Ke Thuto ya Mofuta Ofe E e Ka Dirang Gore o Atlege mo Botshelong?

AO KILE wa ikutlwa o fekeediwa ke mathata mo e leng gore go ne go ntse jaaka e kete o nwela mo bodibeng jwa metsi? Akanya fela gore o ne o tla sotlega jang fa o ne o ka dira phoso fa o leka go fenya mangwe a mathata ao! Ga go na ope yo o tshotsweng a na le bokgoni jwa go rarabolola mathata otlhe ka katlego, yo o dirang ditshwetso tse di siameng nako le nako. Ke lone lebaka la go bo thuto e le botlhokwa. O ka bona kae thuto e e ka go thusang gore o ipaakanyetse go lebana le mathata a botshelo?

Batho ba bantsi, bannye le bagolo, ba tseela thutego ya sekolo kwa godimo thata. Baitse bangwe e bile ba re ba “dumela ka botlalo gore o ka se bone tiro [e e siameng] fa o se na dikirii ya kholetšhe.” Le fa go ntse jalo, go na le dilo tse batho ba di tlhokang, tse ba ka se di boneng mo dilong tse ba ka kgonang go di fitlhelela. Ka sekai, a thuto e e kwa godimo e tla go thusa gore o nne motsadi, molekane wa lenyalo kana tsala e e molemo? Ee, batho ba ba tseetsweng kwa godimo ka ntlha ya go bo ba rutegile thata ba ka nna ba nna le botho jo bo maswe, ba palelwa ke go atlega mo botshelong jwa bone jwa lelapa, kana ba feleletsa ba ipolaile.

Ba bangwe ba batla kaelo mo bodumeding, jo e leng mofuta mongwe wa thuto, mme ba kgobega marapo ka gonne ba sa bone thuso e ba e tlhokang go lebana le mathata a botshelo. Ka sekai Emiliaa wa kwa Mexico, a re: “Dingwaga di le 15 tse di fetileng ke ne ka lemoga gore nna le monna wa me re ne re ka se tlhole re kgona go nna mmogo. Re ne re tlhola re ngangisana. Ke ne ke sa kgone go dira gore a emise go nwa bojalwa. Kgapetsakgapetsa ke ne ke tlogela bana ba rona ba bannye ba le nosi ke ile go batla monna wa me. Ke ne ke lapile mo maikutlong. Ke ne ka ya kerekeng ka makgetlho a le mmalwa ke batla sengwe se se ka nthusang gore ke bone tharabololo. Le fa Baebele e ne e balwa ka sewelo, ga go na motlha nkileng ka utlwa kgakololo epe e e buang ka bothata jwa me; e bile ga go na ope yo o kileng a bua le nna a mpolelela gore ke dire eng. Go ya kerekeng le go boaboeletsa dithapelo go ne go sa nkgotsofatse.” Batho ba bangwe ba ka kgobiwa marapo ke go bona kafa baeteledipele ba bone ba bodumedi ba palelwang ka teng go nna dikao tse di molemo ka tsela e ba tshelang ka yone. Ka ntlha ya seo, batho ba bantsi ba felelwa ke tshepo ya gore bodumedi bo ka ba thapisa kana jwa ba naya thuto e ba e tlhokang gore ba atlege mo botshelong.

Ka jalo, o ka nna wa ipotsa jaana, ‘Ke tshwanetse go nna le thuto ya mofuta mang gore ke kgone go atlega mo botshelong?’ A Bokeresete jwa boammaaruri bo na le karabo ya potso eno ya botlhokwa? Go tla buiwa ka seno mo setlhogong se se latelang.

[Ntlha e e kwa tlase]