Go Sepela le Modimo—Ka Bosakhutleng

“Re tlaa sepela ka leina la ga Jehofa Modimo wa rona, ka bosakhutleng le ka bosaengkae.”—MIKA 4:5.

1. Ke eng fa re ka re Jehofa ke “Kgosi ya bosafeleng”?

JEHOFA MODIMO ga a ka a nna le tshimologo. O bidiwa sentle go twe ke “Mogologolo wa Malatsi,” ka gonne o sa le a le gone ka bosenangtshimologo. (Daniele 7:9, 13, NW) Mme gape Jehofa o tla aga a le gone ka bosenangbokhutlo. Ke ene fela yo e leng “Kgosi ya bosafeleng.” (Tshenolo 10:6; 15:3) Mo go ene, dingwaga di le sekete “di ntse jaaka maabane fela fa a fetile, le jaaka tiso ya bosigo fela.”—Pesalema 90:4.

2. (a) Maikaelelo a Modimo ke eng ka batho ba ba kutlo? (b) Re tshwanetse go tlhoma ditsholofelo le dithulaganyo tsa rona mo go eng?

² E re ka Monei wa botshelo a tshela ka bosaengkae, o ne a ka naya banyalani ba ntlha ba batho, Adame le Efa, tsholofelo ya go tshelela ruri mo Paradaiseng. Le fa go ntse jalo, ka ntlha ya go tlhoka kutlo, Adame o ne a latlhegelwa ke tshiamelo ya go tshela ka bosakhutleng, a fetisetsa boleo le loso mo baneng ba gagwe. (Baroma 5:12) Mme gone, go tsuologa ga ga Adame ga go a fetola maikaelolo a Modimo a kwa tshimologong. Ke thato ya ga Jehofa gore batho ba ba kutlo ba tshele ka bosakhutleng, mme ga a kitla a palelwa ke go diragatsa thato ya gagwe. (Isaia 55:11) A bo go tshwanela jang ne gore re tlhome ditsholofelo le dithulaganyo tsa rona mo go direleng Jehofa ka bosakhutleng. Le fa gone re batla go aga re akantse ka “letsatsi la ga Jehofa,” go botlhokwa thata gore re se ka ra lebala gore maikaelelo a rona ke go sepela le Modimo ka bosaengkae.—2 Petere 3:12.

Jehofa o Tsaya Kgato ka Nako E a E Tlhomileng

3. Re itse jang gore Jehofa o na le “nako e e tlhomilweng” go diragatsa maikaelelo a gagwe?

³ Re rata thata go diragatsa thato ya Modimo ka gonne re le batho ba ba sepelang le ene. Re a itse gore Jehofa ke Mmolokanako yo Mogolo e bile re mo tshepa re sa belaele gore ga a ke a palelwa ke go diragatsa maikaelelo a gagwe ka nako e a e tlhomileng. Ka sekai, “e rile tekanyetso e e tletseng ya nako e goroga, Modimo wa romela Morwaone.” (Bagalatia 4:4) Moaposetoloi Johane o ne a bolelelwa gore go ne go na le “nako e e tlhomilweng” e dilo tsa boporofeti tse a neng a di bona ka tsela ya ditshwantsho di neng di tlile go diragadiwa ka yone. (Tshenolo 1:1-3) Go na le “nako e e tlhomilweng ya gore baswi ba atlholwe.” (Tshenolo 11:18) Mo e ka nnang go feta dingwaga tse 1900 tse di fetileng, moaposetoloi Paulo o ne a tlhotlhelediwa go re, Modimo “o tlhomile letsatsi le [ka lone] o ikaelelang go atlhola lefatshe le le nang le banni ka tshiamo.”—Ditiro 17:31.

