Ba Itumelela go Dira Thato ya Modimo
JESU o ne a tlhomela Bakeresete botlhe sekao ka go rapela jaana a kopa Rraagwe: “A go diragale thato ya gago, e seng ya me.” (Luke 22:42) Gompieno mafoko ao a a bontshang go ikobela Jehofa ka boikokobetso a buiwa ke batlhanka ba le dimilionemilione ba Modimo. Bangwe ba bone ke baithuti ba le 52 ba tlelase ya bo120 ya Sekolo sa Baebele sa Watchtower sa Gileade. Ka March 11, 2006, setlhopha seno sa dialogane se ne se itumeletse gore se tlile go dira thato ya Modimo mo dinageng tse di farologaneng, mo gongwe e le mo maemong a a gwetlhang.
Ke eng se se tlhotlheletsang dialogane tseno go dira gore thato ya ga Jehofa e nne yone e kaelang matshelo a bone? Chris le Leslie, e leng banyalani ba ba abetsweng go ya go nna barongwa kwa Bolivia, ba tlhalosa jaana: “E re ka re iitatotse, re ithaopetse go dira sengwe le sengwe tumalanong le phuthego ya ga Jehofa.” (Mareko 8:34) Jason le Chere, ba ba abetsweng kwa Albania, ba oketsa jaana: “Kabelo nngwe le nngwe e re e newang ke phuthego ya ga Jehofa e nnile le dikgwetlho tsa yone. Le fa go ntse jalo, re fitlhetse gore Jehofa o tshwanelwa ke gore re mo ikanye ka botlalo.”
Ba Kgothalediwa Gore ba Ikobele go Dira Thato ya ga Jehofa
George Smith, yo e leng leloko la lelapa la Bethele, e bile a le mo Lephateng la Botaki, o ne a simolola thulaganyo eno ka thapelo. Stephen Lett, yo e leng leloko la Setlhopha se se Laolang sa Basupi ba ga Jehofa e bile e le modulasetulo wa thulaganyo ya dikalogo, o ne a amogela botlhe ba ba leng teng. Baeng go tswa dinageng di le 23 ba ne ba tlile mo Lefelong la Thuto la Watchtower kwa Patterson, New York, go tla tiragalong eno e e itumedisang. Mokaulengwe Lett o ne a bolelela setlhopha seno sa dialogane gore ba tlile go dira “tiro nngwe ya bonatla.” O ne a ba tlhokomedisa ka “dilo tse di nweleletseng kwa teng thata”—tse di tshwanang le dithuto tsa maaka—tse barongwa ba basha bano ba tlileng go kgona go di pitikolola ba dirisa maatla a Dikwalo. (2 Bakorintha 10:4, 5) O ne a konela jaana: “A bo lo tlile go itumela jang fa lo dirisiwa ke Jehofa go pitikolola dilo tse di nweleletseng kwa teng thata mo dipelong tsa batho ba ba dipelo di ikanyegang kwa dikabelong tsa lona!”
Harold Jackson, yo o berekang kwa ntlongkgolo, o ne a bua ka setlhogo se se reng “Dilo di le Mmalwa Tse lo Tshwanetseng go di Gakologelwa.” O ne a bontsha gore, le ka motlha, barongwa ba basha ba se ka ba bo ba lebala go ‘batla pele bogosi jwa Modimo le tshiamo ya gagwe.’ (Mathaio 6:33) Ba tshwanetse ba gakologelwa gore ‘lorato lo a aga’ mme ke lone lo ruri lo tla ba thusang go atlega. (1 Bakorintha 8:1) O ne a re: “Dirang gore lorato e nne lone lo lo lo kaelang fa lo dirisana le ba bangwe.”
Morago ga moo, Geoffrey Jackson, yo e leng leloko la Setlhopha se se Laolang, yo o nnileng morongwa go tloga ka 1979 go fitlha ka 2003, o ne a botsa dialogane jaana, “A o Dira se o Tshwanetseng go se Dira?” O ne a gatelela gore go botlhokwa gore motho a nne le pono e e tshwanetseng ka ene le ka bodiredi jwa gagwe. Bakeresete ba tshwanetse go dira ka natla mo go jaleng dipeo tsa boammaaruri le go di nosetsa. Le fa go ntse jalo, go godisa ke boikarabelo jwa ga Jehofa, ka gonne ke “Modimo yo o godisang.” (1 Bakorintha 3:6-9) Mokaulengwe Jackson o ne a oketsa a re: “Jehofa o batla gore lo nne lo nonofile semoyeng. Mme boikarabelo jwa lona jo bogolo ke eng? Ke go rata Jehofa le go rata batho ba lo ileng go ba direla.”
