SETLHOGO SE SE KA FA NTLE: SE RE SE ITHUTANG MO GO MOSHE
Moshe E ne E le Mang?
O akanya ka eng fa o utlwa leina Moshe? A o akanya ka . . .
lesea le mmaalone a ileng a le fitlha mo serotong kwa Nokeng ya Nile?
mosimane yo o godisitsweng ke morwadia Faro mo manobonobong a Egepeto—mme a ise a ko a lebale gore ke Mojuda?
monna yo e neng e le modisa kwa Midiana ka dingwaga di le 40?
monna yo o neng a bua le Jehofaa fa pele ga setlhatsana se se shang?
monna yo o neng a lebana le kgosi ya Egepeto, mme ka bopelokgale a kopa gore Baiseraele ba gololwe mo bokgobeng
monna yo—ka kaelo ya Modimo—a ileng a itsise ka Dipetso di le Lesome tse di neng di tla wela Egepeto fa kgosi ya teng e ne e gana go ikobela Modimo wa boammaaruri?
monna yo o neng a eteletse Baiseraele pele mo khudugong e kgolo go tswa Egepeto?
monna yo o neng a dirisiwa go kgaoganya Lewatle le Lehibidu?
monna yo o neng a naya Baiseraele Melao e e Lesome e e tswang kwa Modimong?
MOSHE o ne a lebana le dilo tseno tsotlhe le tse dingwe. Ga go gakgamatse go bo monna yono yo o ikanyegang a tlotliwa thata ke Bakeresete, Bajuda le Bamoseleme!
Ga go pelaelo gore Moshe e ne e le moporofeti yo o neng a bontsha “poitshego e kgolo.” (Duteronome 34:10-12) O ne a letla Modimo gore a mo dirise. Le fa go ntse jalo, Moshe e ne e le motho yo o tlwaelegileng. Fela jaaka moporofeti Elija—yo o neng a tlhaga a eme fa thoko ga Moshe mo ponatshegelong ka nako ya bodiredi jwa ga Jesu mo lefatsheng—Moshe e ne e le motho “yo o nang le maikutlo a a tshwanang le a rona.” (Jakobe 5:17; Mathaio 17:1-9) Moshe o ne a lebana le mathata a mantsi a re lebanang le one, mme o ne a kgona go a fenya ka katlego.
A o ka rata go itse gore o dirile seo jang? Ela tlhoko dinonofo tse tharo tse Moshe a ileng a di bontsha le gore rona re ka ithuta eng mo sekaong sa gagwe.
a Jehofa ke leina la Modimo le le mo Baebeleng.