“Modimo o Rata Monei yo o Thamileng”

JEHOFA o pelotshweu tota. Ee, Baebele ya re ke Monei wa “mpho nngwe le nngwe e e molemo le neo nngwe le nngwe e e itekanetseng.” (Jakobe 1:17) Ka sekai, akanya ka dilo tse Modimo a di bopileng. O dirile dijo tse di monate, e seng tse di se nang tatso; dithunya tse di mebalabala, e seng tse di letobo; phirimo ya letsatsi e e kgatlhang, e seng e e lefifi. Ee, sengwe le sengwe se Jehofa a se bopileng se supa lorato le bopelotshweu tse a nang le tsone. (Pesalema 19:1, 2; 139:14) Mo godimo ga moo, Jehofa ke Moabi yo o itumetseng. O itumelela go direla batlhanka ba gagwe dilo tse di molemo.—Pesalema 84:11; 149:4.

Baiseraele ba ne ba laelwa go etsa bopelotshweu jwa Modimo fa ba dirisana mmogo. Moshe o ne a ba laela jaana: “O se ka wa thatafatsa pelo ya gago, le fa e le go huparelela ngwana wa ga rraeno wa sehumanegi seatla. Ruri o mo neye, mme pelo ya gago e se ka ya hutsafala fa o mo naya.” (Duteronome 15:7, 10) E re ka Baiseraele ba ne ba tshwanetse go aba ka pelo e e ratang, ba ne ba tshwanetse go itumelela go nna pelotshweu.

Bakeresete le bone ba ne ba gakololwa jalo. Ee, Jesu o ne a re ‘go na le boitumelo mo go abeng.’ (Ditiro 20:35) Barutwa ba ga Jesu ba ne ba tlhoma sekao se se molemo mo go abeng ka boitumelo. Ka sekai, Baebele e bega gore kwa Jerusalema batho ba ba neng ba nna badumedi ba ne ba “rekisa dithuo tsa bone le dithoto le go abela botlhe dipoelo, go ya fela kafa motho a neng a tlhoka ka gone.”—Ditiro 2:44, 45.

Mme moragonyana batho bano ba ba pelotshweu ba Judea ba ne ba welwa ke lehuma. Baebele ga e bolele se se neng sa dira gore ba wele mo maemong ao. Bakanoki bangwe ba bolela gore leuba le le umakiwang mo go Ditiro 11:28, 29 e ka tswa e le lone le bakileng seo. Mme gone, Bakeresete bano ba Judea ba ne ba le mo khumanegong e kgolo mme Paulo o ne a batla go tlhomamisa gore ba tlamelwa ka dilo tse ba di tlhokang. O ne a tla dira seo jang?

Moneelo wa Batlhoki

Paulo o ne a laela diphuthego tse di kwa kgakala tse di jaaka ya Makedonia gore di thuse, a ba a rulaganyetsa gore go ntshiwe meneelo go thusa Bakeresete ba Judea ba ba neng ba wetswe ke lehuma. Paulo o ne a kwalela Bakorintha jaana: “Fela jaaka ke ne ka naya diphuthego tsa Galatia ditaelo, dirang ka tsela eo le lona. Letsatsi lengwe le lengwe la ntlha la beke a mongwe le mongwe wa lona kwa ntlong ya gagwe a beele sengwe kwa thoko mo bobolokelong go ya kafa a ka tswang a tlhogonolofala ka gone.”a—1 Bakorintha 16:1, 2.