4. Re itse jang gore Jehofa o ikaeletse go fedisa tsamaiso eno e e boikepo ya dilo?

⁴ Jehofa o tla fedisa tsamaiso eno e e boikepo ya dilo ka gonne leina la gagwe le a tlhapadiwa gompieno mo lefatsheng. Baikepi ba atile. (Pesalema 92:7) Ba tlhapatsa Modimo ka mafoko le ka ditiro mme go mo utlwisa botlhoko tota go bona batlhanka ba gagwe ba sotlwa le go bogisiwa. (Sakaria 2:8) Ga go gakgamatse go bo Jehofa a ikaeletse go tloga a nyeletsa mokgatlho otlhe wa ga Satane! Modimo o setse a beile nako e e tlhomameng e seno se tlileng go direga ka yone, mme go diragadiwa ga boporofeti jwa Baebele go supa sentle gore gone jaanong re tshela mo ‘motlheng wa bokhutlo.’ (Daniele 12:4) O tla tloga a tsaya kgato gore botlhe ba ba mo ratang ba bone masego.

5. Lote le Habakuke ba ne ba ikutlwa jang ka maemo a a neng a ba dikologile?

⁵ Batlhanka ba bogologolo ba ga Jehofa ba ne ba eletsa thata go bona boikepo bo fedisiwa. Lote yo o siameng o ne a “tshwenyegile thata ka go itlhapedisa mo boitshwarong jo bo repileng ga batho ba ba tlhokomologang molao.” (2 Petere 2:7) Moporofeti Habakuke o ne a ikuela jaana ka ntlha ya go hutsafadiwa ke maemo a a neng a mo dikologile: “Jehofa, ke tlaa goa ka lobaka lo lo kae mme o ntse o gana go utlwa? Ke goele koo go wena ka ga bothubako, mme o gana go boloka. Ana o ntshupetsa boikepo ka ntlha yang, mme o lebelang logwadi? Gonne thopo le thubako di fa pele ga me; e bile go kgang, komano le yone e a tsoga.”—Habakuke 1:2, 3.

6. Jehofa o ne a reng fa a ne a araba thapelo ya ga Habakuke, mme re ka ithuta eng mo go seno?

⁶ Bontlhabongwe jwa mafoko a Jehofa o neng a araba Habakuke ka one ke ano: “Ponatshegelo e sa ntse e na le lobaka lo lo laotsweng, mme e be e itlhaganelela bokhutlo, ga e ketla e aka; le fa e ko e diega, lo e lete; gonne ruri e tlaa tla, ga e ketla e diega.” (Habakuke 2:3) Ka jalo, Modimo o ne a mo itsise gore o tla tsaya kgato ka “lobaka lo lo laotsweng.” Le fa go ka lebega e kete Jehofa o a diega, o tla diragatsa maikaelelo a gagwe—a ka se palelwe!—2 Petere 3:9.

Go mo Direla ka Tlhoafalo e Kgolo

7. Le mororo Jesu a ne a sa itse sentle gore letsatsi la ga Jehofa le tla tla leng, o ne a tswelela pele a dira ditiro tsa gagwe jang?

⁷ A go tlhokega gore re itse pele nako e e tlhomameng ya ga Jehofa e dilo tseno di tlileng go direga ka yone pele ga re ka sepela le Modimo ka tlhoafalo? Nnyaa, ga go a nna jalo. Akanya dikai dingwe. Jesu o ne a kgatlhegela thata go itse nako e thato ya Modimo e tlileng go dirwa ka yone mo lefatsheng jaaka kwa legodimong. Ee, Keresete o ne a ruta barutwa ba gagwe go rapela jaana: “Rraarona yo o kwa magodimong, a leina la gago le itshepisiwe. A bogosi jwa gago bo tle. A thato ya gago e diragale le mo lefatsheng, jaaka kwa legodimong.” (Mathaio 6:9, 10) Le fa Jesu a ne a itse gore kopo eno e tla arabiwa, o ne a sa itse nako e tota go neng go tlile go direga ka yone. Mo boporofeting jwa gagwe jo bogolo jo bo malebana le bokhutlo jwa tsamaiso eno ya dilo, o ne a re: “Malebang le letsatsi leo le ura eo ga go na ope yo o itseng, lefa e le baengele ba magodimo kgotsa Morwa, fa e se Rara fela.” (Mathaio 24:36) E re ka Jesu Keresete e le ene motho wa konokono mo go diragatseng maikaelelo a Modimo, o tla bo a na le seabe ka tlhamalalo mo go fediseng baba ba ga Rraagwe wa selegodimo. Le fa go ntse jalo, ka nako ya fa Jesu a ne a le mo lefatsheng, le ene o ne a sa itse nako e Modimo a neng a tlile go tsaya kgato ka yone. A seo se ne sa dira gore a se ka a direla Jehofa ka tlhoafalo e kgolo? Legoka! E ne ya re fa ba bona Jesu a phepafatsa tempele ka tlhoafalo, “barutwa ba gagwe ba gakologelwa gore go kwadilwe jaana: ‘Tlhoafalo ya ntlo ya gago e tla nja e mphetsa.’” (Johane 2:17; Pesalema 69:9) Jesu o ne a aga a tshwaregile thata ka tiro e a neng a romilwe go e dira, mme o ne a e dira ka tlhoafalo e kgolo. Gape o ne a direla Modimo a ikaeletse go dira jalo ka bosakhutleng.

