A o Eletsa go Direla mo go Oketsegileng?

“KE NE ke galefetse Jehofa,” go bolela jalo Laura. “Ke ne ke rapela ke sa fetse gore a re thuse go rarabolola mathata a rona a madi e le gore ke kgone go tswelela ke bulatsela—mme ga go a ka ga thusa sepe. Mme kwa bofelong ke ne ka tshwanelwa ke go tlogela tirelo ya bobulatsela. Gape ke tshwanetse go dumela gore ke ne ke fufegela ba ba neng ba kgona go tswelela.”

Akanya gape ka Michael, motlhanka wa bodiredi mo phuthegong ya Basupi ba ga Jehofa. O ne a ntse a senka boemo jwa bookami. (1 Timotheo 3:1) Fa keletso ya gagwe e sa diragadiwe ka dingwaga di le mmalwa, o ne a utlwa botlhoko fela thata mo e leng gore o ne a sa tlhole a batla go akanyetswa go newa tshiamelo eno. “Ke ne ke sa tlhole ke kgona go itshokela botlhoko jwa go swabisiwa gape,” o ne a bua jalo.

A o kile wa nna le boitemogelo jo bo tshwanang? A o kile wa tshwanelwa ke go tlogela tshiamelo nngwe e e rategang ya puso ya Modimo? Ka sekai, a o kile wa tshwanelwa ke go emisa go direla jaaka mmulatsela, mmoledi wa Bogosi wa nako e e tletseng? Kana a o eletsa maikarabelo mangwe a phuthego a a neilweng ba bangwe? Gongwe e ka nna ya tswa e le gore o eletsa ka tlhoafalo go direla kwa Bethele kana jaaka morongwa, mme maemo a gago a sa go letle.

“Tsholofelo e e diegisiwang e tle e ngodise pelo,” go bolela jalo buka ya Diane. (Diane 13:12) Seno se ka nna jalo segolobogolo fa ba bangwe ba amogela ditshiamelo tse o di solofetseng. A Lefoko la Modimo le naya bangwe ba ba ileng ba swabisiwa ka tsela e e ntseng jalo temogo, kgomotso le tsholofelo? Ee, le a ba naya. Tota Pesalema ya 84 e tlhalosa maikutlo a motlhanka wa ga Jehofa yo o neng a eletsa dilo tse di tshwanang malebana le tirelo ya ga Jehofa mme keletso eo e sa diragadiwe.

Kanaanelo ya Molefi

Batlhami ba Pesalema 84 e ne e le barwa ba ga Kora, Balefi ba ba neng ba direla mo tempeleng ya ga Jehofa e bile ba anaanela thata ditshiamelo tsa bone tsa tirelo. “Ana metlaagana ya gago e mentlentle jang, wena Jehofa wa masomosomo!” mongwe wa bone o ne a bolela jalo. “Mowa wa me o tlhologeletswe, ee, o idibalela fela malwapa a ga Jehofa; pelo ya me le nama ya me di kurueletsa Modimo o o tshedileng.”—Pesalema 84:1, 2.

Molefi yono o ne a eletsa thata jaana go direla kwa tempeleng ya ga Jehofa mo e leng gore le e leng ponalo fela ya yone e e tlwaelegileng e e mo thoko ga tsela e e yang kwa Jerusalema e ne ya bonala e mo kgatlha thata. “Ba e reng ba ralala mokgatšha wa Maselelo,” o ne a bolela, “ba o phunye metswedi.” (Pesalema 84:6) Ee, lefelo le ka tlwaelo le neng le le lokgere mo go ene le ne le tshwana le kgaolo e e noseditsweng sentle.

