A Baebele e re Bolelela Dintlha Tsotlhe ka ga Jesu?

GO FOPHOLETSA dilo jalo go ne ga anama mo dingwageng tsa bosheng, mme lengwe la mabaka ke ka gonne difilimi le dibuka tse di itsegeng di ile tsa rotloetsa dikgopolo tseo. Ntle le ditlhamane tseno, go ile ga nna le dibuka tse dintsi le ditlhogo tse di buang thata ka dibuka tse go sa tlhomamisiweng boammaaruri jwa tsone go tloga ka lekgolo la bobedi le la boraro la dingwaga C.E., tse go tweng di senola dintlha tse di ka ga Jesu tse di sa kwalwang mo Diefangeleng. A mme seo se boammaaruri? A re ka tlhomamisega gore Baebele e re bolelela dintlha tsotlhe ka ga Jesu e bile di boammaaruri?

Go araba dipotso tseo, go botlhokwa go ela tlhoko dintlha tseno tse tharo. Sa ntlha, re tshwanetse go itse tshedimosetso e e botlhokwa ka banna ba ba neng ba kwala dipego tsa Diefangele le gore ba ne ba di kwala leng; sa bobedi, re tshwanetse go itse gore ke mang yo o kwadileng lenaane la dibuka tsa Baebele tse di amogelwang jaaka Dikwalo Tse di Boitshepo le gone jang; mme sa boraro, re tlhoka go itse tshedimosetso nngwe e e kaga dibuka tse go sa tlhomamisiweng boammaaruri jwa tsone le gore di farologana jang le dibuka tsa Baebele tse di amogelwang jaaka Dikwalo Tse di Boitshepo.a

Dikwalo Tsa Bokeresete Tsa Segerika di ne Tsa Kwalwa Leng le Gone ke Mang?

Go ya ka dibuka dingwe, Efangele ya ga Mathaio e ne ya kwalwa mo masimologong a ngwaga wa borobedi morago ga loso lwa ga Jesu, mo e ka nnang ka 41 C.E. Bakanoki ba le bantsi ba re e ne ya kwalwa moragonyana, mme botlhe ba dumela gore dibuka tsotlhe tsa Dikwalo Tsa Bokeresete Tsa Segerika di kwadilwe mo lekgolong la ntlha la dingwaga C.E.

Fa batho ba ba boneng Jesu a tshela, a swa le fa a ne a tsosiwa ba ne ba sa ntse ba tshela; ba ne ba ka tlhomamisa gore dipego tsa Diefangele di boammaaruri. Gape go ne go ka nna motlhofo gore ba senole dintlha dipe fela tse di seng boammaaruri. Porofesa F. F. Bruce o ne a re: “Nngwe ya dintlha tse di botlhokwa fa baaposetoloi ba ne ba rera e ne e le go bua dilo tse batho ba ba neng ba ba reeditse ba neng ba setse ba di itse; ba ne ba sa re fela, ‘Re basupi ba dilo tseno,’ mme gape ba ne ba re ‘Fela jaaka lona ka bolona lo itse’ (Ditiro 2:22).”

Bakwadi ba Dikwalo Tsa Bokeresete Tsa Segerika ke bomang? Ba ne ba akaretsa bangwe ba baaposetoloi ba le 12 ba ga Jesu. Bakwadi bano ba Baebele le ba bangwe ba ba jaaka Jakobe, Jude gongwe le Mareko ba ne ba le teng ka letsatsi la Pentekosete ya 33.C.E. fa phuthego ya Bokeresete e ne e tlhomiwa. Bakwadi bano botlhe go akaretsa le Paulo, ba ne ba atamalane thata le setlhopha se se laolang sa phuthego ya pele ya Bokeresete se se neng se na le baaposetoloi le bagolwane kwa Jerusalema.—Ditiro 15:2, 6, 12-14, 22; Bagalatia 2:7-10.

Jesu o ne a laela balatedi ba gagwe gore ba tswelele ka tiro ya go rera le ya go ruta e a neng a e simolotse. (Mathaio 28:19, 20) O ne a bo a re: “Yo o lo reetsang o reetsa le nna.” (Luke 10:16) Mo godimo ga moo, o ne a ba solofetsa gore moya o o boitshepo kgotsa maatla a a dirang a tla ba naya maatla a ba a tlhokang gore ba kgone go dira tiro eo. Ka jalo, fa dibuka tseo di ne di tswa kwa baaposetoloing kgotsa kwa bathong ba ba neng ba bereka le bone—batho ba go neng go bonala sentle gore ba na le moya wa Modimo o o boitshepo—Bakeresete ba bogologolo ba ne ba di tsaya di le boammaaruri.