8, 9. Fa barutwa ba ne ba botsa ka go tsosolosiwa ga Bogosi, ba ne ba tewa ga tweng, mme ba ne ba tsiboga jang?

⁸ Go ne go ntse jalo le ka barutwa ba ga Keresete. Jesu o ne a kopana le bone pele fela ga gore a tlhatlogele legodimong. Pego e bolela jaana: “Jaanong, e rile ba kopane, ba simolola go mmotsa ba re: ‘Morena, a o busetsa bogosi mo Iseraele ka nako eno?’” Le bone fela jaaka Mong wa bone ba ne ba eletsa thata gore Bogosi bo tle. Mme Jesu o ne a araba jaana: “Ga se ga lona go nna le kitso ya dinako kgotsa dipaka tse Rara a di beileng mo taolong ya gagwe; mme lo tla amogela maatla fa moya o o boitshepo o goroga mo go lona, mme lo tla nna basupi ba me mo Jerusalema mmogo le mo Judea yotlhe le Samarea le go ya karolong e e kwa kgakalakgakala ya lefatshe.”—Ditiro 1:6-8.

⁹ Ga go bonale fa barutwa ba ile ba kgopisiwa ke karabo eno. Go na le moo, ba ne ba semelela ka tlhoafalo mo tirong ya go rera. Mo dibekeng di sekae fela ke fa ba setse ba tladitse Jerusalema ka thuto ya bone. (Ditiro 5:28) Mme mo dingwageng tse 30, ba ne ba setse ba atolositse tiro ya bone ya go rera thata jaana mo Paulo a neng a ka re dikgang tse di molemo di ne tsa rerwa “mo tlhōlong yotlhe e e leng tlase ga legodimo.” (Bakolosa 1:23) Le mororo Bogosi bo ile jwa se ka jwa ‘busediwa Iseraele’ le go tlhongwa kwa legodimong mo motlheng wa barutwa jaaka fa ba ne ba solofetse, ba ne ba nna ba direla Jehofa ka tlhoafalo ba ikaeletse go dira jalo ka bosakhutleng.

Go Sekaseka Maitlhomo a Rona

10. Go se itse nako e Modimo a tlileng go fedisa tsamaiso ya ga Satane ka yone go re naya tshono ya go supa eng?

¹⁰ Batlhanka ba ga Jehofa ba gompieno le bone ba eletsa go bona tsamaiso eno e e boikepo ya dilo e fedisitswe. Le fa go ntse jalo, maitlhomo a rona a magolo ga se go falolela mo lefatsheng le lesha le Modimo a le solofeditseng. Re batla go bona leina la ga Jehofa le itshepisiwa le bolaodi jwa gagwe bo tlotlomadiwa. Ka ntlha ya seno, re ka itumelela go bo Modimo a sa re bolelela ‘letsatsi le ura’ tse a tlileng go fedisa tsamaiso ya ga Satane ka tsone. Seno se re naya tshono ya go supa gore re ikemiseditse go sepela le Modimo ka bosaengkae ka gonne re mo rata e seng ka ntlha ya mekgele mengwe ya bogagapa ya nakwana.

11, 12. Boikanyegi jwa ga Jobe bo ne jwa gwetlhiwa jang, mme kgwetlho eo e amana jang le rona?

