Ba ne Ba Dira go Rata ga Jehofa

Go Itshwarela go Bula Tsela ya Poloko

BARWA ba ga Jakobe ba ba lesome ba ba neng ba eme fa pele ga tonakgolo ya Egepeto ba ne ba fitlhile sephiri se se boitshegang. Dingwaga tse di fetileng ba ile ba rekisa Josefa monnaabone ka mmè mo bokgobeng ka maikaelelo a go raya rraabone ba re Josefa o bolailwe ke sebatana.—Genesise 37:18-35.

Jaanong dingwaga di le 20 morago ga foo, leuba le legolo le pateletsa banna bano ba ba lesome go tla mo Egepeto go tla go reka dijo. Mme dilo ga di ba tsamaele sentle. Tonakgolo ya teng e gape e neng e le molaodi wa dijo e ne ya ba latofatsa ka gore ke ditlhodi. E ne ya tshwara mongwe wa bone mme ya laela ba bangwe gore ba boele gae mme ba tle le monnaabone yo mmotlana e bong Benjamine. Fa ba sena go dira jalo, tonakgolo eno e ne ya loga leano la go dira gore Benjamine a tshwarwe.—Genesise 42:1–44:12.

Juda, mongwe wa barwa ba ga Jakobe o ne a gana. O ne a re: ‘Fa re ka boela morago re se na le Benjamine, rraarona o tla swa.’ Go tswa foo ga direga selo se Juda le ba ba neng ba tlile le ene, ba neng ba sa se lebelela. Morago ga gore tonakgolo e laele gore batho botlhe ba tswe mo phaposing eo kwantle fela ga barwa ba ga Jakobe, e ne ya lelela kwa godimo. Fa a sena go kgaotsa, o ne a re: “Ke nna Josefe.”—Genesise 44:18–45:3.

Bopelonomi le Kgololo

Josefa o ne a botsa bomogoloe a re: “A rre o sa ntse a tshedile?” Ba se ka ba mo araba. Ee, bomogoloe Josefa ba ne ba gakegile. A ba itumele, kana ba tshoge? Kana dingwaga tse 20 tse di fetileng ba ile ba rekisa monna yono mo bokgobeng. Josefa o ne a na le thata ya go ka ba latlhela mo kgolegelong, ya go ba busetsa gae ba sa tshola dijo, kana—se se maswe le go feta—go ba bolaya! Bomogoloe Josefa ba ne ba na le lebaka le le utlwalang la go “retelelwa ke go mo fetola; gonne ba huduilwe ke go mmona.”—Genesise 45:3.

Josefa o ile a itlhaganelela go ritibatsa banna bano maikutlo. O ile a re: “Ke a lo rapela, a ko lo nkatamele.” Ba ne ba dira jalo. Go tswa foo o ne a re: “Ke Josefe, monnaa lona, yo lo mo rekisitseng a tlisiwa Egepeto. Jaana lo se ka lwa hutsafala le fa e le go ikgalefela ka gobo lo ne lwa nthekisa ka tla kwano; gonne Modimo o nthomile fa pele ga lona go boloka botshelo.”—Genesise 45:4, 5.

Josefa ga a ka a ba utlwela botlhoko kwantle ga mabaka. O ne a setse a lemogile gore ba a ikwatlhaya. Ka sekai, fa Josefa a ne a latofatsa bomogoloe ka gore ke ditlhodi, o ile a utlwa ba re: “Ruri re molato ka ga monnaa rona . . . ke gone ka fa tlalelo e e tsileng mo go rona ka gone.” (Genesise 42:21) Gape, Juda o ne a ithaopetse go nna lekgoba mo boemong jwa ga Benjamine e le gore mosimane a ke a kgone go boela kwa go rraagwe.—Genesise 44:33, 34.