Lawrence Bowen, yo e leng mongwe wa batlhatlheledi ba Gileade o ne a tlotla ka setlhogo se se reng “Itse Gore o Itshware Jang.” O ne a gakolola baithuti gore Jehofa o ne a kaela Baiseraele a ba a ba sireletsa ka tsela e e gakgamatsang fa ba sa ntse ba le kwa nageng. (Ekesodo 13:21, 22) Le gompieno o sa ntse a re kaela le go re sireletsa, gareng ga tse dingwe a dirisa phuthego ya Bakeresete ba ba tloditsweng, e e leng “pilara le setshegetso sa boammaaruri.” (1 Timotheo 3:14, 15) Barongwa ba basha ba tshwanetse go tshegetsa boammaaruri jwa Baebele, jo e leng jone bo kaelang le go sireletsa ba ba ikokobeditseng.
Wallace Liverance, yo le ene e leng motlhatlheledi wa Gileade, o ne a kgothaletsa dialogane gore di se ka tsa lebala lefoko la Modimo le le kwa “morago” ga bone. Lefoko la Modimo le kwa morago ga rona ka kgopolo ya gore Baebele e ne ya kwalwa makgolokgolo a dingwaga a a fetileng. Jehofa o mo morago ga batho ba gagwe, fela jaaka modisa yo o tlhaeletsang mo morago ga letsomane la dinku, a ba kaela ka “motlhanka yo o boikanyego le yo o botlhale.” (Isaia 30:21; Mathaio 24:45-47) Sekolo sa Gileade se thusitse dialogane go anaanela setlhopha seo sa motlhanka botokanyana. “Motlhanka” o ne a ba a re naya le Thanolo ya Lefatshe le Lesha ya Dikwalo Tse di Boitshepo. Sebui se ne sa kgothatsa dialogane jaana: “Tsayang tshedimosetso eno e lo ipoloketseng yone, e e leng letlotlo, mme lo e dirise go ruta ba bangwe.”—Mathaio 13:52.
Go Dira Thato ya ga Jehofa mo Bodireding Jwa Tshimo
Mo puong ya setlhogo se se reng “Go Tlhagafalela go Bolela Dikgang Tse di Molemo,” Mark Noumair, yo le ene e leng motlhatlheledi wa Gileade o ne a tlotla ka mangwe a maitemogelo a dialogane di nnileng le one mo bodireding jwa phatlalatsa fa ba ntse ba le mo Sekolong sa Gileade. (Baroma 1:15) Dipotsolotso tse a neng a di dira le dialogane di ne tsa bontsha gore eleruri ba ne ba tlhagafaletse go rera ka sebaka sengwe le sengwe.
Dialogane di ne tsa bona kgothatso e nngwe mo dipotsolotsong tse di neng di tshwerwe ke Kenneth Flodin, fa a ne a botsolotsa balebedi ba le bararo ba ba etang ba gone jaanong ba direlang kwa United States. Richard Keller le Alejandro Lacayo, ba mo nakong e e fetileng yo mongwe o ne a direla kwa Amerika Borwa, fa yo mongwe a ne a direla kwa Amerika Bogare, ba ne ba tlhalosa kafa ba neng ba lebana ka teng le diteko tse di farologaneng ba bo ba tlhalosa le masego mangwe a ba neng ba a amogela fa ba ntse ba direla e le barongwa. Moacir Felisbino o ne a tlhalosa thapiso e a neng a e amogela fa a ntse a bereka le barongwa kwa Brazil, kwa a goletseng gone.
David Schafer o ne a botsolotsa barongwa ba le bararo ba ba nang le lobakanyana mo tirong eno, e bong Robert Jones, Woodworth Mills, le Christopher Slay. Bakaulengwe ba bararo bano ba ne ba tlhalosa kafa ba neng ba ithuta ka gone go ikanya Jehofa fa ba kopana le mathata. Ba ne ba tlhomamisetsa setlhopha seno gore thapiso e ba e neilweng ke phuthego ya ga Jehofa e ba tlhomeletse sentle go dira tiro ya bone ya borongwa. Mokaulengwe Mills o ne a e sobokanya jaana: “Ga ke a thusiwa go le kalo ke kitso ya mo tlhogong e ke e boneng fa ke le mo Gileade, mme ke thusitswe thatathata ke se sekolo seno se nthutileng sone ka boikokobetso le lorato.”
