlo ape fela a a boteng a go tlhaola batho a re nang le one. (Baefeso 4:22-24) Kwantle ga gore re lemoge re ka nna ra bo re na le mekgwa e e bakiwang ke tikologo ya batho ba re godileng le bone le thuto e re nnileng le yone e le dilo tse di neng tsa nwelela mo malapeng a re tswang mo go one, mo setsong le mo setšhabeng se re godisitsweng mo go sone. Mekgwa eno e e bonalang e sa tsenelela thata gantsi e kwa teng mme ke yone e e tlhotlheletsang maikutlo a a dirang gore motho a tlhaole batho ba bangwe. Moatlhodi mongwe wa Mo-Scot e bile e le morulaganyi e bong Lord Francis Jeffrey o ile a dumela jaana: “Ga go na sepe se se ka bapisiwang le nako e telele e motho a nnang a sa lemoge gore o na le boikutlo jwa go tlhaola batho jo bo tseneletseng.”

Lenaa ke mongwe wa batho ba ba dumelang gore motho o tlhoka go dira maiteko a magolo go lwantsha boikutlo jwa go tlhaola batho. A re, go kganela letlhoo la tlhaolele le motho a nang le lone “ke matsapa a magolo ka gonne tsela e motho a godisitsweng ka yone e tlhotlheletsa motho thata.” Lena gape o dumela gore motho o tlhoka go gakololwa ka metlha.

Rekoto ya ga Jehofa Ya go Sa Tlhaole Batho

Jehofa ke sekao se se molemo sa go sa tlhaole batho. Go tloga fela kwa tshimologong ya Baebele, re bala kafa a ileng a supa gore ga a tlhaole batho ka teng ka tsela e a neng a dirisana le bone ka yone. Re ka ithuta mo gontsi ka dikai le dikgakololo tse di molemolemo tseno.

Jehofa o ne a supa gore ga a tlhaole batho ka go rulaganya dilo ka tsela ya gore moaposetoloi wa Mojuta e bong Petere a ye go rerela Korenelio le Baditšhaba ba bangwe mafoko a a molemo ka 36 C.E. Ka nako eo Petere o ne a bolela jaana: “Modimo ga o tlhaole, mme mo morafeng mongwe le mongwe motho yo o o boifang a ba a dira tshiamo o a amogelesega mo go one.”—Ditiro 10:34, 35, NW.

Mo ditseleng tsa gagwe tsotlhe tse a neng a dirisana le batho mo go tsone, Jehofa o ne a supa gangwe le gape gore ga a tlhaole batho. Keresete Jesu o ne a bolela jaana ka Rraagwe: “O tlhabisetsa ba ba molemo le ba ba bosula letsatsi la gagwe, a nesetse basiami le basiamolodi pula.” (Mathaio 5:45) Fa a tswelela pele a galaletsa Jehofa jaaka Modimo o o sa tlhaoleng batho, Petere o ne a bolela jaana: “O pelotelele mo go lona, a sa rate gore ope a swe, fa e se gore botlhe ba tle mo boikwatlhaong.”—2 Petere 3:9.

Mo motlheng wa ga Noa, fa “boikepo jwa motho [bo ne] bo le bogolo mo lefatsheng, le go akanya ga megopolo ya pelo ya gagwe gotlhe, go le bosula ka metlha yotlhe,” Jehofa o ne a ntsha katlholo ya go senngwa ga lefatshe leo la batho. (Genesise 6:5-7, 11, 12) Lefa go ntse jalo, ka taolo ya Modimo, Noa o ne a aga araka e batho ba motlha wa gagwe ba neng ba kgona go e bona sentle. Ka nako ya fa ene le bomorwawe ba ne ba aga araka, Noa gape e ne e le “moreri wa tshiamo.” (2 Petere 2:5) Le mororo Jehofa a ne a itse bosula jo bo mo dipelong tsa losika loo, o ne a ba romela molaetsa o o phepafetseng a sa ba tlhaole. O ne a leka go ama megopolo le dipelo tsa bone ka go dira gore Noa a age le go rera. Ba ne ba filwe sebaka se sentsi sa go tsaya kgato, mme go na le moo ba ne “ba se ka ba tsaya tsia go fitlha morwalela o tla o ba o ba gogola botlhe.”—Mathaio 24:39, NW.

