SETLHOGO SA KA FA NTLE | A GO BOTLHOKWA GO RAPELA?
Goreng Batho ba Rapela?
“Ke ne ke tshwakgotswe ke go betšha. Ke ne ke rapelela gore ke gape madi a mantsi mme go ne ga pala.”—Samuel,a Kenya.
“Kwa sekolong re ne re tlwaetse go boaboeletsa thapelo e re neng re e rutilwe.”—Teresa, Philippines.
“Ke rapela fa ke na le mathata. Ke rapelela gore ke itshwarelwe maleo le gore ke nne Mokeresete yo o molemo.”—Magdalene, Ghana.
Se Samuel, Teresa le Magdalene ba se buileng se bontsha gore batho ba rapela ka ntlha ya mabaka a a farologaneng, bangwe ba rapelela dilo tse di botlhokwa go gaisa ba bangwe. Batho ba bangwe ba rapela go tswa pelong; ba bangwe ba rapela fela. Le fa go ntse jalo, batho ba le bantsi ba tsaya go rapela go le botlhokwa, e ka ne ba rapelela gore ba falole ditlhatlhobo kwa sekolong, gore setlhopha sa bone sa metshameko se fenye, gore Modimo a kaele lelapa la bone kgotsa ka ntlha ya mabaka a mangwe a mantsi. Tota e bile, dipatlisiso di bontsha gore le batho ba ba sa tseneng kereke ba rapela ka metlha.
A o a tle o rapele? Fa go le jalo, o rapelela eng? Le fa o tlwaetse kgotsa o sa tlwaela go rapela, o ka tswa o ipotsa jaana: ‘A go botlhokwa go rapela? A go mongwe yo o ntheetsang?’ Mokwadi mongwe o ne a re thapelo ke “tsela ya go ikalafa . . . jaaka go bua le tlhapi e o e ruileng mo lapeng.” Ba tsa kalafi le bone ba bua se se tshwanang, ba re thapelo ke “tsela e nngwe ya go ikalafa.” A thapelo ke seomodiro fela mo bathong ba bangwe kgotsa ba a bo ba ikalafa?
Go farologana le seo, Baebele ya re thapelo e gaisa mofuta le fa e ka nna ofe wa kalafi. E re bolelela gore go na le mongwe yo o reetsang dithapelo tse di siameng. A seno se boammaaruri? Mma re bone bosupi.
a Maina mangwe a fetotswe.