Pego ya Baboledi ba Bogosi

Go Ikgolola mo Tlhotlheletsong ya Badimona

GO DIRISA tirisabadimo ga go bolo go laola matshelo a dimilione tsa batho. Mme go a kgonega go ikgolola mo go gone! Ke sone se se diragetseng mo bathong ba le bantsi ba ba neng ba nna kwa motseng wa bogologolo wa kwa Efeso. Go ya ka pego ya Baebele, “ba le bantsi thata ba ba ba neng ba dira ditiro tsa maselamose e le tlwaelo ba phutha dibuka tsa bone ba ba ba di ja ka molelo . . . Ka gone ka tsela e e nonofileng lefoko la ga Jehofa la nna la gola e bile le fenya.”—Ditiro 19:19, 20.

Ka tsela e e tshwanang, le gompieno phuthego ya Bokeresete e a gola. Jaaka fa go ne go ntse kwa Efeso, mo go bao e nnang badumedi go na le ba ba neng ba dirisa bodimona mo nakong e e fetileng. Boitemogelo jo bo latelang jo bo tswang kwa Zimbabwe bo bontsha seno.

Nkoko (Mmemogolo) Mthupha o ne a itsege thata ka maatla a gagwe a tirisabadimo. Batho ba ne ba tswa kgakala jaaka kwa Zambia, Botswana, le Afrika Borwa ba tla kwa go ene gore a tle go ba alafa ka melemo ya gagwe ya setso. Nkoko Mthupha gape o ne a ruta ba bangwe go nna n’anga, kana ngaka ya bola. E bile ka dinako tse dingwe o ne a loya!

Ka letsatsi lengwe ka Sontaga mo mosong Nkoko Mthupha o ne a etelwa ke Basupi ba ga Jehofa ba ba neng ba le mo bodireding jwa ntlo le ntlo. O ne a itumelela go tlotla le bone fela thata ka tsholofetso ya Baebele ya lefatshe le lesha la tshiamo, lefatshe le le se nang ditlhotlheletso tsotlhe tse di boikepo. O ne a amogela buka ya O Ka Tshelela Ruri mo Lefatsheng la Paradaise mme a dumela go tshwarelwa thuto ya Baebele ya legae.a Morago ga dithuto tse tharo fela, o ne a simolola go nna gone kwa dipokanong.

Fa a ntse a ithuta Baebele, Nkoko Mthupha o ne a ithuta gore maatla a gagwe a a kgethegileng a tswa mo dibopiweng tsa moya tse di boikepo tse di neng tsa tsuologela bolaodi jwa ga Jehofa. (2 Petere 2:4; Jude 6) Mme gape o ne a ithuta gore badimona bano ba ikemiseditse gore fa ba ka kgona ba tlose mongwe le mongwe mo go Jehofa le mo kobamelong e e itshekileng. E re ka tsela e a neng a itshedisa ka yone e ne e ikaegile ka go dirisana le dibopiwa tseno tsa moya tse di boikepo, o ne a tla dira jang?

Nkoko Mthupha o ne a tlhalosa gore o batla go tlogela dipheko tseno tsotlhe tsa gagwe le dilo tse a di dirisang tse di amanang le tirisabadimo. Seno se ne se akaretsa sefapatlhogo sa gagwe se se kgethegileng le “dinaka tsa poo tse di buang,” tseo a neng a di dirisa fa a fodisa ka bo-n’anga jwa gagwe. Nkoko Mthupha o ne a batla go latlha dilo tsotlhe tseo e le gore a ka direla Modimo o o osi fela wa boammaaruri le o o tshelang, Jehofa.

Le fa go ntse jalo, bangwe ba masika a gagwe, ba ne ba gana gonne o ne a ba tlamela ka madi. Ba ne ba mo kopa gore a ba neye didirisiwa tsa gagwe, mmogo le maatla a gagwe a e seng a tlholego e le gore ba ka tswelela ba dira lotseno. Nkoko Mthupha o ne a gana.

Ka thuso ya phuthego e e mo lefelong la bone ya Basupi ba ga Jehofa, o ne a tsenya didirisiwa tsa gagwe tsa tirisabadimo mo dikgetsing tse tharo tse dikgolo mme a di fisa tsotlhe fela. Fa molelo o ntse o fisa didirisiwa tsa gagwe tsa kobamelo ya badimona, Nkoko Mthupha o ne a goa a re: “Bona! Lenaka le le, ga le kgone go iphalotsha.”

Fa nako e ntse e ya, Nkoko Mthupha ka boitumelo o ne a bontsha boineelo jwa gagwe mo go Jehofa ka go kolobediwa mo metsing. Gone jaanong o itshedisa ka eng? Ka go rekisa merogo. Ee, ka nonofo ya Lefoko la Modimo, motho a ka kgona go ikgolola mo go obameleng badimona. Nkoko Mthupha a re: “Ga ke ise nke ke ikutlwe ke gololesegile jaana.”

[Dintlha tse di kwa tlase]