A bo Jehofa e le sekao se se molemo jang ne sa go sa tlhaole batho! Mo metlheng eno ya bofelo e e tlhokofatsang, batlhanka ba Modimo ba tlhotlheletsega go bolela mafoko a a molemo a Bogosi ka tsela e e ntseng jalo ba sa tlhaole batho. Mo godimo ga moo, ga ba kgaotse go bolela ka letsatsi la ga Jehofa la pusolosetso. Ba itsise molaetsa wa ga Jehofa phatlalatsa ba sa tlhaole ope gore mongwe le mongwe a utlwe.—Isaia 61:1, 2.

Ditsholofetso tse Jehofa a neng a di neela ditlhogo tsa lotso e bong Aberahame, Isake le Jakobe di ne tsa supa ka phepafalo gore ga se Modimo yo o tlhaolang batho. Mo losikeng lwa bone lo lo kgethegileng go ne go tla tswa Ene yo o tlhomilweng yo ‘merafe yotlhe e tla segofalang ka [ene].’ (Genesise 22:18; 26:4; 28:14) Keresete Jesu o ne a itshupa e le Ene yo o tlhomilweng. Ka loso le go tsosiwa ga ga Jesu mo baswing, Jehofa o ne a dira tsela e batho botlhe ba ba kutlo ba neng ba ka bolokiwa ka yone. Ee, melemo ya setlhabelo sa thekololo sa ga Keresete e ka bonwa kwantle ga go tlhaola ope.

Mo motlheng wa ga Moshe, go sa tlhaole batho ga ga Jehofa go ile ga itshupa ka tsela e e kgatlhang tota mo kgannyeng ya bomorwadia Selofehate. Basadi ba batlhano bano ba ne ba lebane le bothata jwa boswa jwa ga rraabo kwa Nageng e e Solofeditsweng. E ne e le bothata ka gonne go ne go tlwaelegile kwa Iseraele gore boswa jwa naga bo fetisediwe mo go bomorwa motho. Lefa go ntse jalo, Selofehate o ne a swa a sena morwa yo o neng a ka ja boswa. Ka jalo bomorwadia Selofehate ba batlhano ba ne ba ya go kopa Moshe gore ba se ka ba tlhaolwa ka go bolela jaana: “Ana leina la rraetsho le tlaa bo le tlosediwang mo losikeng lwa gagwe, ka a ne a se na ngwana wa mosimane? Re neyeng boswa mo go bomorwa rraetsho.” Jehofa o ne a reetsa dithapelo tsa bone mme a laela Moshe jaana: “Fa motho a swa a se na ngwana wa mosimane, foo lo dire gore boswa jwa gagwe bo fetele mo go morwadie.”—Dipalo 27:1-11.

A bo e le thulaganyo e e lorato jang ne ya go sa tlhaole batho! Go tlhomamisa gore boswa jwa lotso ga bo fetisediwe mo lotsong lo longwe fa barwadi ba nyalwa, go ne go tlhokega gore ba nyalwe fela ke “ba losika lwa lotso lwa ga rraabo.”—Dipalo 36:5-12.

Re ka bona tshedimosetso e e oketsegileng e e malebana le kafa Jehofa a neng a sa tlhaole batho ka teng ka go leba motlha wa ga moatlhodi le moporofeti Samuele. Jehofa o ne a mo roma gore a ye go tlotsa kgosi e ntšha go tswa mo morafeng wa Juta mo losikeng lwa ga Jese wa Mobethelehema. Mme Jese o ne a na le barwa ba le robedi. Ke mang yo o neng a tla tlodiwa go nna kgosi? Samuele o ne a kgatlhiwa ke popego ya mmele wa ga Eliabe. Lefa go ntse jalo, Jehofa ga a laolwe ke ponalo ya kafa ntle. O ne a raya Samuele a re: “O se ka wa leba sefatlh[e]go sa gagwe, le fa e le go gola ga gagwe; . . . ka gobo Jehofa ga a bone jaaka motho a bona; gonne motho o leba bokafantle, mme Jehofa o leba pelo.” Go ne ga tlhophiwa Dafite morwa yo o mmotlana wa ga Jese.—1 Samuele 16:1, 6-13.

