A o Mosolofedi Kana o Moitlhobogi?

“E NE e le nako e e monate go di feta tsotlhe, e ne e le nako e e botlhoko go di feta tsotlhe, . . . e ne e le dikgakologo tsa tsholofelo, e ne e le mariga a tlalelo, re ne re na le sengwe le sengwe kwa pele ga rona, re ne re se na sepe kwa pele ga rona.” Mafoko ao a a simololang a letlotlo la buka ya ga Charles Dickens ya A Tale of Two Cities e bapisa ka tsela e e botswerere kafa ditiragalo di ka amang ka teng tsela e re akanyang ka yone, maikutlo a rona le tsela e re lebang dilo ka yone.

Metse e mebedi e a neng a bua ka yone e ne e le Lontone le Paris mo nakong ya khuduego ya Menolopuso ya kwa Fora. Mo baaging ba ba neng ba gateletswe ba Fora wa lekgolo la bo18 la dingwaga, go bolela phatlalatsa ditshwanelo tsa batho mo menolopusong eno e ne e le “dikgakologo tsa tsholofelo” tota. Mme mo go ba puso e e fetileng, kana ba tsamaiso ya bopolotiki e e fetileng, e ne e le “mariga a tlalelo,” a a isang kwa losong le tshenyegong.

A ke go nna le tsholofelo kana ke go itlhoboga? Go ne go ikaegile fela ka letlhakore le o neng o le mo go lone. Mme go sa ntse go le jalo le gompieno.

Nako ya go Itshekatsheka

A o mosolofedi? A o bona botshelo e le jo bo itumedisang, ka metlha o lebeletse go bona dilo tse di molemolemo? Kana a o itlhobogile, o sa lebe isagwe ya gago ka tsela e e siameng, o solofetse go bona phelelo e e siameng mme go ntse go le jalo o lebeletse e e sa siamang?

Dingwaga tse 60 tse di fetileng mokwadi wa Moamerika wa dibadi e bong James Branch Cabell o ne a sobokanya difilosofi tse pedi tseno tse di ganetsanang ka tsela eno: “Mosolofedi o bolela gore re tshela mo kokomaneng e e di gaisang tsotlhe; mme moitlhobogi ene ga a bone jalo.” Fa o utlwa o sa dumele kgopolo eno, tlhatlhoba mabaka ka dikarolo tse tharo fela tsa lefatshe la gompieno jaaka di bontshitswe fa tlase. Morago ga moo, bona gore o akanyang ka tsone, mme o ipotse, ‘A ke solofela mo go reng dilo di tla tokafala kana ke itlhobogile?’

Kagiso e e Nnelang Ruri: Ke mafelo a le kae a o ka a bolelang mo lefatsheng a a nang le dikgotlhang? Ireland, e e neng e le Yugoslavia pele, Botlhabagare, Burundi, Rwanda—o gakologelwa mafelo ano motlhofo fela. A dintwa tseno le tse dingwe di tla tsamaya di rarabololwa go tlhomamisa gore go nne le kagiso e e tla nnelang ruri, le ya lefatshe lotlhe? A lefatshe leno le tlile go nna le kagiso?

Go Tlhomama ga Maemo a Itsholelo: E re ka dinaga tsa European Union di solofetse go kopanya madi ka 1999, di lwantshana thata le mathata a go tlhatloga ga ditlhwatlhwa le a madi a puso e a adimang mo bathong. Kwa dinageng tse dingwe, ditiro tse di seng kafa molaong di senya itsholelo ya ditšhaba di le dintsi tsa Amerika le Afrika, koo go tlhatloga ga ditlhwatlhwa go tlisang morwalo o o boima thata e bile mathata a bomorafe a sa ntse a kgaoganya batho. A go tlhomama ga itsholelo ya lefatshe go gaufi?

Go Tlhoka Ditiro: Mo ditlhophong tsa bosetšhaba ka 1997, dikereke tsa kwa Boritane di ne tsa kopana gore di rotloetse diphati tsotlhe tsa sepolotiki gore di tsenye ditiro mo maemong a pele mo diajentareng tsa tsone. A mme ka diperesente di ka nna 30 tsa batho mo lefatsheng tse di se nang ditiro, a go ka nna le tiro e e tla nnelang ruri—segolo jang ya basha?

A bo go le motlhofo jang ne go ikutlwa o se na tsholofelo! Le fa go ntse jalo go na le tsholofelo, mme re go laletsa gore o sekaseke gore o dire jang gore o lebe dilo ka tsholofelo.

[Setshwantsho mo go tsebe 3]

Menolopuso ya kwa Fora

[Motswedi wa Setshwantsho]

From the book Pictorial History of the World