Pego ya Baboledi ba Bogosi
Batho ba ba Ikanyegang ba Galaletsa Jehofa
BASUPI BA GA JEHOFA go dikologa lefatshe—ba basha le ba ba godileng—ba itsiwe e le batho ba ba ikanyegang. Akanya ka dikai tseno tse di tswang kwa dikontinenteng tse tharo.
Letsatsi lengwe Olusola wa dingwaga tse 17, yo o nnang kwa Nigeria, o ne a ya gae a tswa sekolong fa a sela sepatšhe. O ne a se isa kwa mogokgong wa sekolo, yo o neng a bala madi a a mo go sone, a e neng e le diranta tse di ka nnang 280. Mogokgo o ne a busetsa sepatšhe mo morutabaneng yo o neng a latlhegetswe ke sone. Morutabana yoo o ne a leboga Olusola ka go mo naya diranta tse di ka nnang 45 mme a mo raya a re a duele madi a gagwe a sekolo ka one. Fa barutwana ba bangwe ba utlwa ka se se diragetseng, ba ne ba sotla Olusola. Dibeke di le mmalwa morago ga moo, morutwana mongwe o ne a bega gore madi a gagwe a utswilwe, ka jalo barutabana ba ne ba kopiwa gore ba phuruphutshe barutwana botlhe. Morutabana mongwe o ne a raya Olusola a re: “Wena, emela fano. Ke itse gore e re ka o le Mosupi wa ga Jehofa, ga o utswe.” Madi ao a ne a fitlhelwa mo basimaneng ba babedi ba ba neng ba sotlile Olusola, mme ba ne ba otlhaiwa botlhoko. Olusola o ne a kwala jaana: “Ke itumela thata go bo ke itsiwe ke le Mosupi wa ga Jehofa, yo o sa utsweng, mme ka go dira jalo ke galaletsa Jehofa.”
Letsatsi lengwe fa Marcelo, yo o tsholetsweng kwa Argentina, a tswa kwa gae, o ne a sela sutukeisi dimetara di le mmalwa go tswa mo kgorong e e kafa morago ya ntlo ya gagwe. O ne a tsena mo ntlong ka yone, mme ene le mosadi wa gagwe ba ne ba e bula ka kelotlhoko. Ba ne ba gakgamala thata fa ba fitlhela madi a mantsi mo go yone, dikarata tsa go reka, ditšheke di le mmalwa tse di saenilweng, e nngwe ya tsone e neng e le ya diranta di le dimilione tse pedi. Mo sutukeising eno, ba ne ba fitlhela go na le nomoro ya founo mo pampiring e e supang sekoloto se a neng a na le sone. Ba ne ba leletsa mong wa sutukeisi mogala mme ba rulaganya go kopana le ene kwa Marcelo a neng a bereka gone go mmusetsa yone le dilo tse di mo teng ga yone. Fa mong wa yone a goroga, o ne a lebega a tshwenyegile. Mothapi wa ga Marcelo o ne a mmolelela gore a ritibale, ka gonne Marcelo e ne e le mongwe wa Basupi ba ga Jehofa. Mong wa sutukeisi o ne a naya Marcelo diranta di le 40 fela e le tuelo ya go bo a bone sutukeisi. Seno se ne sa galefisa mothapi wa ga Marcelo fela thata ka gonne o ne a kgatlhilwe thata ke boikanyegi jwa ga Marcelo. Seno se ne sa naya Marcelo tshono ya go tlhalosa gore e re ka e le mongwe wa Basupi ba ga Jehofa, o batla go ikanyega ka metlha.
Go tswa kwa Kyrgyzstan go na le maitemogelo a a latelang. Rinat, e bong mosimanyana mongwe wa dingwaga di le thataro, o ne a sela sepatšhe sa mosadi mongwe yo o neng a nna gaufi le bone. Sepatšhe seo se ne se na le madi a a kana ka diranta di le 150. Fa Rinat a busetsa mosadi yono sepatšhe sa gagwe se se latlhegileng, mosadi yono o ne a bala madi ao mme a bolelela mmaagwe Rinat gore go ne go nyeletse madi a a kana ka diranta di le 30. Rinat o ne a mmolelela gore ga a tsaya madi ao. Morago ga moo ba ne ba tswela botlhe kwa ntle go ya go batla madi ao a a nyeletseng mme ba ne ba a fitlhela gaufi le fa sepatšhe se neng se fitlhetswe gone. Mosadi yono o ne a gakgametse. O ne a leboga Rinat le mmaagwe, sa ntlha ka go bo ba ile ba mmusetsa madi a a latlhegileng, mme sa bobedi, ka ntlha ya go bo mmaagwe Rinat a mo godisitse ka tsela ya Bokeresete.