Paulo o ne a batla gore meneelo eno e romelwe ka bonako kwa bakaulengweng kwa Jerusalema, le fa go ntse jalo, Bakorintha ba ne ba nna bonya go tsibogela ditaelo tsa ga Paulo. Ka ntlha yang? A ba ne ba sa kgathalele bakaulengwe ba bone ba Judea? Ga go jalo, ka gonne Paulo o ne a itse gore Bakorintha ba ne ba “tota mo go sengwe le sengwe, mo tumelong le mo lefokong le mo kitsong le mo tlhoafalong yotlhe.” (2 Bakorintha 8:7) Go ka direga gore ba ne ba tlhomile matlho thata mo dilong tse dingwe tse di botlhokwa tse Paulo a ileng a bua ka tsone mo lekwalong la ntlha le a neng a le ba kwaletse. Mme gone seemo sa kwa Jerusalema se ne se tlhoka go rarabololwa ka potlako. Ka jalo Paulo o ile a bua ka kgang eo mo lekwalong la gagwe la bobedi go Bakorintha.

Boikuelo Jwa Gore ba Nne Pelotshweu

Sa ntlha, Paulo o ile a bolelela Bakorintha ka batho ba Makedonia, ba ba ileng ba tsibogela kgang ya thuso ya namolo ka tsela e e molemo. Paulo o ne a kwala jaana: “Mo nakong ya teko e kgolo fa ba ne ba le tlase ga pogisego boipelo jo bo letlotlo jwa bone le lehuma le legolo la bone di ne tsa dira gore dikhumo tsa bopelo[tshweu] jwa bone di tote.” Go ne ga se ka ga tlhokega gore batho ba Makedonia ba tlhotlhelediwe go aba. Go na le moo, Paulo o ne a re “bone ka go rata ga bone ba ne ba nna ba re lopa tshiamelo ya go naya ka bopelonomi ba rapela thata.” Bopelotshweu jo batho ba Makedonia ba bo bontshitseng ka boipelo bo a gakgamatsa e re ka le bone ba ne ba le mo ‘lehumeng le legolo.’—2 Bakorintha 8:2-4.

Fa Paulo a ne a akgola batho ba Makedonia jalo, a o ne a rotloetsa moya wa kgaisano mo Bakorintheng? Ga go a nna jalo ka gonne o ne a itse gore eo e ne e se tsela e e siameng ya go kgothatsa. (Bagalatia 6:4) Mo godimo ga moo, o ne a itse gore go ne go sa tlhokege gore a kgothaletse Bakorintha go dira se se siameng ka go ba tlhabisa ditlhong. Go na le moo, o ne a sa belaele gore Bakorintha ba rata bakaulengwe ba bone ba Judea thata le gore ba rata go tshegetsa thulaganyo ya namolo ka meneelo. O ne a ba raya a re: “Mo e setseng e le ngwaga e e fetileng lo ne lwa simolola e seng fela go dira mme le go batla go dira.” (2 Bakorintha 8:10) Ee ruri, ka dinako dingwe Bakorintha ka bobone ba ne ba tlhoma sekao se se molemo mo go tshegetseng dithulaganyo tsa namolo. Paulo o ne a re, “Ke itse go iketleetsa ga mogopolo ga lona mo ke ipelafaletsang Bamakedonia ka gone kaga lona,” a bo a oketsa jaana: “Tlhoafalo ya lona e tlhotlheleditse bontsi jwa bone.” (2 Bakorintha 9:2) Mme gone, Bakorintha ba ne ba tshwanetse go dira ditiro tse di supang tlhoafalo eo ya bone le go iketleetsa goo ga bone ga mogopolo.

Ke gone ka moo Paulo a ileng a ba raya a re: “A mongwe le mongwe a dire fela jaaka a sweditse mo pelong ya gagwe, e seng ka go ikgoga fela kgotsa ka go patelelwa, gonne Modimo o rata monei yo o thamileng.” (2 Bakorintha 9:7) Ka jalo, maikaelelo a ga Paulo e ne e se go pateletsa Bakorintha, ka gonne motho a ka se nne moabi yo o thamileng fa a patelediwa. Go bonala Paulo a ne a tsaya gore ba setse ba na le maikaelelo a a siameng, gore mongwe le mongwe wa bone o ne a setse a sweditse gore o tlile go aba. Mo godimo ga moo, Paulo o ile a ba raya a re: “Fa go iketleetsa go le teng pele, go amogelesega segolobogolo go ya ka se motho o nang le sone, e seng go ya ka se motho a se nang sone.” (2 Bakorintha 8:12) Ee, fa motho a iketleeditse—a tlhotlhelediwa ke lorato—Modimo o tla amogela se a se abang, le fa se ka tswa se lebega se le sennye go le kae.—Bapisa Luke 21:1-4.