Ka ntlha ya go bo mopesalema e ne e le Molefi yo o seng moperesiti, o ne a ka direla kwa tempeleng ka beke e le nngwe fela mo dikgweding dingwe le dingwe tse thataro. (1 Ditirafalo 24:1-19; 2 Ditirafalo 23:8; Luke 1:5, 8, 9) O ne a fetsa nako e nngwe yotlhe ya gagwe a le kwa gae mo go nngwe ya metse ya Balefi. Ke sone se a neng a opela jaana: “Ee, thaga e iponetse ntlo, le peolwane setlhaga, fa e ka bayang mamphorwana a yone gone, e bong dibeso tsa gago, Jehofa wa masomosomo, Kgosi ya me, le Modimo wa me!” (Pesalema 84:3) A bo Molefi a ne a tla itumela thata jang ne fa a ka bo a ne a tshwana le dinonyane tse di nang le lefelo le di nnang kwa go lone kwa tempeleng!

Go ne go tla nna motlhofo ka Molefi gore a utlwe botlhoko ka gonne a ne a sa kgone go direla mo tempeleng gantsinyana. Lefa go ntse jalo, o ne a itumedisiwa ke go direla ka fa a ka kgonang ka gone, e bile o ne a tlhokomela thata gore go ineela ka pelo yotlhe mo go Jehofa go a thusa. Ke eng se se thusitseng Molefi yono yo o ikanyegang go kgotsofalela ditshiamelo tsa gagwe tsa tirelo?

Ithute go Kgotsofala

“Gonne letsatsi le le lengwe fela mo malwapeng a gago, le gaisa malatsi a a makgolo a le some” go bolela jalo Molefi. “Ke rata ka nna molebedi wa kgoro mo ntlong ya Modimo bogolo go go aga mo megopeng ya boikepo.” (Pesalema 84:10) O ne a lemoga gore go dirisa le fa e le letsatsi le le lengwe fela kwa ntlong ya ga Jehofa e ne e le tshiamelo e e botlhokwa tota. Mme Molefi o ne a na le matsatsi a a fetang le le lengwe fela a go direla mo tempeleng. Go kgotsofalela ditshiamelo tseno tsa gagwe go ne ga mo dira gore a opele ka boipelo.

Go tweng ka rona? A re anaanela masego a rona, kana a re sekametse mo go lebaleng seo re setseng re na le sone mo tirelong ya ga Jehofa? Ka ntlha ya boineelo jwa bone mo go ene, Jehofa o neela batho ba gagwe ditshiamelo le ditiro ka selekanyo se segolo. Tseno di akaretsa maikarabelo a a bokete a go nna balebedi, go disa, go ruta le dikarolo tse dingwe tse di farologaneng tsa tirelo ya nako e e tletseng. Mme gape di akaretsa le dilo tse dingwe tse di botlhokwa tse di tsamaisanang le kobamelo ya ga Jehofa.

Ka sekai, akanya ka bodiredi jwa Bokeresete. Moaposetoloi Paulo o tshwantsha tshiamelo ya rona ya go rera mafoko a a molemo le go nna le ‘khumo mo dijaneng tsa letsopa.’ (2 Bakorinthe 4:7) A o leba tirelo e e ntseng jalo e le khumo e e tlhwatlhwakgolo? Jesu Keresete yo o neng a eteletse pele mo tirong ya go rera ka Bogosi, o ne a e leba ka tsela eo, a tlhoma sekao. (Mathaio 4:17) “Ke gone e re ka re na le tirelo e . . . , ga re ngodiege,” go boletse Paulo.—2 Bakorinthe 4:1.

Dipokano tsa Bokeresete le tsone ke paakanyetso e e boitshepo e e sa tshwanelwang go tsewa motlhofo. Kwa dipokanong tsa rona, re amogela tao e e molemo e bile re itumelela botsala jo re bo tlhokang. Gape kwa dipokanong re ka tlhalosa tumelo ya rona le tsholofelo phatlalatsa ka go akgela ka metlha le ka go nna le seabe mo thulaganyong ka ditsela tse dingwe. (Bahebere 10:23-25) Tota dipokano tsa rona ke paakanyetso e re tshwanetseng go e rata!