¹¹ Go nna re ikanyega mo Modimong gape go re thusa go bontsha gore Diabolo o ne a bua maaka fa a ne a re Jobe yo o siameng—le batho botlhe ba ba tshwanang le ene—o direla Modimo fela ka go bo a batla go bona melemo mengwe. Morago ga gore Jehofa a tlhalose motlhanka wa gagwe Jobe e le monna yo o se nang molato, yo o siameng, yo o boifang Modimo, Satane o ne a bua jaana ka boikepo: “A Jobe o boifa Jehofa ka lefela? A ga o a mmeela mo tikologong ya gagwe le ntlo ya gagwe le tsotlhe tse o nang natso ka ntlha tsotlhe? O segofaditse tiro ya diatla tsa gagwe, le dithuo tsa gagwe di atile mo lefatsheng. A ko o ntshe seatla sa gago jaana, o ame tsotlhe tse o nang natso, mme o tlaa go itatola mo matlhong a gago.” (Jobe 1:8-11) Jobe o ne a supa fa mafoko ano a le maaka ka go nna a ikanyega le fa a ne a lebane ke diteko.

¹² Le rona, ka go nna re ikanyega, re ka senola fa ditatofatso tsa ga Satane tsa gore re direla Modimo fela ka go bo a tlile go re duela di le maaka. Go se itse nako e e tlhomameng e Modimo a tlileng go ipusolosetsa ka yone mo bathong ba ba boikepo go re naya tshono ya go supa gore ruri re rata Jehofa e bile re batla go sepela mo ditseleng tsa gagwe ka bosakhutleng. Go supa gore re ikanyega tota mo Modimong e bile re tshepa tsela ya gagwe ya go dira dilo. Mo godimo ga moo, go se itse letsatsi le ura eo go re thusa go nna re thantse e bile re tsogile mo semoyeng ka gonne re lemoga gore bokhutlo bo ka nna jwa goroga nako nngwe le nngwe, fela jaaka legodu bosigo. (Mathaio 24:42-44) Ka go nna re sepela le Jehofa letsatsi le letsatsi, re dira gore a itumele e bile re dira gore a kgone go araba Diabolo yo o mo kgobang.—Diane 27:11.

Rulaganyetsa Bosakhutleng!

13. Baebele e supa eng malebana le go rulaganyetsa isagwe?

¹³ Batho ba ba sepelang le Modimo ba a itse gore go molemo go rulaganyetsa isagwe sentle. Ka ntlha ya go itse mathata le dikgoreletsi tsa botsofe, batho ba le bantsi ba leka go dirisa bosha jwa bone le nonofo ya bone ka botlalo e le gore ba nne le madi a a lekaneng go ba tlhokomela moragonyana mo botshelong. Mme he, go tweng ka isagwe ya rona ya dilo tsa semoya e e botlhokwa le e leng go feta? Diane 21:5 ya re: “Dikgopolo tsa batlhoafadi di ganelela kwa letlotlong fela, mme mongwe le mongwe yo o potlakang o potlakela go ya kwa go tlhokeng fela.” Ruri go mosola go rulaganya o akantse ka bosakhutleng. E re ka re sa itse sentle gore tsamaiso eno ya dilo e tlile go fedisiwa leng, re tshwanetse go akanyetsa dilo tse re tla di tlhokang mo isagweng. Mme gone, a re nneng tekatekano mme re dire gore dilo tsa Modimo di tle pele mo botshelong jwa rona. Batho ba ba tlhaelang tumelo ba ka nna ba re ga go botlhale go dira gore botshelo jwa rona bo remelele mo go direng go rata ga Modimo. A mme go ntse jalo?

14, 15. (a) Jesu o ne a bua setshwantsho sefe malebana le go rulaganyetsa isagwe? (b) Ke eng fa monna wa mohumi wa setshwantsho sa ga Jesu a ne a sa bonele kgakala?