Bakwadi bangwe ba Baebele ba ne ba tlhomamisa gore di boammaaruri le gore bakwadi ba tsone ba tlhotlheleditswe ke Modimo. Ka sekai, moaposetoloi Petere o ne a nopola makwalo a ga Paulo mme o ne a bua ka one a re a dumalana le “Dikwalo tse dingwe tsotlhe.” (2 Petere 3:15, 16) Paulo ene o ne a lemoga gore baaposetoloi le baporofeti ba bangwe ba Bakeresete ba ne ba tlhotlheleditswe ke Modimo.—Baefeso 3:5.

Ka jalo dipego tsa Diefangele di bontsha gore di boammaaruri e bile di ka ikanngwa. Ga se ditlhamane kgotsa dilo tse di ikakanyediwang fela. Ke ditiragalo tsa mo nakong e e fetileng tse di kwadilweng ka kelotlhoko ke banna ba ba tlhotlheleditsweng ke moya wa Modimo mme ba di boleletswe ke batho ba ba di boneng ka matlho.

Ke Mang yo o Dirileng Lenaane la Dibuka Tsa Baebele Tse di Amogelwang Jaaka Dikwalo Tse di Boitshepo?

Bakwadi bangwe ba re lenaane la dibuka tsa Baebele tse di amogelwang jaaka Dikwalo Tse di Boitshepo le le mo Dikwalong Tsa Segerika Tsa Bokeresete le ne la dirwa mo makgolong a dingwaga moragonyana ke kereke e e neng e kaelwa ke Mmusimogolo Constantine. Le fa go ntse jalo, go na le dilo tse di bontshang gore seo ga se boammaaruri.

Ka sekai, ela tlhoko se Porofesa ya Kereke ya Hisitori e bong Oskar Skarsaune a se buang: “Tshwetso ya gore dibuka dingwe di ne di tla tsenngwa mo Tesetamenteng e Kgologolo kgotsa nnyaa, e ne e sa dirwe ke lekgotla lepe la kereke kgotsa motho le fa e le ofe . . . Mokgwa o o neng o dirisiwa e ne e le ono: Dibuka tse di kwadilweng go simolola ka lekgolo la ntlha la dingwaga C.E. tse go neng go tsewa gore di kwadilwe ke baaposetoloi kgotsa batho ba ba neng ba dira le bone di ne di tsewa di ikanyega. Dibuka tse dingwe, makwalo kgotsa ‘diefangele’ tse di jaaka tse go tlotliwang ka tsone fa tlase fano tse di neng tsa kwalwa moragonyana di ne di sa akarediwa . . . Tiro eno e ne ya wediwa bogologolo pele Constantine a tsholwa le pele kereke ya gagwe e tlhomiwa. Bakeresete ba ba neng ba bogisediwa tumelo ya bone ke bone ba ba neng ba re Tesetamente e Ntšha e bidiwe Dikwalo Tsa Segerika Tsa Bokeresete mme ga se kereke e e dirileng jalo.

Ken Berding e bong porofesa e e ithutang ka Dikwalo Tsa Segerika Tsa Bokeresete o akgela jaana malebana le kafa lenaane la dibuka tsa Baebele tse di amogelwang jaaka Dikwalo Tse di Boitshepo le nnileng teng ka gone: “Kereke ga e a tlhopha dibuka tseno; go botoka gore re re kereke e ne ya lemoga dibuka tse Bakeresete ba sa bolong go di leba e le Lefoko le le boammaaruri le le le tswang kwa Modimong.”

A mme Bakeresete bao ba ba ikokobeditseng ba lekgolo la ntlha la dingwaga ke bone ba tlhophileng dibuka tsa Baebele tse di amogelwang jaaka Dikwalo Tse di Boitshepo? Baebele e re bolelela gore go ne go na le sengwe se se botlhokwa thata—le se se maatla—se se neng sa nna le seabe.

Go ya ka Baebele, nngwe ya dimpho tsa moya tsa go dira dikgakgamatso tse di neng di neilwe phuthego ya Bokeresete e ne e le “temogo ya dipolelo tse di tlhotlheleditsweng.” (1 Bakorintha 12:4, 10) Ka jalo bangwe ba Bakeresete bao ba ne ba neilwe maatla a a fetang a motho go lemoga dipolelo tse di tlhotlheleditsweng ke Modimo le tse di sa tlhotlhelediwang ke ene. Gompieno Bakeresete ba ka tlhomamisega gore Dikwalo tse di kwadilweng mo Baebeleng di ne di tsewa di tlhotlheleditswe.

