Tiragalo e e Itumedisang—Go Aloga ga Setlhopha sa bo104 sa Gileate

“LENO ke letsatsi le le itumedisang, mme rotlhe re itumetse.” Ka mafoko ao, Carey Barber, leloko la Setlhopha se se Laolang sa Basupi ba ga Jehofa, o ne a bula thulaganyo ya kalogo ya setlhopha sa bo104 sa Sekolo sa Baebele sa Watchtower sa Gileate ka March 14, 1998. Bareetsi ba le 4945, ba ne ba lalediwa go simolola tiragalo eno ka go opela pina ya Bogosi ya 208, e e nang le setlhogo se se reng “Pina ya Boipelo.”

Kgakololo e e Mosola ya go Nna o Itumetse

Karolo e e simololang ya thulaganyo, motseletsele wa ditlhogo tse tlhano tsa dipuo tse dikhutshwane tse di theilweng mo Baebeleng, di ne tsa neela kgakololo e e mosola malebana le go boloka moya wa boipelo o o neng o rena ka letsatsi la kalogo.

Puo ya ntlha e ne ya neelwa ke Joseph Eames wa Lephata la Bokwaledi. O ne a bua ka setlhogo se se reng “Etsa Moya wa Ba ba Ikanyegang,” se se neng se theilwe mo pegong ya Baebele e e mo go 2 Samuele dikgaolo 15 le 17, mo Abesalome, morwa Dafide a neng a loga maano a go tsaya bogosi jwa ga rraagwe jo a bo filweng ke Modimo ka go tlhotlheletsa batho go tsuologa. Le fa go ntse jalo, go ne go na le bao ba neng ba nna ba ikanyega mo Kgosing e e tloditsweng ya ga Jehofa e bong Dafide. Barongwa ba basha ba ne ba ka ithuta thuto efe mo go seno? “Gongwe le gongwe koo lo yang gone mo kabelong ya lona ya borongwa, rotloetsang moya wa go dirisana mmogo ka boikanyegi le wa go tlotla taolo ya puso ya Modimo. Thusang ba bangwe gore le bone ba dire jalo,” Mokaulengwe Eames o ne a konela jalo.

Yo o neng a latela mo thulaganyong e ne e le David Sinclair, yo o neng a tlhalosa dilo tse di batlegang di le lesome, tse di umakiwang mo go Pesalema 15, tsa go nna moeng mo ‘tenteng ya ga Jehofa.’ Puo ya gagwe e e neng e na le setlhogo se se reng “Tswelelang Pele lo le Baeng mo Tenteng ya Lona ya Borongwa,” e ne ya kgothaletsa baithuti ba ba alogang gore ba dirise pesalema eno mo dikabelong tsa bone tsa borongwa, koo ba tla bong ba le baeng gone. Mokaulengwe Sinclair o ne a gatelela botlhokwa jwa go tshela ka ditekanyetso tsa bomodimo ka dinako tsotlhe. Matswela a gone ke eng? Pesalema 15:5 e bolela jaana: “Yo o dirang dilo tse ga a ketla a tshikinyega gope.”

John Barr, yo e leng leloko la Setlhopha se se Laolang o ne a latela mme a bua ka tsela e go opela kwa dipokanong tsa Bokeresete go nang le tlhotlheletso ka gone. Mme ke pina efe e e itumedisang thata e e opelwang mo lefatsheng lotlhe gompieno? Ke dikgang tse di molemo tsa Bogosi Jwa Bomesia Jwa Modimo. Ditlamorago tsa go opela gono gotlhe ke eng, kana tsa go rera ka Bogosi? Temana ya bobedi ya pina ya 208 (ka Seesemane) e bolela jaana ka bokhutshwane: “Ka go rera ka Bogosi le go ruta ga Bakeresete, ba bantsi ba gogelwa tlhakoreng la ga Jehofa. Bano le bone, ba opela dipina tsa boipelo, ba di utlwatsa, Ee, ba dira jalo gongwe le gongwe!” Ee, letsatsi lengwe le lengwe mo e ka nnang barutwa ba basha ba le 1000 baa kolobediwa. Mokaulengwe Barr o ne a konela jaana: “Bakaulengwe, a ga go itumedise go akanya gore, lo romelwa kwa tshimong e lo tla kopanang le mofuta wa batho ba ba tla bong ba letile fela go utlwa pina ya lona ya pako?”