¹⁴ Jesu o ne a bua setshwantso se se re nayang lesedi ka kgang eno. O ne a re: “Lefatshe la monna mongwe yo o humileng le ne le ungwa sentle. Ka gone a simolola go akanya, a re, ‘Ke tla dirang, ka jaanong ke se na gope fa ke ka phuthelang thobo ya me gone?’ Jalo a re, ‘Ke tla dira seno: Ke tla rutlolola matlo a me a polokelo ke ba ke aga a magolwane, mme ke tla phuthela mabele otlhe a me koo le dilo tse di molemo tsotlhe tsa me; mme ke tla raya moya wa me ke re: “Moya, o na le dilo tse di molemo di le dintsi tse di beetsweng dingwaga di le dintsi; nna ka phuthologo, ja, nwa, ijese monate.”’ Mme Modimo wa mo raya wa re, ‘Wena yo o seng kakanyetso, mo bosigong jono ba batla moya wa gago ka kgang mo go wena. Ke mang, he, yo o tla tsayang dilo tse o di bolokileng?’ Go nna jalo ka monna yo o ipeelang letlotlo mme a sa huma malebang le Modimo.”—Luke 12:16-21.

¹⁵ A Jesu o ne a kaya gore monna yono wa mohumi o ne a sa tshwanela go bo a ile a dira gore a nne le dithoto tse di neng di tla mo tlhokomela mo isagweng? Ga go a nna jalo ka gonne Dikwalo di re kgothaletsa gore re dire ka natla. (2 Bathesalonika 3:10) Phoso ya monna yono wa mohumi e ne e le gore ga a ka a dira dilo tse di neng di tlhokega gore a ‘hume malebang le Modimo.’ Le fa a ka bo a ile a kgona go ja dikhumo tsa gagwe ka dingwaga tse dintsi, kgabagare o ne a tla swa. O ne a bonela fela fa gaufi, a sa akanye ka bosakhutleng.

16. Ke eng fa re ka tshepa Jehofa re sa belaele gore o tla re naya isagwe e e sireletsegileng?

¹⁶ Go sepela le Jehofa o akantse ka bosakhutleng go molemo e bile go supa gore o bonela kgakala. Ke tsela e e molemo go gaisa tsotlhe ya go rulaganyetsa isagwe. Le fa gone go le molemo go dira dithulaganyo tse di siameng malebana le sekolo, tiro le maikarabelo a lelapa, le ka motlha re se lebale gore Jehofa ga a ke a latlha batlhanka ba gagwe ba ba ikanyegang. Kgosi Dafide o ne a opela jaana: “Nkile ka ne ke le lekau mme jaana ke tsofetse; le fa go ntse jalo ga ke ise nke ke bone mosiami a latlhilwe, le fa e le bana ba gagwe ba legalegela dijo.” (Pesalema 37:25) Jesu le ene o ne a re tlhomamisetsa gore Modimo o tla tlamela botlhe ba ba senkang pele Bogosi jwa gagwe le go sepela mo ditseleng tsa ga Jehofa tsa tshiamo.—Mathaio 6:33.

17. Re itse jang gore bokhutlo bo gaufi?

¹⁷ Le fa re direla Modimo re akantse ka bosakhutleng, re sa ntse re nna re akantse ka letsatsi la ga Jehofa. Go diragadiwa ga boporofeti jwa Baebele go supa sentle gore letsatsi leo le gaufi. Lekgolo leno la dingwaga le ile la aparelwa ke dintwa, leroborobo la malwetse, dithoromo tsa lefatshe, go tlhaela ga dijo, go bogisiwa ga Bakeresete ba boammaaruri le go rerwa ga dikgang tse di molemo tsa Bogosi jwa Modimo mo lefatsheng lotlhe. Dilo tseno tsotlhe ke sesupo sa bokhutlo jwa tsamaiso eno e e boikepo ya dilo. (Mathaio 24:7-14; Luke 21:11) Lefatshe le tletse ka “baithati, barati ba madi, baipegi, ba ba mabela, batlhapatsi, ba ba sa utlweng batsadi, ba ba sa lebogeng, ba ba sa ikanyegeng ka nitamo, ba ba se nang katamalano e e bothitho ya tlholego, ba ba sa batleng go tsena mo tumalanong epe, basenyabathomaina, ba ba se nang boikgapo, ba ba bogale bo tshabegang, ba ba se nang lorato lwa bomolemo, ba ba neelang batho ka boferefere, ba ba tlhogoethata, ba ba gogomosiwang ke boikgogomoso, barati ba menate go na le barati ba Modimo.” (2 Timotheo 3:1-5) Mo malatsing ano a a boima a bofelo, botshelo bo bokete mo go rona batlhanka ba ga Jehofa. A bo re tlhoafaletse letsatsi le Bogosi jwa ga Jehofa bo tla nyeletsang boikepo jono jotlhe jang ne! Mme gone, a gone jaanong re ititeyeng sehuba gore re tla sepela le Modimo ka bosakhutleng.

