‘Keletso ya go Batla go Itse mo Pelong le mo Mogopolong’

“Ga ke kgone go tlhalosa boitumelo jwa me le boipelo jo bo ntseng bo gola fa ke ntse ke bala buka ya Is There a Creator Who Cares About You? Tota e dira gore motho a ikutlwe a eletsa go itse mo gontsi—nnyaa, a ikutlwe a tlhoka go itse mo gontsi. Ke lebogela go bo lo ile lwa tsosa keletso ya go batla go itse mo pelong le mo mogopolong wa me.”

KE KAFA mongwe wa Basupi ba ga Jehofa go tswa kwa North Carolina, U.S.A., a ileng a ikutlwa ka gone kaga buka e e golotsweng ke Mokgatlho wa Watch Tower kwa Dikopanong Tsa Kgaolo Tsa “Tsela ya Modimo ya Botshelo” ka 1998/99. Le fa e le gore ga o na khopi ya buka eno, ela tlhoko maikutlo a ba bangwe.

Monna mongwe o ne a kwala jaana malatsi morago ga gore a nne le khopi ya gagwe ya buka eno kwa kopanong ya kwa San Diego, California, U.S.A.: “Ke fitlhela buka eno e nonotsha tumelo tota. E dira gore pelo ya me e anaanele thata ditiro tsa ga Jehofa tsa popo. Ke setse ke le mo go tsebe 98, mme ga ke eletse go ipona ke fitlha kwa bofelong jwa yone! E tlisa boitumelo jo bo kgotsofatsang ruri.”

Mosadi mongwe wa kwa Botlhaba o ne a kwala jaana: “Sebui kwa kopanong se ne sa dirisa tlhaloso e e reng ‘buka e e sa tshwaneng le epe,’ mme tlhaloso eo e tshwanela diteng tsa yone tota. Sengwe se se tlhomologileng ka buka eno ke gore ga e pateletse mmadi go dumela gore Modimo o teng, le fa go ntse jalo e tlhalosa dintlha.”

Dintlha tseo di akaretsa dilo tse di kgatlhang tse di ribolotsweng ke saense kaga lobopo lwa rona, botshelo jwa rona, le ka ga rona tota. Seno se kgatlhile batho ba le bantsi. “Ruri ga ke na mafoko a go tlhalosa ka fa bukanyana eno e nkamileng thata ka teng,” go kwadile jalo mosadi mongwe wa kwa California. “Ke ne ke sa kgone go baya buka fa fatshe fa tsebe nngwe le nngwe e ntse e tlhalosa dithibololo tse dingwe tse di oketsegileng ka ga lobopo lwa rona le ka ga botshelo ka bojone. Ruri ke ithutile go le gontsi! Ke tla anaanela bukanyana eno thata mme ke e abele ba le bantsi ka mo nka kgonang ka teng.”

Sengwe se se kgatlhileng batho ba le bantsi ke kafa buka eno e dirang tshobokanyo ya Baebele ka teng, e tlhalosa thata botho jwa Mmopi. Batho ba le bantsi fa ba akgela ba re, “Tlhaloso e e sobokanyang Baebele, e e dirwang go ela kwa bofelong jwa buka, ke nngwe ya ditlhaloso tse di molemo thata tse nkileng ka di bala.” Morago fela ga kopano e e neng e tshwerwe pele kwa New York, U.S.A., yo mongwe o ne a kwala jaana: “Buka eno e ntšha e e sa tswang go gololwa e tshwanetse ya bo e le kgatiso e e gapang maikutlo go gaisa tsotlhe tse lo kileng lwa di kwala. Ke kgatlhilwe thata ke bosupi jwa saense jwa gore go na le Mmopi. Tshobokanyo e e opang kgomo lonaka ka Baebele ka boyone e kgona go tlhalosa dintlha e bo e dira gore o nne le keletso ya go bala mo go oketsegileng.”

Saense e e Kgonang go Tlhaloganngwa

Tshedimoso ya tsa saense e e mo dikgaolong tse di kwa tshimologong e ka lebega e le bokete thata go tlhaloganngwa, mme gone batho ba bantsi ba akgela jaana.

Monna mongwe wa kwa Canada o ne a kwala jaana: “A bo e farologane jang ne le dibuka tsa botegeniki tse bakwadi ba tsone ba lekang go re kgatlha ka mafoko a bone a a raraaneng. Kitso ya lona e tlhomologile ka gonne e dira gore re tlhaloganye motlhofo dithuto tse di jaaka fisikisi, khemiseteri, DNA, dikoromosomo, jalo le jalo. A tlhe lo kabo lo kwadile dibuka tsa yunibesithi tse ke neng ke di ithuta dingwagangwaga tse di fetileng!”

Porofesa nngwe ya fisikisi ya yunibesithi e ne ya kwala jaana: “E tlhalosa dikgang tse di amegang ka phepafalo e sa tsenelele kwa teng ka ditlhaloso tsa botegeniki. Buka eno e beela mmadi mabaka e bo e nopole borasaense ba le bantsi ba ba itsegeng. Eno ke buka ‘e e tshwanetseng ya balwa’ ke motho ope fela yo o kgatlhegelang go itse ka matso a lobopo le botshelo, e ka ne e le rasaense kgotsa motho fela.”