Baabi ba ba Thamileng Gompieno

Thulaganyo ya namolo e e neng ya direlwa Bakeresete ba Judea e re neela sekao se se molemo gompieno. Basupi ba ga Jehofa ba dule letsholo la go rera lefatshe ka bophara, ba fepa dimilione tsa batho ba ba bolailweng ke tlala ka dijo tsa semoya. (Isaia 65:13, 14) Ba dira jalo ka ntlha ya go ikobela taelo eno ya ga Jesu: “Jalo tsamayang mme lo dire batho ba merafe yotlhe barutwa, lo ba kolobetsa . . . lo ba ruta go boloka dilo tsotlhe tse ke di lo laoletseng.”—Mathaio 28:19, 20.

Ga go motlhofo go diragatsa thomo eno. Go tlhoka gore go tlhokomelwe magae a barongwa le dikago tsa makala tse di fetang lekgolo lefatshe ka bophara. Gape go akaretsa gore go agiwe Diholo Tsa Bogosi le Diholo Tsa Dikopano e le gore baobamedi ba ga Jehofa ba nne le mafelo a a siameng a ba kopanelang mo go one go kgothatsana. (Bahebera 10:24, 25) Ka dinako tse dingwe Basupi ba ga Jehofa gape ba tlamela mafelo a a sentsweng ke masetlapelo a tlholego ka thuso ya namolo.

Akanya gape ka ditshenyegelo tse dikgolo tsa tiro ya go gatisa. Beke le beke go gatisiwa palogare ya dikhopi di le 22 000 000 tsa Tora ya Tebelo kana dikhopi di le 20 000 000 tsa Tsogang! Mo godimo ga dijo tseno tsa semoya tsa ka metlha, ngwaga le ngwaga go na le dimilionemilione tsa dibuka, diboroutšhara, dikhasete le dikhasete tsa bidio tse di dirwang.

Tiro eno yotlhe e etleediwa jang? Ka meneelo e e ntshiwang ka go rata. E ntshiwa ka maikaelelo a go tsweletsa kobamelo ya boammaaruri pele, e seng ka ntlha ya go batla go itshupa kana ka maikaelelo a bogagapa. Ka gone, go aba jalo go dira gore batho ba ba abang ba itumele le go segofadiwa ke Modimo. (Malaki 3:10; Mathaio 6:1-4) Tota le bana ba Basupi ba ga Jehofa ba itshupa e le baabi ba ba pelotshweu le ba ba thamileng. Ka sekai, morago ga gore Allison wa dingwaga tse nnè a utlwalele tshenyo e e neng e bakilwe ke kgwanyape kwa go nngwe ya dinaga tsa United States, o ne a ntsha moneelo wa $2 (R12). O ne a kwala jaana: “Ano ke madi otlhe a ke nang le one mo bankeng. Ke a itse gore bana ba bangwe ba latlhegetswe ke ditshamekisi tsa bone le dibuka le bompopo. Gongwe lo ka dirisa madi ano go rekela mosetsana mongwe wa dingwaga tsa me buka.” Maclean, wa dingwaga tse robedi o ne a bolela gore o itumelela gore ga go ope wa bakaulengwe yo o bolailweng ke sefefo. O ne a oketsa jaana: “Ke ne ka nna le $17 [R107] ka go rekisa ditshipi le rre. Ke ne ke ikaeletse go ithekela sengwe ka madi ano, le fa go ntse jalo ke ne ka akanya ka bakaulengwe.”—Bona le lebokoso le le fa godimo.