Go Ithuta Sengwe Ka go Sa Tlhaole Batho ga ga Jehofa

Bagolwane ba Bakeresete ba tla bo ba dira sentle fa ba ka etsa Jehofa ka go leba dinonofo tsa semoya tsa modumedikabone. Go motlhofo gore re atlhole motho go ya ka maemo a rona, re dira gore maikutlo a motho ka namana a kgoreletse tsela e re akanyang ka yone. Jaaka mogolwane mongwe a tlhalosa, “Ke ntse ke leka go dirisana le ba bangwe ka tsela e e itumedisang Jehofa, e seng go ya ka se nna ke se akanyang.” A bo go le molemo jang ne fa batlhanka ba ga Jehofa ba ka dirisa Lefoko la gagwe gore e nne lone le ba kaelang!

Dikai tse di umakilweng fa godimo tsa Baebele di re thusa go lwantsha maikutlo ape a re nang le one a go tlhoa batho ka ntlha ya lotso kana ya bosetšhaba. Ka go etsa tsela ya ga Jehofa ya go sa tlhaole batho, re sireletsa phuthego ya Bokeresete mo letlhoong la batho, mo tlhaoleleng, le mo go rateng batho ba bangwe go feta ba bangwe.

Moaposetoloi Petere o ne a ithuta gore “Modimo ga o tlhaole.” (Ditiro 10:34, NW) Go rata ba bangwe go feta ba bangwe go kgatlhanong le go sa tlhaole batho e bile go thulana le melaometheo ya go ratana le go utlwana. Jesu o ne a ama dipelo tsa bahumanegi, batho ba ba bokoa le ba ba tlhokang mme a tlhofofatsa merwalo ya bone. (Mathaio 11:28-30) O ne a farologane thata le baeteledipele ba bodumedi ba Bajuta, ba ba neng ba gatelela batho, ba ba imetsa ka melao e mentsi. (Luke 11:45, 46) Go dira seno le go rata batho ba ba humileng le batho ba ba nang le maemo a a kwa godimo thata go feta ba bangwe go ne go sa dumalane gotlhelele le dithuto tsa ga Keresete.—Jakobe 2:1-4, 9.

Gompieno, bagolwane ba Bakeresete ba ineela kafa tlase ga botlhogo jwa ga Keresete mme ga ba tlhaole ope wa batho ba ba ineetseng ba ga Jehofa. Fa ba ntse ba ‘disitse letsomane la Modimo le le mo go bone,’ ba tila go rata batho ba bangwe go feta ba bangwe ka ntlha ya maemo a bone a itsholelo, go sa tshwane ga botho jwa bone, kana dikamano tsa malapa. (1 Petere 5:2) Fa bagolwane ba Bakeresete ba etsa tsela ya Modimo ya go sa tlhaole batho mme ba tsaya tsia tlhagiso ya gagwe ya go sa rate ba bangwe go feta ba bangwe, ba dira gore go nne le moya wa go sa tlhaolane mo phuthegong.

Phuthego ya Bokeresete ya Basupi ba ga Jehofa ke bokaulengwe jwa ditšhabatšhaba. Ke bosupi jo bo bonalang jwa gore tota mokgatlho wa batho o o senang letlhoo la tlhaolele le o o sa tlhaoleng o ka nna teng kafa tlase ga kaelo ya ga Jesu Keresete. Basupi ba “apere motho yo moša, yo ka fa Modimong o bopilweng mo tshiamong, le mo boitshepong jwa boammaaruri.” (Baefeso 4:24) Ee, ba ithuta mo sekaong se se itekanetseng sa Modimo yo o sa tlhaoleng e bong Jehofa, mme ba solofetse botshelo jo bo sa khutleng mo lefatsheng le lesha le go se kitlang go tlhola go na le tlhaolele epe.—2 Petere 3:13.

[Ntlha e e kwa tlase]

[Setshwantsho mo go tsebe 26]

Moaposetoloi Petere o ithutile gore Modimo ga o tlhaole