“Reetsang Mantswe A ba Ba Nang le Maitemogelo” e ne e le setlhogo sa puo e James Mantz wa Lephata la Bokwaledi a neng a e neela morago ga foo. O ne a tlhalosa gore dilo dingwe di ka ithutiwa fela ka dilo tse di go diragaletseng. (Bahebera 5:8) Le fa go ntse jalo, Diane 22:17 e re kgothaletsa go ‘sekega tsebe ya rona mme re utlwe mafoko a ba ba botlhale,’ kana ba ba setseng ba na le boitemogelo. Baithuti ba ba alogang ba ka ithuta mo go ba ba tsamaileng pele ga bone. “Ba itse go dira ditumalano le boralebenkele ba lefelo. Ba itse mafelo a toropo a ba tshwanetseng go a tila ka gonne a le kotsi mo mmeleng kana mo boitsholong. Ba itse dilo tse di kgopisang batho ba lefelo. Barongwa ba nako e telele ba itse gore o tlhoka eng gore o itumele le go atlega mo kabelong ya gago,” go ne ga bolela jalo Mokaulengwe Mantz.

Fa a bua ka setlhogo se se reng “Anaanela Kabelo ya Gago ya Puso ya Modimo,” Wallace Liverance, yo e leng mokwadisi wa Sekolo sa Gileate, o ne a tlhalosa gore le fa barongwa bangwe ba ba jaaka moaposetoloi Paulo, Timotheo le Baranabase, ba ne ba amogela dikabelo tsa bone go tswa kwa Modimong ka moya o o boitshepo kana ka tsela nngwe ya kgakgamatso, barongwa ba ba katisitsweng kwa Gileate ba abelwa lefelo mo tshimong ya lefatshe lotlhe ke “motlhanka yo o boikanngo le yo o bonokopela.” (Mathaio 24:45-47) O ne a bapisa dikabelo tsa barongwa le mafelo a Gidione a neng a a abela banna ba ba neng ba tshwanetse go lwa le Bamidiana. (Baatlhodi 7:16-21) “Anaanela kabelo ya gago ya borongwa ya puso ya Modimo. Fela jaaka masole a ga Gidione a ne a ‘ema mongwe le mongwe mo boemong jwa gagwe,’ lebang kabelo ya lona jaaka boemo jo lo tshwanetseng go nna mo go jone. Dumela gore Jehofa a ka go dirisa fela jaaka a dirisitse banna ba ba makgolo a mararo ba ga Gidione,” Mokaulengwe Liverance a kgothatsa jalo.

Go Rata Batho go Dira Gore o Nne le Boitumelo

Nako nngwe Tora ya Tebelo e ne ya akgela jaana: “Go na le gore re age dikgatlhego tsa rona le matshelo a rona mo dilong tse di dirilweng tsa thulaganyo eno ya dilo, dilo tse go sa tlhomamisegeng gore a di tla tswelela di le teng, a bo go le botoka jang ne e bile go le botlhale go dira gore batho e nne bone ba tota re ba kgatlhegelang mme re ithute go bona boitumelo jwa mmatota mo go direleng ba bangwe dilo.” Go dumalana le seo, Mokaulengwe Mark Noumair, mongwe wa bakaedi ba Sekolo sa Gileate, o ne a tlotla le setlhopha sa baithuti ka maitemogelo a bone a tirelo ya tshimo mme a akgela jaana: “Go kgatlhegela ba bangwe ka namana ke sone se se tla dirang gore lo nne barongwa ba ba molemo.”

Ditsela Tsa go Bona Boitumelo mo Tshimong e Sele

Ke ditsela dife tse di ka dirang gore motho a atlege le go itumela mo tirong ya borongwa? Mokaulengwe Charles Woody wa Lephata la Tirelo le Mokaulengwe Harold Jackson, yo e kileng ya bo e le morongwa kwa Latin America e bile a thusa mo Komiting ya go Ruta, o ne a botsolotsa maloko a Dikomiti tse di farologaneng tsa Makala a a neng a le teng mo setlhopheng sa borobongwe sa sekolo sa badiredi ba lekala. Fano re na le sekai sa kgakololo e bano ba neng ba e neela:

Albert Musonda go tswa kwa Zambia o ne a bolela jaana: “Fa morongwa a tsaya matsapa a go ya go dumedisa bakaulengwe pele, go dira gore go nne le moya o montle ka gonne bakaulengwe ba tla atamela mo morongweng yoo, mme morongwa le ene o tla atamela mo go bone.”

Rolando Morales wa kwa Guatemala o ne a akantsha gore fa barongwa ba basha ba fiwa sengwe sa go nwa ke batho ba ba botsalano, ba ka nna ba araba jaana ka bopelonomi le ka botlhale: “Ke mosha mo nageng eno. Nka rata go nwa, mme mmele wa me ga o kgone go iphemela ka tsela ya tlholego jaaka mebele ya lona. Ke solofela gore ka letsatsi lengwe ke tla kgona go e amogela, mme ke tla itumelela go dira jalo.” Melemo ya karabo ya mofuta oo ke eng? “Batho ba ka se ka ba kgopisega, mme morongwa o tla bo a ile a supa bopelonomi mo go ba bangwe.”

