Ke ka Ntlha Yang fa re Tshwanetse go Rapela mo Leineng la ga Jesu?

GANTSI Jesu o ne a ruta ka thapelo. Mo motlheng wa gagwe, baeteledipele ba bodumedi ba Bajuda ba ne ba rapela “mo dikhutlong tsa ditsela tse di atlhameng.” Goreng ba ne ba dira jalo? “Gore ba bonwe ke batho.” Ga go pelaelo gore boineelo jwa bone e ne e le jwa go batla go kgatlha batho fela. Bontsi jwa bone ba ne ba rapela dithapelo tse di telele ba boaboeletsa mafoko jaaka e kete ‘go dirisa mafoko a le mantsi’ go ne go le botlhokwa gore thapelo e utlwiwe. (Mathaio 6:5-8) Jesu o ne a re tsela e ba dirang ka yone ga e thuse sepe, mme se a se buileng se ne sa thusa batho ba ba peloephepa gore ba itse se ba sa tshwanelang go se dira fa ba rapela. Le fa go ntse jalo, ga a ba ruta fela se ba sa tshwanelang go se dira fa ba rapela.

Jesu o ne a ruta gore dithapelo tsa rona di tshwanetse go bontsha gore re batla gore leina la Modimo le itshepisiwe, Bogosi jwa Gagwe bo tle mme thato ya Gagwe e dirwe. Gape Jesu o ne a re re tshwanetse go kopa Modimo gore a re thuse ka dilo tse di amang matshelo a rona. (Mathaio 6:9-13; Luke 11:2-4) Jesu o ne a dirisa ditshwantsho go re bontsha gore re tshwanetse go kopa re sa kgaotse, re nne le tumelo re bo re ikokobetse fa re batla gore dithapelo tsa rona di utlwiwe. (Luke 11:5-13; 18:1-14) Mme o ne a gatelela se a neng a se ruta ka go tlhoma sekao.—Mathaio 14:23; Mareko 1:35.

Ga go pelaelo gore thuto eno e ne ya thusa barutwa ba ga Jesu gore ba tokafatse tsela e ba rapelang ka yone. Le fa go ntse jalo, Jesu o ne a leta go fitlha bosigo jwa gagwe jwa bofelo mo lefatsheng go ruta barutwa ba gagwe thuto e e botlhokwatlhokwa ka thapelo.

Tsela e Ntšha ya go Rapela

Jesu o ne a dirisa nako e ntsi mo bosigong jwa gagwe jwa bofelo a kgothatsa baaposetoloi ba gagwe ba ba ikanyegang. E ne e le yone nako e e tshwanetseng go ba senolela kgang nngwe e ntšha. Jesu o ne a re: “Ke nna tsela le boammaaruri le botshelo. Ga go na ope yo o tlang kwa go Rara fa e se ka nna.” Moragonyana o ne a ba naya tsholofetso nngwe e e gomotsang: “Le fa e le eng se lo se kopang ka leina la me, ke tla se dira, gore Rara a tle a galalediwe ka ga Morwa. Fa lo kopa sengwe ka leina la me, ke tla se dira.” Fa a tloga a konela puisano ya gagwe le bone o ne a re: “Go fitlha mo nakong ya jaanong ga lo ise lo kope le fa e le selo se le sengwe ka leina la me. Kopang mme lo tla amogela, gore boipelo jwa lona bo tle bo tladiwe.”—Johane 14:6, 13, 14; 16:24.

Mafoko ano a ne a le botlhokwa thata. Dikishinare nngwe ya Baebele e tlhalosa seno e le “tsela e ntšha ya go rapela.” Jesu o ne a sa reye gore go se tlhole go rapelwa Modimo mme go rapelwe ene. Go na le moo, o ne a simolola tsela e ntšha ya go rapela Jehofa Modimo.

Gone ke boammaaruri gore Modimo o ne a ntse a reetsa dithapelo tsa batlhanka ba gagwe ba ba ikanyegang. (1 Samuele 1:9-19; Pesalema 65:2) Le fa go ntse jalo, go tloga fa Modimo a ne a dira Kgolagano ya Molao le Iseraele, batho ba ba neng ba batla gore dithapelo tsa bone di utlwiwe ba ne ba tshwanetse go dumela gore Iseraele e ne e le setšhaba se Modimo a se itlhophetseng. Mme moragonyana go tloga ka nako ya ga Solomone, ba ne ba tshwanetse go dumela gore tempele ke lone lefelo le Modimo a le tlhophetseng go dira ditlhabelo. (Duteronome 9:29; 2 Ditiragalo 6:32, 33) Le fa go ntse jalo, tsela eno ya go obamela Modimo e ne e le ya nakwana fela. Fela jaaka moaposetoloi Paulo a ne a kwala, Molao o o neng o neilwe Iseraele mmogo le ditlhabelo tse di neng di dirwa kwa tempeleng e ne e le “moriti wa dilo tse di molemo tse di tla tlang, mme e seng tsone dilo totatota.” (Bahebera 10:1, 2) Ka gone, moriti o ne o tshwanetse go tseelwa sebaka ke sengwe sa mmatota. (Bakolosa 2:17) Go tloga ka 33 C.E., kamano e motho a nang le yone le Jehofa e ne e sa tlhole e ikaegile ka go ikobela Molao wa Moshe. Go na le moo, e ne e ikaegile ka go utlwa ene yo Molao o supang kwa go ene—Keresete Jesu.—Johane 15:14-16; Bagalatia 3:24, 25.