Morweetsana mongwe yo o dirang khoso ya booki o ne a akgela jaana: “Ke ne ke sa dumele matlho a me fa ke bula mo go kgaolo 4 ke bo ke bala mafoko a a nopotsweng mo bukeng e re e dirisang kwa sekolong! Ke ne ka naya porofesa ya rona buka eno mme ka mmolelela gore ke itse gore o tla fitlhela tshedimosetso eo e le monate. Ke ne ka mmontsha tsebe 54 e e buang ka ga boboko. O ne a e ipalela mme a re, ‘E a gogela! Ke tla e sekaseka.’”

Leloko lengwe la palamente kwa Belgium le ne la kwala jaana: “Se se neng sa nkgatlha sa ba sa nkgapa maikutlo e ne e le tlhaloso ka tsa saense e e bontshang gore saense ya segompieno ga e ganetse pono ya Baebele ya gore go na le Modimo o le mongwe fela, mme go na le moo, e dumalana le yone. Eno ke pono e e kgatlhang ruri.”

Go Itse Mmopi Botoka

Buka eno e thusitse batho kwa dinageng di le dintsi go itse Modimo botoka le go ikutlwa ba le gaufi thata le ene. Mmadi mongwe kwa Motseng wa Fukuoka, kwa Japane, o ne a re: “Go ntse jaaka e kete ke ne ka tlosiwa bobi mo matlhong ka ga Jehofa e le lantlha. Buka eno e ntsha mabaka a a utlwalang sentle. Ke ne ka kgona go simolola go itse Jehofa ka tsela e ke neng ke ise ke e akanye go fitlha jaanong.” Motho mongwe wa kwa El Salvador o ne a kwala jaana: “Lo tlhalosa ka phepafalo ka fa Modimo a leng kutlwelobotlhoko, pelontle, bonya go galefa, e bile a tletseng bopelonomi jo bo lorato ka teng. Eleruri, seno ke sone se re se tlhokang tota gore re tsalane thata le ene le Morwawe. Ke yone buka ya ntlha e e tlhalosang maikutlo a ga Jehofa le maikutlo a botho a ga Morwawe, Jesu.” Mme mmadi mongwe kwa Zambia o ne a akgela jaana: “Ke ne ka simolola go tlhaloganya Jehofa ka tsela e ntšha tota.”

Go a utlwala go bo Basupi ba ga Jehofa ba itumeletse go abela batho ba bangwe buka ya Is There a Creator Who Cares About You? Mongwe o ne a re: “Fa ke fetsa go bala kgaolo 10 [“Fa e le Gore Mmopi o a Amega, Ke ka Ntlha Yang Fa go Na le Pogo e e Kana Kana?”], ke ne ka iphitlhela ke rile, ‘Buka eno ke yone tota e re e tlhokang mo Japane!’ Ke batla go itse se se mo kgaolong eno sentle mme ke se dirise mo tirelong ya tshimo nako le nako.” Mosadi yo mongwe o ithuta Baebele le mosetsana yo o goletseng mo tempeleng e rraagwe e leng moperesiti mo go yone. “Go ne go le thata gore a dumele kgang ya Mmopi. Ga go sepe mo tlhalosong ya buka eno se se pateletsang motho, mme gone e ntsha dintlha, ka jalo ke akanya gore le Babuda tota ba ka e bala ba sa etsaetsege. Gape e dira gore re utlwe lorato lwa ga Jehofa mo gogolo.”

Go tswa kwa Engelane mongwe o ne a e tlhalosa jaana: “Ke sa tswa go fetsa buka ya Creator mme ke tla tloga ke simolola go e bala gape. A buka e e molemo! E dira gore motho a rate Jehofa thata. Ke file moagelani wa me e le nngwe, mme e rile a fetsa go bala dikgaolo tse pedi fela a re, ‘Ga ke kgone go e baya fa fatshe, e monate tota.’ Ke dumela gore e tla thusa batho go itse le go rata Mmopi wa rona yo Mogolo.”

Monna mongwe kwa Maryland, U.S.A., o ne a re: “E ntlhotlheleditse tota semoyeng! Ke ikaeletse go neela batho botlhe ba ke dirang kgwebo le bone khopi ya yone. Ka dinako tse dingwe ke fitlhela go le thata go simolola go neela bosupi mo bathong ba ba tshwaregileng le ba ba rutegileng jaana. Jaanong ka buka eno ke tla bona tsela e e gogelang, le e e molemo.”

Ga go pelaelo gore buka eno ya Is There a Creator Who Cares About You? e tla solegela batho mo lefatsheng lotlhe molemo.

[Motswedi wa Setshwantsho mo go tsebe 25]

Cover photo above, Eagle Nebula: J. Hester and P. Scowen (AZ State Univ.), NASA