Go mo Direla ka Tebelelo ya Botshelo Jo bo Sa Feleng

18, 19. Ke eng se se bontshang gore batho ba bogologolo ba ba neng ba ikanyega ba ne ba direla Modimo ba akantse ka bosakhutleng?

¹⁸ Fa re ntse re sepela le Jehofa, a re se lebaleng tumelo ya ga Abele, Enoke, Noa, Aborahame le Sara. Fa Paulo a sena go ba umaka, o ne a kwala jaana: “Bano botlhe ba ne ba swa ba na le tumelo, le mororo ba ne ba se ka ba bona go diragadiwa ga ditsholofetso, mme ba ne ba di bona di le kgakala thata ba ba ba di amogela mme ba bolela phatlalatsa gore e ne e le basaitsiweng le baagi ba nakwana mo lefatsheng leo.” (Bahebera 11:13) Baikanyegi bao ba ne ba “gabalalela lefelo le le botoka, ke gore, le eleng la legodimo.” (Bahebera 11:16) Ka tumelo ba ne ba tlhoafalela lefelo le le botoka le le busiwang ke Bogosi jwa Modimo jwa ga Mesia. Re ka tlhomamisega gore Modimo o tla ba duela ka botshelo jo bosakhutleng mo lefelong le le botoka—Paradaise ya mo lefatsheng e e busiwang ke puso ya Bogosi.—Bahebera 11:39, 40.

¹⁹ Moporofeti Mika o ne a tlhalosa boikemisetso jwa batho ba ga Jehofa jwa go batla go obamela Modimo ka bosakhutleng. O ne a kwala jaana: “Batho ba ditšhaba tsotlhe ba tlaa sepela, mongwe le mongwe ka leina la modimo wa gagwe, mme rona re tlaa sepela ka leina la ga Jehofa Modimo wa rona, ka bosakhutleng le ka bosaengkae.” (Mika 4:5) Mika o ne a direla Jehofa ka boikanyegi go fitlha a swa. Ga go pelaelo gore e tla re morago ga gore moporofeti yoo a tsosiwe mo baswing, o tla tswelela pele a sepela le Modimo ka bosakhutleng. A bo e le sekao se se molemo jang ne mo go rona ba re tshelang mo nakong eno ya bokhutlo!

20. Ke eng se re tshwanetseng go ititaya sehuba go se dira?

²⁰ Jehofa o anaanela tsela e re bontshang go rata leina la gagwe ka yone. (Bahebera 6:10) O a itse gore go thata go nna re ikanyega mo go ene mo lefatsheng leno le le laolwang ke Diabolo. Le fa go ntse jalo, le mororo ‘lefatshe leno le feta,’ “yo o dirang thato ya Modimo o ntse ka bosaengkae.” (1 Johane 2:17; 5:19) Jalo he, a ka thuso ya ga Jehofa re ititeyeng sehuba gore re tla itshokela diteko tse re kopanang le tsone letsatsi le letsatsi. E kete botshelo jwa rona le tsela ya rona ya go akanya di ka ikaega ka masego a a molemo a re a solofeditsweng ke Rraarona wa selegodimo. Go ka nna jalo fa re ka tswelela re sepela le Modimo ka bosakhutleng.—Jude 20, 21.

O ne O ka Araba Jang?

◻ Maikaelelo a Modimo ke eng ka batho ba ba kutlo?

◻ Ke eng fa Jehofa a ise a tseye kgato ya go fedisa batho ba ba boikepo?

◻ Ke eng fa go se itse nako e tota Modimo a tlileng go tsaya kgato ka yone go sa tshwanela go koafatsa tlhoafalo ya rona?

◻ Mengwe ya melemo ya go sepela le Modimo re akantse ka bosakhutleng ke efe?

[Setshwantsho mo go tsebe 17]

Go sepela le Modimo go tlhoka gore re mo direle ka tlhoafalo fela jaaka barutwa ba bogologolo ba ga Keresete