Ke eng se se ka thusang barongwa go itshoka mo dikabelong tsa bone? Mokaulengwe Paul Crudass, yo e leng moalogi wa setlhopha sa bo79 sa Gileate, yo o ntseng a direla kwa Liberia ka dingwaga tse 12 tse di fetileng, o ne a akgela jaana: “Ke a itse gore ke boammaaruri gore batsadi ba tlhologelelwa bana ba bone. Mme go na le dinako tse ka tsone morongwa a lekang go tlwaelana le naga, tikologo, ngwao le batho. A ka nna a ikutlwa a batla go tsamaya. Fa a amogela lekwalo go tswa kwa gae le re, ‘Re go tlhologeletswe thata; ga re itse gore re tla dira eng kwantle ga gago,’ e ka nna sone fela se a se tlhokang gore a pake dikgetsi tsa gagwe mme a bo a ya gae. Go botlhokwa thata gore ba losika ba ba leng gone fano gompieno ba gakologelwe seo.”

Morago ga dipotsolotso, puo ya bofelo mo thulaganyong e ne ya neelwa ke Theodore Jaracz, yo e leng leloko la Setlhopha se se Laolang. Setlhogo sa gagwe: “Boloka Bogosi bo le Kwa Pele mo Botshelong Jwa Gago.” Barongwa ba ka nna jang ba tsepame mme ba sa iteege tsebe mo tirong ya bone? O ne a ba kgothaletsa gore ba nne le thulaganyo ya thuto ya Baebele, e e tla ba thusang gore ba boloke Bogosi bo le kwa pele mo botshelong. Mme go ne go na le kgakololo eno e e tshwanelang: “Barongwa bangwe ba ile ba tlhokomologa thuto ya bone ka namana ka gonne ba ne ba tshwaregile thata ka didirisiwa tsa eleketoroniki, E-mail le khomputara. Re tshwanetse go nna botlhale gore re nne tekatekano mo go diriseng sedirisiwa sepe fela mme re se ka ra dirisa nako e ntsi mo selong se se tla kgoreletsang go ithuta Lefoko la Modimo ka namana.”

Morago ga puo ya ga Mokaulengwe Jaracz go ne ga tla nako ya go abiwa ga didipoloma le go balwa ga lekwalo la kanaanelo le le tswang mo setlhopheng seno. Moemedi wa setlhopha o ne a tlhalosa maikutlo a mongwe le mongwe jaana: “Re ne ra bona bosupi jo bo bonalang jwa lorato lo Jesu a neng a re le tla tshwaya barutwa ba gagwe, mme se se re tlhomamiseditse gore go sa kgathalesege gore re kae, go na le phuthego e e ntseng jaaka mmè yo o lorato e e re tshegetsang. Ka tshegetso e e ntseng jalo, re iketleeditse go ya kwa dikhutlong tsa lefatshe.” E ne e le konelo e e amang maikutlo ya letsatsi la kalogo ya setlhopha sa bo104 sa Gileate.

[Lebokoso mo go tsebe 24]

Dipalo Tsa Setlhopha

Palo ya dinaga tse di emetsweng: 9

Palo ya dinaga tse ba abetsweng kwa go tsone: 16

Palo ya baithuti: 48

Palo ya banyalani: 24

Palogare ya dingwaga tsa bone tsa bogodi: 33

Palogare ya dingwaga tsa bone ba le mo boammaaruring: 16

Palogare ya dingwaga tsa bone ba le mo bodireding jwa nako e e tletseng: 12

[Setshwantsho mo go tsebe 25]

Setlhopha se se Alogang sa Bo104 sa Sekolo sa Baebele sa Watchtower sa Gileate

Mo lenaaneng le le fa tlase, dinomoro tsa mela eno di kwadilwe di balwa go tswa kwa pele go ya kwa morago, mme maina a thathamisitswe go tswa ka fa molemeng go ya ka fa mojeng wa mola mongwe le mongwe

(1) Romero, M.; Howarth, J.; Blackburne-Kane, D.; Hohengasser, E.; West, S.; Thom, S. (2) Colon, W.; Glancy, J.; Kono, Y.; Drews, P.; Tam, S.; Kono, T. (3) Tam, D.; Zechmeister, S.; Gerdel, S.; Elwell, J.; Dunec, P.; Tibaudo, H. (4) Taylor, E.; Hildred, L.; Sanches, M.; Anderson, C.; Bucknor, T.; Hohengasser, E. (5) Howarth, D.; Ward, C.; Hinch, P.; McDonald, Y.; Sanches, T.; Thom, O. (6) Drews, T.; Tibaudo, E.; Elwell, D.; Dunec, W.; Blackburne-Kane, D.; Ward, W. (7) Anderson, M.; Zechmeister, R.; McDonald, R.; Bucknor, R.; Glancy, S.; Gerdel, G. (8) Romero, D.; Hinch, R.; Hildred, S.; Taylor, J.; Colon, A.; West, W.

[Setshwantsho mo go tsebe 26]

Bakaulengwe ba ba nnileng le seabe mo go ruteng setlhopha sa bo104: (go tswa kafa molemeng) W. Liverance, U. Glass, K. Adams, M. Noumair