Ruri Jehofa o itumedisiwa ke go bona bana le bagolo ba tsaya dilo tsa Bogosi jwa gagwe di le botlhokwa thata, ka go ‘mo tlotla ka dithoto tsa bone.’ (Diane 3:9, 10) Ke boammaaruri gore ga go na motho ope yo o ka humisang Jehofa ka gonne dilo tsotlhe ke tsa gagwe. (1 Ditirafalo 29:14-17) Le fa go ntse jalo, go ema tiro eno nokeng ke tshiamelo e e nayang moobamedi wa gagwe tshono ya go supa tsela e a ratang Jehofa ka yone. Re leboga mongwe le mongwe yo pelo ya gagwe e mo tlhotlheleditseng go dira jalo.

[Ntlha e e kwa tlase]

[Lebokoso mo go tsebe 26, 27]

Ditsela Tse Bangwe ba Tlhopang go Aba ka Tsone Meneelo ya Tiro ya Lefatshe ka Bophara

Batho ka bontsi ba beela madi mangwe kwa thoko go a tsenya mo mabokosong a meneelo. Kgwedi le kgwedi diphuthego di romela madi ano kwa ntlokgolo ya lefatshe lotlhe kwa Brooklyn, New York kana kwa ofising ya lekala la naga ya tsone.

Meneelo e e ntshiwang ka go rata ya madi gape e ka romelwa ka tlhamalalo kwa Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, kana kwa ofising ya Mokgatlho e e thusang naga ya gaeno. Dibenya kana dilo tse dingwe tse di tlhwatlhwakgolo le tsone di ka ntshiwa moneelo. Go tla tlhokega gore meneelo eno e romelwe le lekwalo le lekhutshwane le le tlhalosang gore moneelo oo ke mpho.

Meneelo e e Ikaegileng ka Mabaka Mangwe

Mokgatlho wa Watch Tower o ka abelwa madi ka thulaganyo e e kgethegileng ya gore fa go ka direga gore mong wa one a a tlhoke thata, a busediwe madi ao. Go bona tshedimosetso e e oketsegileng tsweetswee ikgolaganye le Accounting Office kwa atereseng e e mo tsebeng e e latelang.

Go Aba o Rulagantse Sentle

Mo godimo ga go ntsha dimpho tsa madi ka tlhamalalo le meneelo e e ikaegileng ka mabaka mangwe, go na le mekgwa e mengwe gape ya go aba e e ka solegelang tiro ya Bogosi ya lefatshe lotlhe molemo. E akaretsa:

Inshorense: Mokgatlho wa Watch Tower o ka kwalwa gore ke one o tla amogelang madi a inshorense ya botshelo kana a thulaganyo ya go tlogela tiro/phenshene.

Ditoko le Dibonto: Ditoko le dibonto di ka abelwa Mokgatlho wa Watch Tower e le mpho kana ka thulaganyo ya gore mong wa tsone a tswelele pele a duelwa lotseno lwa tsone.

Ditsha le Dikago Tsa Tsone: Ditsha le dikago tse di ka rekisiwang di ka abelwa Mokgatlho wa Watch Tower e le mpho kana ka gore e nne tsa mong fa a sa ntse a tshela gore a tswelele pele a nna mo go tsone go fitlha a swa. Motho o tshwanetse go ikgolaganya le Mokgatlho pele ga a kwadisa ditsha le dikago dipe tsa tsone mo leineng la Mokgatlho.

Diwili: Dithoto kana madi di ka tlogelelwa Mokgatlho wa Watch Tower ka wili e e kwadilweng semmuso.

Accounting Office e tshwanetse go itsisiwe le go romelelwa khopi epe fela ya ditlankana tse di malebana le dithulaganyo tseno. Batho ba ba kgatlhegelang epe fela ya dithulaganyo tseno tsa go aba go go rulaganyeditsweng ba tshwanetse go ikgolaganya le Accounting Office ka lekwalo kana ka founo kwa atereseteng e e kwadilweng fa tlase kana kwa ofising ya Mokgatlho e e thusang naga ya gaeno.