“Leina le le Kwa Godimo ga Leina Lengwe le Lengwe le Sele”

Jesu o ne a tlhoma tsela e e molemolemo ya go atamela Jehofa fa a ne a re ke ene tsala e e nonofileng e e re bulelang ditsela gore Modimo a kgone go utlwa dithapelo tsa rona le go di araba. Ke eng se se dirang gore Jesu a re direle dilo tseno?

E re ka rotlhe re tsholetswe mo boleong, ditiro le fa e ka nna dife tse re di dirang kana ditlhabelo tse re di ntshang ga di ka ke tsa tlhatswa selabe se re nang le sone ka ntlha ya boleo kana tsa re thusa go nna le kamano le Modimo wa rona yo o boitshepo Jehofa. (Baroma 3:20, 24; Bahebera 1:3, 4) Le fa go ntse jalo, Jesu o ne a ntsha botshelo jwa gagwe jo bo itekanetseng mme a duelela maleo a batho ba ba ka rekololwang. (Baroma 5:12, 18, 19) Ka jalo botlhe ba ba batlang gore maleo a bone a phepafadiwe ba na le tshono ya go nna le boemo jo bo phepa fa pele ga ga Jehofa le go itumelela go nna le ‘kgololesego ya go bua’ le Modimo—mme seno se ka direga fa fela ba dumela mo setlhabelong sa ga Jesu e bile ba rapela mo leineng la gagwe.—Baefeso 3:11, 12.

Fa re rapela mo leineng la ga Jesu re a bo re bontsha gore re dumela mo ditseleng tseno tse tharo tse a di dirisang go diragatsa boikaelelo jwa Modimo: (1) Ke “Kwana ya Modimo” e setlhabelo sa yone se dirang gore re itshwarelwe maleo. (2) Jehofa o ne a mo tsosa mo baswing mme jaanong ke “moperesiti yo mogolo” yo o re nayang melemo ya thekololo. (3) Ke ene fela “tsela” ya go atamela Jehofa ka thapelo.—Johane 1:29; 14:6; Bahebera 4:14, 15.

Fa re rapela mo leineng la ga Jesu re bontsha gore re a mo tlotla. Mme tlotla eo e a mo tshwanela ka gonne thato ya ga Jehofa ke gore “ka leina la ga Jesu lengole lengwe le lengwe le tle le obame . . . , le loleme longwe le longwe lo tle lo bolele ka phuthologo fa lo dumela gore Jesu Keresete ke Morena kgalalelong ya Modimo Rara.” (Bafilipi 2:10, 11) Le fa go ntse jalo, sa botlhokwa le go feta ke gore go rapela mo leineng la ga Jesu go galaletsa Jehofa ene yo o ntshitseng Morwawe gore re solegelwe molemo.—Johane 3:16.

Ka jalo, gore re tlhaloganye boemo jwa ga Jesu, Baebele e dirisa direto le maina a a farologaneng go mo tlhalosa. Direto tseno le maina di re thusa go tlhaloganya melemo e le mentsi e re e bonang ka ntlha ya se Jesu a se dirileng, se a se dirang le se a sa ntseng a tla re direla sone. (Bona lebokoso le le reng “Seabe se se Botlhokwa sa ga Jesu”.) Ruri Jesu o neilwe “leina le le kwa godimo ga leina lengwe le lengwe le sele.”a O neilwe taolo yotlhe kwa legodimong le mo lefatsheng.—Bafilipi 2:9; Mathaio 28:18.

Ga e A Tshwanela go Nna Seomodiro Fela

Ke boammaaruri gore fa re batla gore Jehofa a utlwe dithapelo tsa rona, re tshwanetse go rapela ka leina la ga Jesu. (Johane 14:13, 14) Mme le ka motlha ga re batle go nna re boaboeletsa mafoko a a reng “mo leineng la ga Jesu” re go dira e le seomodiro fela. Ke ka ntlha yang fa re sa tshwanela go dira jalo?

Akanya ka sekai se se latelang. Fa o amogela lekwalo le le tswang kwa go rakgwebo mongwe, le ka tswa le konela ka mafoko a a tlwaelegileng a a reng “Weno.” A tota o akanya gore rakgwebo yono o ikutlwa jalo ka wena, kana o a bo a diragatsa fela molao gonne e le tsela e makwalo a kgwebo a konelwang ka yone? Eleruri tsela e re dirisang leina la ga Jesu ka yone mo dithapelong tsa rona e tshwanetse go nna le bokao jo bogolo, ga e a tshwanela go nna seomodiro fela jaaka mafoko a a konelang lekwalo la kgwebo. Le fa gone re tshwanetse go ‘rapela re sa kgaotse,’ re tshwanetse go dira seo ka ‘pelo yotlhe,’ e se ka ya nna seomodiro fela.—1 Bathesalonika 5:17; Pesalema 119:145.

O ka tila jang go dirisa mafoko a reng “mo leineng la ga Jesu” e le seomodiro fela? A o ka tlhatlhanya ka dinonofo tse di kgatlhang tsa ga Jesu? Akanya ka dilo tse a setseng a go diretse tsone le tse a ikemiseditseng go go direla tsone. Fa o rapela, leboga Jehofa o bo mmake ka tsela e e molemo e a dirisitseng Morwawe ka yone. Fa o ntse o dira jalo, o tla tlhomamisega le go feta ka tsholofetso eno ya ga Jesu: “Fa lo kopa sengwe mo go Rara o tla se lo naya ka leina la me.”—Johane 16:23.