Ka jalo go bonala sentle gore dibuka tsa Baebele tse di amogelwang jaaka Dikwalo Tse di Boitshepo di ne tsa kwalwa bogologolo ka tlhotlheletso ya moya o o boitshepo. Go ela kwa bofelong jwa lekgolo la bobedi la dingwaga C.E. bakwadi bangwe ba ile ba akgela ka lenaane la dibuka tsa Baebele tse di amogelwang jaaka Dikwalo Tse di Boitshepo. Le fa go ntse jalo, bakwadi bano ga se bone ba ba dirileng tshwetso ya gore ke eng se se tla kwalwang mo dibukeng tseo; ba ne ba dira fela se Modimo a neng a se senoletse baemedi ba gagwe ba ba neng ba kaelwa ke moya wa gagwe.

Mekwalo ya bogologolo ya seatla le yone e re naya bosupi jo bo maatla jo bo tshegetsang lenaane la dibuka tsa Baebele tse di amogelwang jaaka Dikwalo Tse di Boitshepo tse gompieno di itsegeng. Go na le mekwalo ya seatla e feta 5 000 ya Dikwalo Tsa Segerika ka puo ya ntlhantlha go akaretsa le mekwalo mengwe ya lekgolo la bobedi le la boraro la dingwaga. Mekwalo eno, e seng dibuka tse go sa tlhomamisiweng boammaaruri jwa tsone, e ne e tsewa e le boammaaruri mo makgolong a ntlha a dingwaga C.E. mme e ne ya kwalololwa le go anamisiwa thata.

Le fa go ntse jalo, bosupi jo bo mo go tsone bo tlhomamisa gore lenaane la dibuka tsa Baebele tse di amogelwang jaaka Dikwalo Tse di Boitshepo di boammaaruri. Dibuka tsa Baebele tse di amogelwang jaaka Dikwalo Tse di Boitshepo di dumalana le “mafoko a a itekanetseng” a re a fitlhelang mo Baebeleng yotlhe. (2 Timotheo 1:13) Di rotloetsa babadi go rata Jehofa, go mo obamela le go mo direla mme di tlhagisa gore go se ka ga dirisiwa tumelobotlhodi, bodimona le go obamela ditshedi. Di bua boammaaruri ka dilo tse di diragetseng mme di na le boporofeti jo bo boammaaruri. Di kgothaletsa batho ba ba di balang go rata batho ba bangwe. Dikwalo Tsa Bokeresete Tsa Segerika di dira se se tshwanang. A mme dibuka tse go sa tlhomamisiweng boammaaruri jwa tsone di dira se se tshwanang?

Dibuka Tse go sa Tlhomamisiweng Boammaaruri Jwa Tsone di Farologane ka Tsela Efe?

Dibuka tse go sa tlhomamisiweng boammaaruri jwa tsone di farologane thata le dibuka tsa Baebele tse di amogelwang jaaka Dikwalo Tse di Boitshepo. Dibuka tseno tse go sa tlhomamisiweng boammaaruri jwa tsone di kwadilwe go simolola mo e ka nnang mo bogareng jwa lekgolo la bobedi la dingwaga, dingwaga di le dintsi morago ga gore go kwalwe dibuka tsa Baebele tse di amogelwang jaaka Dikwalo Tse di Boitshepo. Se di se buang ka ga Jesu le Bokeresete ga se dumalane le Dikwalo tse di tlhotlheleditsweng.

Ka sekai, Efangele ya ga Thomase e go sa tlhomamisiweng boammaaruri jwa yone e na le dipolelo tse dintsi tse di gakgamatsang tse go tweng Jesu o di buile, tse di jaaka gore o tla fetola Marea go nna monna gore a kgone go tsena kwa Bogosing jo bo kwa legodimong. Efangele ya Ntlha ya ga Thomase e tlhalosa Jesu yo mmotlana e le ngwana yo o setlhogo wa semoya yo o neng a bolaya ngwana yo mongwe ka boomo. Buka e go sa tlhomamisiweng boammaaruri jwa yone ya Ditiro e e kwadilweng ke Paulo le e e kwadilweng ke Petere di gatelela gore batho ba se ka ba tlhakanela dikobo e bile di tlhalosa baaposetoloi ba tlhotlheletsa basadi go kgaogana le banna ba bone. Efangele ya ga Judase e tlhalosa Jesu a tshega barutwa ba gagwe fa ba rapela Modimo ba rapelela dijo. Dikgopolo tseno ga di dumalane le se se tlhalosiwang mo dibukeng tsa Baebele tse di amogelwang jaaka Dikwalo Tse di Boitshepo.—Mareko 14:22; 1 Bakorintha 7:3-5; Bagalatia 3:28; Bahebera 7:26.

