A go Na le Tsholofelo Epe ya Poloko?
Lekgolo la bo20 la dingwaga le ile la bolelwa fa e le lekgolo la dingwaga le go tsholotsweng madi thata mo go lone go gaisa lepe le batho ba kileng ba le bona. Bokebekwa, dintwa, dikgotlhang tsa setso, go sa diriseng diokobatsi sentle, go sa ikanyege le thubakanyo ke tsone tse segolobogolo di ileng tsa oketsega thata mo masomeng a lone a dingwaga a bofelo. Mo godimo ga dilo tseno akaretsa le botlhoko le go boga go go bakwang ke bolwetse, go tsofala le loso. Ke mang yo o sa eletseng go gololwa mo mathateng a mantsi a a leng teng mo lefatsheng gompieno? Fa re ntse re lebeletse isagwe, a go na le tsholofelo epe ya poloko?
AKANYA ka ponatshegelo e moaposetoloi Johane a ileng a e newa dingwaga tse di ka nnang 2 000 tse di fetileng. O ne a kwala jaana: “Bona! Mogope wa Modimo o mo bathong, mme o tla aga le bone, mme ba tla nna batho ba gagwe. Mme Modimo ka boene o tla nna le bone. Mme o tla phimola dikeledi tsotlhe mo matlhong a bone, mme loso lo tla bo lo seyo, le fa e le khutsafalo le fa e le selelo le fa e le botlhoko di tla bo di sa tlhole di le gone. Dilo tsa pele di fetile.” (Tshenolo 21:3, 4) Moporofeti Isaia le ene o ne a bolelela pele jaana: “Ruri o tla kometsa loso ka bosaengkae, mme Morena Molaodimogolo Jehofa o tla phimola dikeledi mo difatlhegong tsotlhe. Mme kgobo ya batho ba gagwe o tla e tlosa mo lefatsheng lotlhe, gonne Jehofa ka boene o go buile.”—Isaia 25:8.
Akanya fela gore go diragadiwa ga ditsholofelo tsa Modimo go tla kaya eng! Batho ba tla namolwa, kana go gololwa mo kgatelelong le mo thubakanyong, mo go bogeng le mo ditlalelong. Ebu, tota le bolwetse, botsofe le loso di tla bo di sa tlhole di re tshwenya! Lefoko la Modimo, Baebele, le re solofetsa botshelo jo bo sa khutleng mo maemong a a itekanetseng mo lefatsheng. (Luke 23:43; Johane 17:3) Mme di ka bonwa ke botlhe ba ba di eletsang. “Thato ya [Modimo ke] gore batho ba mefuta yotlhe ba bolokwe mme ba tle mo kitsong e e leng yone, ya boammaaruri.”—1 Timotheo 2:3, 4.
Le fa go ntse jalo, gore re tle re solegelwe molemo ke ditsholofetso tsa Modimo, re tshwanetse go tlhaloganya seabe se Jesu Keresete a nang naso mo polokong ya rona mme re dumele mo go ene. Jesu ka boene o ne a re: “Modimo o ratile lefatshe mo go kalo mo a bileng a ntsha Morwawe yo o tsetsweng a le esi, gore mongwe le mongwe yo o dumelang mo go ene a se ka a senngwa mme a nne le botshelo jo bo sa khutleng.” (Johane 3:16) Fa moaposetoloi Petere a ne a bua ka seabe se segolo sa ga Jesu Keresete mo kgannyeng eno, o ne a re: “Ga go na poloko mo go ope o sele, gonne ga go na leina le lengwe kafa tlase ga legodimo le batho ba le neilweng le re tshwanetseng go bolokwa ka lone.” (Ditiro 4:12) Moaposetoloi Paulo le tsala ya gagwe Silase ba ne ba kgothaletsa motho mongwe jaana yo o neng a batla go itse ka tlhoafalo: “Dumela mo go Morena Jesu mme o tla bolokwa, wena le ba ntlo ya gago.”—Ditiro 16:30, 31.
Ee, Jesu Keresete ke “Moemedi yo Mogolo wa botshelo,” mme poloko e ka kgonega fela ka ene. (Ditiro 3:15) Mme go tla jang gore motho a le mongwe fela a nne le seabe se segolo jaana mo polokong ya rona? Go tlhaloganya seabe sa gagwe sentle malebana le kgang eno go tshwanetse ga nonotsha tsholofelo ya rona ya go bolokwa.
[Metswedi ya Ditshwantsho mo go tsebe 2]
Page 3: Bombers: USAF photo; starving children: UNITED NATIONS/J. FRAND; burning battleship: U.S. Navy photo