Guy Pierce, yo e leng leloko la Setlhopha se se Laolang, o ne a neela puo ya konokono e e nang le setlhogo se se reng “Jehofa Ga a Na go Tsamaya a Palelwa.” Adame o ne a palelwa, a mme seno se ne se raya gore Modimo o paletswe? A Modimo o paletswe ke go bopa Adame yo o itekanetseng, jaaka fa batho bangwe ba bua? Nnyaa, ka gonne “Modimo wa boammaaruri o dirile batho ba thokgame.” (Moreri 7:29) Sebui se ne sa tlhalosa gore tsela ya ga Jesu ya go ikanyega fa a ne a lebane le teko e e boima thata mo lefatsheng e ne ya bontsha gore “Adame o ne a se na seipato, a se na lebaka la go palelwa.” Teko e Adame a neng a kopana le yone kwa tshimong ya Edene, go bona gore o utlwa go le kana kang, e ne e se boima le eseng fa e bapisiwa le e Jesu a neng a lebana le yone. Le fa go ntse jalo, Adame o ne a palelwa mo tekong eno. Le fa go ntse jalo, Jehofa ga a na go tsamaya a palelwa. Se a ikaeletseng gore se direge se tla direga. (Isaia 55:11) Mokaulengwe Pierce o ne a bolelela barongwa ba basha jaana: “Lo na le tshiamelo ya go tlotla Jehofa ka moya wa lona wa go intsha setlhabelo. E kete Jehofa a ka nna le mongwe le mongwe wa lona gongwe le gongwe fela kwa lo mo direlang teng lo le barongwa.”
Fa modulasetulo, Mokaulengwe Lett, a sena go bala makwalo a ditumediso a a tswang kwa diofising tse di farologaneng tsa makala tsa Basupi ba ga Jehofa, o ne a naya dialogane didipoloma tsa bone le dikabelo tsa bone. Vernon Wisegarver, yo o sa bolong go nna a direla e le leloko la lelapa la Bethele, o ne a emela bareetsi ka thapelo e e tswalang.
Batho ba le 6 872 ba ba neng ba le teng ba ne ba dumela gore thulaganyo eno ya dikalogo e tsosolositse tlhoafalo ya bone mo go direng thato ya Modimo. (Pesalema 40:8) Andrew le Anna, ba e leng dialogane, ba ne ba re: “Re ineetse mo go Jehofa. Re ne ra solofetsa Jehofa gore re tla dira sengwe le sengwe se a batlang gore re se dire. Ke foo Jehofa o re kopa gore re ye Cameroon, kwa Afrika.” Bone le ba bangwe ba setlhopha sa dialogane ba eletsa go simolola ka bonako mo tirong e e tla ba kgotsofatsang le go ba itumedisa. Ee, ba itumelela go dira thato ya Modimo.
[Lebokoso mo go tsebe 17]
DIPALOPALO MALEBANA LE SETLHOPHA SA DIALOGANE
Dinaga tse ba tswang kwa go tsone: 6
Dinaga tse ba abetsweng go ya kwa go tsone: 20
Palo ya baithuti: 52
Palogare ya dingwaga tsa bone: 35,7
Palogare ya dingwaga tsa bone ba le mo boammaaruring: 18,3
Palogare ya dingwaga tsa bone ba le mo bodireding jwa nako e e tletseng: 14,5
[Setshwantsho mo go tsebe 18]
Setlhopha sa bo120 sa Dialogane Tsa Sekolo sa Baebele sa Watchtower sa Gileade
Mo lenaaneng le le fa tlase, mela e balwa go tloga kwa pele go ya kwa morago, mme maina a tlhomagantswe go tloga kafa molemeng go ya kafa mojeng wa mola mongwe le mongwe.
(1) Wright, S.; Suárez, B.; Croisant, B.; Davenport, L. (2) Johnson, A.; Ali, C.; Cady, K.; Guerrero, P.; Ases, A. (3) Ortiz, L.; Lyall, K.; Uzeta, M.; Perez, R.; Backus, K.; Caterina, C. (4) Palmer, B.; Loving, D.; Macdonough, J.; Bostock, D.; Benetatos, L. (5) Jasicki, M.; Sarafianos, E.; Stelter, C.; Vaira, R.; Woon, J.; Prentice, K. (6) Davenport, H.; Croisant, H.; Perez, M.; Vaira, E.; Suárez, A.; Caterina, I.; Wright, C. (7) Cady, K.; Macdonough, J.; Ortiz, M.; Woon, J.; Ali, J.; Ases, M. (8) Sarafianos, G.; Lyall, D.; Uzeta, C.; Stelter, P.; Prentice, G.; Johnson, A.; Benetatos, C. (9) Palmer, J.; Jasicki, W.; Backus, J.; Bostock, S.; Guerrero, J. M.; Loving, S.