Accounting Office

Watch Tower Bible and Tract Society of Pennsylvania

Private Bag X2067,

Krugersdorp, 1740,

South Africa

Nomoro ya mogala: (011) 761-1000

[Lebokoso mo go tsebe 28]

Bana le Bone ke Baabi ba ba Thamileng!

Ke rata go lo abela madi ano gore lo re direle dibuka tse di oketsegileng. Ke ile ka kgobokanya madi ano ka go nna ke thusa papa. Ke a lo leboga ka tiro e kgolo elo e dirang.—Pamela, wa dingwa-ga tse supa.

Ke lo romelela R43,30 gore lo kgone go aga Diholo Tsa Bogosi tse di oketsegileng. Ke ile ka e kgobokanya ka go rekisa lemoneite mo mmileng ka nako ya malatsi a boikhutso.—Selena, wa dingwa-ga tse thataro.

Ke ntse ke elamisa kgogo e e neng ya ntsalela mokoko le kgogo e nngwe. Eno ya bofelo ke ne ka e tshwaela Jehofa. Kgabagare e neya tsala dikgo-go tse tharo, mme ke ne ka di rekisa. Ke romela madi ano a tsone gore a dirisediwe tiro ya ga Jehofa.—Thierry, wa dingwaga tse robedi.

Madi ano ke otlhe a ke nang le one! Tsweetswee a diriseng sentle. Ke a kgobokantse ka bothata. Ke romela R133.—Sarah, wa dingwaga tse di lesome.

Ke ne ka bona maduo a ntlha mo tirong ya se-kolo, ka jalo ke ne ka tskwanelwa ke go tsenela kgaisano ya kgaolwana ya rona. Le kwa go yone ke ne ka bona maduo a ntlha mme go tswa foo ka bona a bobedi mo go ya makgaolakgang ya kgaoka maikaelelo a bogagapa. Ka gone, go aba jalo go dira gore batho ba ba abang ba itumele le go se-gofadiwa ke Modimo. (Malaki 3:10; Mathaio 6: 1-4) Tota le bana ba Basupi ba ga Jehofa ba itshu-pa e le baabi ba ba pelotshweu le ba ba thamileng. Ka sekai, morago ga gore Allison wa dingwaga tse nnè a utlwalele tshenyo e e neng e bakilwe ke kgwanyape kwa go nngwe ya dinaga tsa United States, o ne a ntsha moneelo wa $2 (R12). 0 ne a kwala jaana: “Ano ke madi otlhe a ke nang le one mo bankeng. Ke a itse gore bana ba bangwe ba la-tlhegetswe ke ditshamekisi tsa bone le dibuka le bompopo. Gongwe lo ka dirisa madi ano go reke-la mosetsana mongwe wa dingwaga tsa me buka.“ Maclean, wa dingwaga tse robedi o ne a bolela gore o itumelela gore ga go ope wa bakaulengwelo. Mo go tsone tsotlhe ke ne ka abelwa madi. Ke rata go abela Mokgatlho mangwe a one. Ke iku-tlwa gore ke kgonne go bona maduo ano ka thuso ya thapiso eke e neelwang kwa Sekolong sa Bo-diredi sa Puso ya Modimo. Ke ne ka ikutlwa ke ri-tibetse fa ke ne ke neela pego ya me fa pele ga baa-tlhodi ba kgaisano.—Amber, wa mophato wa bonè.

Ke rata go lo naya seno gore lo se neye Jehofa. Mmotseng gore lo direng ka sone. O itse tsotlhe.—Karen, wa dingwaga tse thataro.

[Ditshwantsho mo go tsebe 25]

Ditiro tsa Basupi ba ga Jehofa di engwa nokeng ka meneelo e e ntshiwang ka go rata