DIKARABO TSA DIPOTSO TSA BAEBELE
Letsatsi la Katlholo ke eng?
Goreng letsatsi la katlholo e tla nna nako e e itumedisang?
Mo motlheng wa ditiragalo tsa Baebele, Modimo o ne a dirisa baatlhodi go golola batho ba gagwe mo tshiamololong. (Baatlhodi 2:18) Baebele ya re Letsatsi le le tlang la Katlholo e tla nna nako e e itumedisang ya gore Jehofa, Moatlhodi wa lefatshe lotlhe a golole batho mo tshiamololong.—Bala Pesalema 96:12, 13; Isaia 26:9.
Modimo o tlhomile Jesu gore a bontshe batshedi le baswi tshiamiso. (Ditiro 10:42; 17:31) Batho ba bantsi ba tlhokafetse ba sa itse Modimo. Ka Letsatsi la Katlholo, Jesu o tla ba tsosa gore ba itse Modimo wa boammaaruri le go mo rata.—Bala Ditiro 24:15.
Goreng Letsatsi la Katlholo le tla tsaya dingwaga tse di sekete?
Mo dingwageng di le sekete, baswi ba tla tsosiwa. (Tshenolo 20:4, 12) Ba tla tlhoka nako ya go ithuta se Modimo a se batlang le go mo ikobela. Go farologana le se se tleng se buiwe, Baebele ya re batho ba tla atlholwa go ya ka se ba se dirang morago ga tsogo.—Bala Baroma 6:7.
Gape Baebele e bua ka letsatsi la katlholo le le tlang ka tshoganyetso pele dingwaga tse di sekete di simologa. Gape letsatsi leo le bidiwa bokhutlo jaaka go tlhalositswe mo ditlhogong tse di simololang tsa makasine ono. Ka letsatsi leo, Modimo o tla fedisa baikepi botlhe. (2 Petere 3:7) Ka jalo, re tshwanetse go bontsha gore re rata Modimo.—Bala 2 Petere 3:9, 13.