Ba ne Ba Dira go Rata ga Jehofa

Marea o Tlhopha “Karolo e e Molemo”

MO MOTLHENG wa ga Jesu, basadi ba Bajuda ba ne ba laolwa ke dingwao tsa borabi. Ka gone, ba ne ba sa kgothaletswe go ithuta Molao. Ee ruri, kgopolo nngwe e e nopotsweng mo go Mishnah e ne ya bolela jaana: “Fa monna ope a ka neela morwadie kitso ya Molao go tshwana jaaka e kete o mo rutile boitshwaro jo bo maswe.”—Sotah 3:4.

Ka ntlha ya seo, basadi ba le bantsi ba Judea ya lekgolo la ntlha la dingwaga ba ne ba sa rutega. The Anchor Bible Dictionary e bolela jaana: “Ga go na bosupi jwa gore pele ga bodiredi jwa ga Jesu, basadi ba Bajuda ba ne ba dumelelwa go nna barutwa ba morutisi yo mogolo, re sa bue sepe ka go tsamaya le morutisi yoo, kana go ruta motho ope o sele fa e se bana fela.” Go bontsha go tseela basadi kwa tlase le e leng go feta, baeteledipele bangwe ba bodumedi ba ile ba bo ba tlhoma molao o o neng o laela monna gore a se ka a buisa mosadi fa gare ga batho!

Jesu o ne a sa utlwane le maikutlo a a ntseng jalo a a sa siamang. O ne a ruta basadi le banna, mme balatedi ba gagwe ba ne ba akaretsa banna le basadi. (Luke 8:1-3) Ka nako nngwe, Jesu o ne a lalediwa go nna moeng wa ga Maratha le Marea. (Luke 10:38) Basadi bano ba babedi e ne e le bokgaitsadie Lasaro, mme ka boraro jwa bone e ne e le barutwa e bile e le ditsala tse di molemo tsa ga Jesu. (Johane 11:5) Lelapa leno le ka tswa le ne le tumile, fa re akanya ka palo e e neng ya tla go gomotsa Maratha le Marea fa Lasaro a sena go swa. Le fa go ntse jalo, se se neng sa diragala kwa legaeng la bone fa Jesu a ne a ba etetse e ne ya nna thuto e e molemo e seng fela mo go bone mme gape le mo go rona.

Go Ithuta fa Dinaong Tsa ga Jesu

Kwantle ga pelaelo, Maratha le Marea ba ne ba batla go direla Jesu mokete o mogolo, mme gongwe e ne e le o ba neng ba ka o kgona. (Bapisa Johane 12:1-3.) Le fa go ntse jalo, fa moeng wa bone a goroga, Marea o ne “a nna fa dinaong tsa Morena mme a nna a reetsa lefoko la gagwe.” (Luke 10:39) Go ne go sena ngwao epe ya batho e e neng e ka thibela Jesu go ruta mosadi yo o peloephepa yo o neng a batla go ithuta! Re ka akanya fela Marea a ntse fa pele ga ga Jesu, a ntse jaaka e kete ke morutwana yo o reeditseng ka kelotlhoko thuto ya Mong wa gagwe.—Bapisa Duteronome 33:3; Ditiro 22:3.

Go farologana le Marea, Maratha o ne “a itewa tsebe ke go dira ditiro tse dintsi.” O ne a tshwaregile thata ka ditiro tsa gagwe tse dintsi fa a ntse a baakanyetsa dijo tse dintsi. Go ise go ye kae, Maratha o ne a tshwenngwa ke gore o ne a tlogetswe a dira ditiro tsotlhe fa monnawe ene a ne a ntse fa dinaong tsa ga Jesu! Ka jalo Maratha o ne a tsena Jesu ganong fa a ntse a bua le Marea, gongwe ka tshoganyetso fela, a re: “Morena, a ga go go re sepe go bo morwadiarre a ntlogetse ke dira dilo ke le nosi? Jalo, mmolelele gore le ene a nthuse.”—Luke 10:40.

Gone se Maratha a neng a se kopa se ne se se phoso. Kana e bile, go baakanyetsa setlhopha sa batho dijo ke tiro e e seng kana ka sepe, mme boikarabelo jono ga bo a tshwanela go rwalwa ke motho a le mongwe fela. Le fa go ntse jalo, Jesu o ne a dirisa mafoko a gagwe go ruta thuto e e botlhokwa. O ne a re: “Maratha, Maratha, o a tlhobaela e bile o tshwenyegile ka dilo tse dintsi. Mme, go tlhokega dilo di sekaenyana fela, kgotsa se le sengwe fela. Fa e le ka Marea, ene o kgethile karolo e e molemo, mme ga e na go tsewa mo go ene.”—Luke 10:41, 42.

Jesu o ne a sa bolele gore Maratha o ne a sa kgatlhegele dilo tsa semoya. Go farologana le seo, o ne a mo itse e le mosadi yo o nang le boineelo jwa bomodimo.a Kwantle ga pelaelo ke sone se se dirileng gore a laletse Jesu kwa legaeng la gagabo. Le fa go ntse jalo, mo kgalemong ya ga Jesu e e bonolo, o ne a tlhalosa gore Maratha, ka go tlhoma mogopolo thata mo dijong, o ne a fetwa ke sebakanyana seno sa go amogela thuto ya Morwa Modimo.

Ke boammaaruri gore setso sa motlha oo se ka tswa se ne se tshegetsa kgopolo ya gore mosadi o botlhokwa thata fa a bontsha bothakga mo ditirong tsa gagwe tsa mo gae. Mme mafoko a ga Jesu a ne a bontsha gore basadi, fela jaaka banna, ba ne ba ka nna fa dinaong tsa Morwa Modimo mme ba amogela dipolelo tsa botshelo! (Johane 4:7-15; Ditiro 5:14) Ka ntlha ya seno, go ka bo go ile ga nna molemo thata fa Maratha a ka bo a ile a dira dijo di sekaenyana fela—kana le e leng sejo se le sengwe fela—fa fela se ne se ka mo neela sebaka sa go nna fa dinaong tsa Mong wa gagwe mme a ithuta mo go ene.—Bapisa Mathaio 6:25.

Thuto mo go Rona

Gompieno, batho ba ba amogetseng taletso ya ga Jesu ya gore ba “tseye metsi a botshelo mahala” ba akaretsa banna le basadi. (Tshenolo 22:17) Batho ba bangwe ka ntlha ya go tlhotlhelediwa ke lorato—fela jaaka Maratha—ba dira sotlhe se ba ka se kgonang go direla badumedikabone dilo tse ba di tlhokang. Ba molemo e bile ba bonako go thusa batho ba bangwe, mme Jehofa o ba solofetsa go duela ditiro tsa bone tse di bontshang lorato. (Bahebera 6:10; 13:16) Gongwe ba bangwe ba tshwana thata le Marea. Ba bonolo e bile ba tlhoma mogopolo mo dilong tsa semoya. Go tlhoafalela go tlhatlhanya ka Lefoko la Modimo go ba thusa gore ba nne ba tsepame mo tumelong.—Baefeso 3:17-19.

Mefuta eno e mebedi ya batho e botlhokwa thata mo phuthegong ya Bokeresete. Le fa go ntse jalo, kwa bofelong, botlhe ba tshwanetse go ‘kgetha karolo e e molemo’ ka go tlhoma mogopolo thata mo dilong tsa semoya. Jehofa o tla re amogela e bile o tla re segofatsa, fa re tlhomamisa dilo tse di botlhokwa segolo.—Bafilipi 1:9-11.

[Ntlha e e kwa tlase]