Michael, yo o umakilweng pelenyana, o ne a leba masego ano e le a a botlhokwa thata e bile o ne a a anaanela fela thata. Mme go swabisiwa ke gore a sa kgone go direla e le mogolwane go ne ga fokotsa kanaanelo ya gagwe mo go one ka nakwana. Ka go boa a tlhokomela gape, o ne a kgona go nna tekatekanyo mme ka bopelotelele a letela Jehofa.

Go na le go ngongorega ka ntlha ya go bo re se na tshiamelo nngwe, re dira sentle go tlhatlhoba gape ditsela tseo Jehofa a re segofatsang ka tsone, jaaka fa go dirile mopesalema.a Fa re palelwa ke go bona go le gontsi, re tlhoka go leba gape, re kopa Jehofa gore a bule matlho a rona go bona ditshiamelo tsa rona le ditsela tse a re segofatsang ka tsone le go re dirisa go mmaka.—Diane 10:22.

Gape go botlhokwa go ela tlhoko gore ditshiamelo tse di kgethegileng, jaaka boemo jwa mookami wa phuthego, di tlhoka ditshwanelego tse di rileng. (1 Timotheo 3:1-7; Tito 1:5-9) Ka gone re tlhoka go itlhatlhoba, re leba mo re ka tokafatsang gone mme re bo re leka ka tlhoafalo go tokafatsa.—1 Timotheo 4:12-15.

O se Ka wa Nyema Mooko

Fa re sa amogele tshiamelo nngwe ya tirelo, ga re a tshwanela go fetsa ka gore Jehofa o rata ba ba nang le tsone thata kana gore o re tima molemo mongwe. Eleruri ga re a tshwanela gore ka ntlha ya lefufa re bo re tsaya fela gore ba bangwe bano ba bone ditshiamelo tseno tse di sa ba tshwanelang ka ntlha ya go bo ba ratiwa e seng ka ntlha ya go bo ba tlhomilwe go ya ka puso ya Modimo. Go akanya thata ka megopolo e e ntseng jalo go ka dira gore re nne lefufa, re nne kgang le eleng go itlhoboga gotlhelele.—1 Bakorinthe 3:3; Jakobe 3:14-16.

Laura yo o umakilweng pelenyana, ga a ka a itlhoboga. Kwa bokhutlong o ne a kgona go laola maikutlo a gagwe a go galefa le lefufa. Laura kgapetsakgapetsa o ne a rapela Modimo gore a mo thuse go fenya boikutlo jwa gagwe jo bo sa siamang ka ntlha ya go bo a sa kgone go bulatsela. Gape o ne a batla thuso mo banneng ba ba tshwanelegang mo phuthegong mme a sala a tlhomamisegile gore Modimo o a mo rata. “Jehofa o ne a dira gore ke ritibale maikutlo,” o ne a bolela jalo. “E re ka nna le monna wa me gone jaanong re sa kgone go bulatsela, re itumelela nako eo re neng re bulatsela ka yone e bile re inonotsha ka maitemogelo a re nnileng le one. Gape re thusa morwa wa rona yo o godileng yo o bulangtsela.” Ka gonne a kgotsofetse, gone jaanong Laura o kgona go ‘itumela le ba ba itumelang’ mo tirelong ya bone ya bobulatsela.—Baroma 12:15.

Itlhomele Mekgele e o Tla e Fitlhelelang

Go kgotsofalela ditshiamelo tsa tirelo tse re nang le tsone gone jaanong ga go reye gore re se ka ra tlhola re itlhomela mekgele e mengwe ya dilo tsa puso ya Modimo. Fa a ne a tlhalosa go tsogela kwa legodimong, Paulo o ne a bua ka go “gagamalela kwa dilong tse di kwa pele.” Mme gape o ne a re: “Kwa re setseng re fitlhile teng, a re ke re nneng re sepele ka fa sekaong seo fela.” (Bafilipi 3:13-16) Mekgele ya dilo tsa puso ya Modimo e ka re thusa go gagamalela kwa dilong tse di kwa pele. Lefa go ntse jalo, kgwetlho ke gore re e boloke e le dilo tsa mmatota.