Dibuka di le dintsi tse go sa tlhomamisiweng boammaaruri jwa tsone di bontsha se Bakenosetiki ba se dumelang, ba ba reng Jehofa, Mmopi, ga se Modimo yo o molemo. Gape ba dumela gore ga go kitla go nna le tsogo, gore sengwe le sengwe se se bonalang se bosula le gore Satane ke ene mosimolodi wa lenyalo le go tsholwa ga batho.

Bontsi jwa dibuka tse go sa tlhomamisiweng boammaaruri jwa tsone di dirisa maina a batho ba go buiwang ka bone mo Baebeleng mme e se ka tsela e e boammaaruri. A go na le maano mangwe a a dirilweng gore dibuka tseno di se ka tsa tsenngwa mo Baebeleng? Mankge mongwe wa dibuka tse go sa tlhomamisiweng boammaaruri jwa tsone e bong M. R. James o ne a re: “Ga go na ope yo o logileng leano la gore dibuka tse go sa tlhomamisiweng boammaaruri jwa tsone di se ka tsa tsenngwa mo lenaaneng la dibuka tsa Baebele tse di amogelwang jaaka Dikwalo Tse di Boitshepo. Go na le moo, dibuka tseno ga di tshwane le dibuka tsa Baebele tse di amogelwang jaaka Dikwalo Tse di Boitshepo e leng se se bontshang gore ga se karolo ya tsone.”

Bakwadi ba Baebele ba Tlhagisitse ka Botlhanogi jo bo Neng bo Tla Nna Gone

Dibuka tsa Baebele tse di amogelwang jaaka Dikwalo Tse di Boitshepo di na le ditlhagiso tse dintsi tse di ka ga botlhanogi jo bo neng bo tla senya phuthego ya Bokeresete. Boammaaruri ke gore botlhanogi jono bo ne bo setse bo simologile mo lekgolong la ntlha la dingwaga mme baaposetoloi ba ne ba bo thibela gore bo se ka jwa anama. (Ditiro 20:30; 2 Bathesalonika 2:3, 6, 7; 1 Timotheo 4:1-3; 2 Petere 2:1; 1 Johane 2:18, 19; 4:1-3) Ditlhagiso tseo di ne tsa senola dibuka tse di neng di sa dumalane le dithuto tsa ga Jesu tse di kwadilweng morago ga loso lwa baaposetoloi.

Bakanoki le baitsehisitori bangwe ba ka tswa ba ne ba leba dibuka tse di ntseng jalo e le tsa bogologolo e bile di tshwanetse go tlotlwa. Akanya ka seno: Go ne go ka tweng fa bakanoki ba ne ba ka kokoanya dibuka tse dintlha tse di kwadilweng mo go tsone di seng boammaaruri tse di gatisiwang gompieno, gongwe ba di tsaya mo dimakasineng tse di tletseng tshebo, mo dikgatisong tse di buang ka ditlhotshwana tsa bodumedi tse di tletseng tlhaolele ba bo ba di boloka sentle mo lefelong le le sireletsegileng? A seo se ne se tla dira gore fa nako e ntse e tsamaya dibuka tseo di nne boammaaruri le gore di ikanyege? Morago ga dingwaga di le 1 700, a maaka ao a ne a tla nna boammaaruri fela ka gonne dibuka tseo e le tsa bogologolo?

Nnyaa le eseng! Go tshwana fela le kgang ya gore Jesu o ne a nyala Marea Magadalena le dipego tse dingwe tse di seng boammaaruri tse di leng mo dibukeng tse go sa tlhomamisiweng boammaaruri jwa tsone. Ke eng fa o tshwanetse go ikanya dibuka tseo tse di sa ikanyegeng mme tse di ikanyegang di le gone? Sengwe le sengwe se Modimo a batlang gore re se itse ka Morwawe se mo Baebeleng—pego e re ka e ikanyang.