Ka gone, Josefa o ne a na le lebaka le le utlwalang la go ba itshwarela. Ee, o ne a lemoga gore go dira jalo go ne go tla felela ka gore lelapa lotlhe la gaabo le bolokwe. Ka gone, Josefa o ne a raya bomogoloe a re ba boele kwa go Jakobe rraabone mme ba fitlhe ba mo reye ba re: “Morwao Josefe o bua jaana a re: Modimo o ntirile morena wa lefatshe la Egepeto lotlhe fela, hudugela kwano go nna, o se ka wa diega. O tlaa aga mo lefatsheng la Gošene; o tlaa nna gaufi le nna, wena, le bana ba gago, le bana ba bana ba gago, le matsomane a gago, le matlhape a gago, le tsotlhe tse o nang natso. Ke tlaa go otlela gone.”—Genesise 45:9-11.

Josefa yo Mogolwane

Jesu Keresete a ka bidiwa Josefa yo Mogolwane ka gonne banna bano ka bobedi ba na le dilo tse ba tshwanang ka tsone. Jaaka Josefa, Jesu o ne a tshwarwa makgwakgwa ke bomogoloe, ditlogolwana tsa ga Aborahame jaaka ene. (Bapisa Ditiro 2:14, 29, 37.) Le fa go ntse jalo, banna bano ka bobedi dilo di ne tsa ba tokafalela thata. Morago ga nako, maemo a ga Josefa a go nna lekgoba a ne a fetoga go nna tonakgolo, a fetwa fela ke Faro ka maemo. Jehofa le ene o ne a tsosa Jesu mo baswing mme a mo tlotlomatsa go mmaya mo maemong a a kwa godimo a go nna mo “seatleng sa moja sa Modimo.”—Ditiro 2:33; Bafilipi 2:9-11.

E re ka Josefa e ne e le tonakgolo, o ne a ka abela batho botlhe ba ba tlang kwa Egepeto dijo fa ba tla go di reka. Gompieno, Josefa yo Mogolwane o na le setlhopha sa motlhanka yo o boikanyo le yo o bonokopela se ka sone a abang dijo tsa semoya “ka nako e e tshwanetseng.” (Mathaio 24:45-47; Luke 12:42-44) Ee, batho ba ba tlang kwa go Jesu “ga ba na go tlhola ba tshwarwa ke tlala lefa e le go tlhola ba nyorwa . . . gonne Kwana, yo o mo gare ga setulo sa bogosi, o tla ba disa, e bile o tla ba kaela go ya kwa metsweding ya metsi a botshelo.”—Tshenolo 7:16, 17.

Thuto mo go Rona

Josefa o re tlhomela sekao se se molemo sa go nna kutlwelobotlhoko. Fa a ka bo a ile a gagamatsa dilo thata a ka bo a ile a otlhaya batho bano ba ba ileng ba mo rekisa mo bokgobeng. Kafa letlhakoreng le lengwe, go tseega maikutlo go ka bo go ile ga dira gore a itlhokomolose maleo a bone. Josefa ga a dira sepe sa dilo tseno. Go na le moo, o ile a leka bomogoloe go bona gore a ba a ikwatlhaya. Go tswa foo, fa a sena go lemoga gore khutsafalo ya bone ke ya mmatota, o ne a ba itshwarela.

Re ka etsa Josefa. Fa mongwe yo o re leofetseng a supa go ikwatlhaya ka mmatota, re tshwanetse go mo itshwarela. Ke boammaaruri gore ga re a tshwanela go letla gore go tseega maikutlo go re dire gore re mpampetse maleo a a masisi. Kafa letlhakoreng le lengwe, ga re a tshwanela go letla gore go tshwara ba bangwe ka pelo go re dire gore re gane go ba itshwarela le mororo ba supa go ikwatlhaya ka mmatota. Ka gone a re ‘tsweleleng re iphapaanyelana e bile re itshwarelana re gololesegile.’ (Bakolosa 3:13) Fa re dira jalo re tla bo re etsa Modimo wa rona Jehofa, yo o ‘iketleeditseng go itshwarela.’—Pesalema 86:5; Mika 7:18, 19.