Mekgele ya mmatota e a utlwala e bile e ka kgona go bonwa. (Bafilipi 4:5) Seno ga se reye gore mokgele o o tlhokang gore o dire ka natla ka dingwaga di le mmalwa ga se wa mmatota. Mokgele o o ntseng jalo o o tsayang lobaka lo loleele o ka fitlhelelwa ka iketlo ka go itlhomela mekgele e mengwe e e tlang pele ga one kana dikgato. Eno e ka nna selo se o ka tshwayang ka sone kgatelopele ya semoya. Go fetsa kgato nngwe le nngwe ka katlego go tla go naya kgotsofalo fa nako e ntse e tsamaya go na le go swaba.

Tekatekanyo e e Molemo

Lefa go ntse jalo, go botlhokwa go lemoga gore ka ntlha ya maemo le makoa a rona, go ka direga gore re se kgone go amogela ditshiamelo dingwe. Go di ipeela jaaka mekgele go ka dira gore o swabe kana o kgobege marapo. Mekgele e e ntseng jalo e tshwanetse ya beelwa kwa thoko ka nakwana. Go dira seno ga go kitla go nna bokete fa re rapelela kgotsofalo ya bomodimo e bile re dira gore go dira thato ya ga Jehofa e nne selo se segolo se re amegileng ka sone. Fa re lwela go fitlhelela ditshiamelo dingwe, go galaletsa Jehofa—e seng go ikgalaletsa ka ntlha ya se re se fitlheletseng—ke selo sa botlhokwa. (Pesalema 16:5, 6; Mathaio 6:33) Baebele e re bolelela jaana ka tshwanelo: “Neela Jehofa ditiro tsa gago, mme maikaelelo a gago a tlaa tlhomama.”—Diane 16:3.

Ka go tlhatlhoba Pesalema 84, re ka bona gore mopesalema o ne a bontsha boikutlo jo bo ntseng jalo ka ditshiamelo tsa tirelo, mme Jehofa a mo segofatsa mo gogolo. Mo godimo ga moo, pesalema eno e santse e tswelela e solegela batho ba ga Jehofa molemo go tla go fitlha le gompieno.

Ka go ikaega ka Jehofa ka thapelo, o ka kgona go lekalekanya go eletsa ga gago ditshiamelo tse di oketsegileng le go kgotsofalela tse o di itumelelang gone jaanong. O se ka wa letlelela keletso ya go dira mo go oketsegileng e go amoga kanaanelo ya se o nang le sone gone jaanong le boitumelo jwa go direla Jehofa ka bosakhutleng. Ikanye Jehofa, gonne seno se felela ka boitumelo, jaaka go bontshitse mafoko a Molefi: “Jehofa wa masomosomo, go sego motho yo o ikantseng mo go wena.”—Pesalema 84:12.

[Ntlha e e kwa tlase]

[Lebokoso mo go tsebe 11]

Mekgele E re Ka Itlhomelang Yone

Go bala Baebele ka malatsi otlhe.—Jošua 1:8; Mathaio 4:4

Go tokafatsa kgono ya rona ya go akanya ka go thapisiwa ke Dikwalo.—Bahebere 5:14

Go nna le kamano e e gaufiufi le Modimo.—Pesalema 73:28

Go tlhagolela leungo lengwe le lengwe la moya.—Bagalatia 5:22, 23

Go tokafatsa boleng jwa dithapelo tsa rona.—Bafilipi 4:6, 7

Go nna le matswela mo go rereng le mo go ruteng.—1 Timotheo 4:15, 16

Go bala le go tlhatlhanya ka tokololo nngwe le nngwe ya dimakasine tsa Tora ya Tebelo le Tsogang!—Pesalema 49:3

[Ditshwantsho mo go tsebe 9]

Fa o ipeela mekgele, baya go dira thato ya Modimo kwa pele