Tswelelang Pele lo Ungwa Loungo ka Bopelotelele

¹ Fa moaposetoloi Paulo a ne a kwalela phuthego e e kwa Kolose, dingwaga tse di ka kwa tlase ga di le 30 morago ga loso lwa ga Jesu Keresete le tsogo ya gagwe, o ne a ka bolela gore boammaaruri jwa mafoko a a molemo bo ne bo ungwa ebile bo oketsega mo lefatsheng lotlhe. (Bakol. 1:5, 6) Gompieno ka selekanyo se segolwane le go feta, Basupi ba ga Jehofa ka mo go bonalang ba fitlheletse ‘dikhutlo tsa lefatshe’ ka mafoko a a molemo a Bogosi. (Dit. 1:8; Yoh. 14:12) Ka ngwaga wa tirelo wa 1989, go ne go na le koketsego ya 5,6 lekgolong mo palogareng ya baboledi ba Bogosi lefatshe ka bophara, mme re ile ra fitlhelela tlhora e ntšha ya baboledi ba le 3 787 188 mo dinageng di le 212!

² Mo dinageng tseo go rerwa ga Bogosi jwa Modimo go thibetsweng kwa go tsone mme dipego tsa gone di sa felela, go nnile le koketsego e kgolwane le eleng go feta eo ya 7,6 lekgolong eo e begilweng! Go sa kgathalesege mathata a le mantsi ao a leng teng mo mafatsheng ao, baboledi ba tswelela pele ba ‘ungwa loungo ka bopelotelele.’ (Luke 8:15) Mo mafelong a mangwe dikgatelelo di fokotsegile, mme lefa go ntse jalo maemo a a boima a tswelela pele a sa fetoge mo dinageng tse dingwe.

³ Mo dinageng tseo go nang le kgololesego e kgolwane ya go tsweletsa ditiro tsa go rerwa ga Bogosi kwa go tsone, re lebana le mathata a a farologaneng. Go lebanwa le go tlhoka kgatlhego le go sa kgathaleng go gontsi, segolobogolo koo batho ba nang le katlego mo dilong tse di bonalang gone. Batlhanka ba ga Jehofa ba tshwanetse gore ba itise gore ba seka ba nna le mekgwa e e ntseng jalo. Ga re batle gore go kgatlhegela dilo tse di bonalang, menate, boitlosobodutu, le dikgoreletsi tse dingwe di itshunye nko mo ditirong tsa rona tsa bolegodimo. Go seng jalo re ne re ka nna batho bao ba sa kgathaleng mme ra palelwa ke go lemoga kafa go tlhokafalang ka gone gore re tswelele pele re ungwa leungo ka bopelotelele.—Luke 21:34-36.

GO TLHOKAFALA BOPELOTELELE LE GO DIRA BOITEKO

⁴ Bopelotelele bo a tlhokafala go sa kgathalesege gore a re lebane le go ganediwa ga mafoko a a molemo kana re na le kgololesego e e tlhokafalang ya go ka tsweletsa maikarabelo a rona a Bokeresete pele. Mo mafatsheng a mangwe, bakaulengwe ba rona ba na le masomesome a dingwaga ba dira ba le kafa tlase ga maemo a a botlhoko. Bopelotelele jo ba ileng ba nna le jone ba le kafa tlase ga maemo a a botlhoko go le kalo go ile ga felela ka gore ba nne le boemo jo bo amogelesegang, mme jaanong ba roba masego a mantsi. (Bar. 5:3-5; Bagal. 6:9) Lefa re lebana le mathata lefa e ka nna afe, re tshwanela gore re tswelele pele re ntse re itshokile ka bopelotelele. Go tshwanetse ga neelwa bosupi kaga Bogosi, mme rotlhe re tshwanetse go tswelela pele re bontsha bothokgami jwa rona. Ka go nna pelotelele ga rona, re tla babalela moya wa rona kana botshelo jwa rona.—Mareko 13:10; Luke 21:19.

⁵ Re ka bontsha gore ga re tseye dilo tsa semoya jaaka dilo tseo di seng botlhokwa ka go iteka ka natla mo tirelong ya ga Jehofa, re sa lape mo tirong ya go rera. Mo mafatsheng mangwe ao mo go one go leng thata le go feta go bona dipalangwa, koo dilo tse di bonalang di tlhokwang gone, le koo go nang le mathata a tsa itsholelo gone, go rerwa mafoko a a molemo go sa repisiwe. Mo dinageng di le mmalwa tse di ntseng jalo, baboledi ba phuthego ba dira palogare ya diura tse 14 go ya go 17 ka metlha mo tirelong ya tshimo kgwedi nngwe le nngwe. Mephato ya bone ya babulatsela le yone e oketsega e sa kgaotse. Seno se dira gore ba rona bao ba nang le dilo tse di bonalang re eme le go akanya. A re ka oketsa seabe sa rona sa ka metlha mo tirong e e botlhokwatlhokwa ya go rerwa ga Bogosi le ya go dirwa ga barutwa?

A RE KA DIRA MO GO OKETSEGILENG?

⁶ Go senya nako e e oketsegileng mo tirelong ya tshimo go ka nna ga tlhoka gore re fetole dithulaganyo tsa rona go le gonnye. Fa e le gore re ntse re senya ura e le nngwe ka Sontaga mo tirelong ya tshimo, a gongwe re ka oketsa nako eo ka go senya ura e nngwe gape ka go dira maeto a go boela kana ka go tshwara thuto ya Bibela? Kana fa e le gore re tshwara thuto ya Bibela, a re ka akaretsa ura kana go feta moo mo tirelong ya ntlo le ntlo kana ka go dira maeto a go boela a se makae pele ga thuto? Ka Matlhatso morago ga go senya diura tse pedi mo tirong ya dimakasine, gongwe re ka nna ra isa dimakasine kwa go bao re tlholang re ba isetsa tsone ka metlha kana ra leka go dira maeto a go boela a se makae. Bao ba nnang mo lefelong la setoropo ba ka nna ba fitlhela go le motlhofo go senya nako e e rileng mo bosuping jwa mmila. Ka ditsela tseno kana tse dingwe, re ka kgona go oketsa seabe sa rona mo tirelong ya tshimo. Matswela a a molemo le one a tla oketsega ka selekanyo se se kwa godimo.

⁷ Go senya nako e e oketsegileng mo tirelong ya tshimo ka go dira maeto a go boela kwantle ga pelaelo go tla felela ka gore re tshware dithuto tse di oketsegileng tsa Bibela. Fa nako e ntse e tsamaya seno se tla kaya gore batho ba ba oketsegileng ba tla tsena mo boammaaruring le go re thusa go dira tiro ya go rera ka Bogosi.—Math. 28:19, 20.

THAPELO E BOTLHOKWA

⁸ Gore re tle re tswelele pele re ungwa leungo ka bopelotelele, re tshwanetse go batla tshegofatso ya ga Jehofa le go ineela go kaelwa ke moya wa gagwe. Re tshwanetse go dira gore tirelo ya rona e nne selo seo re se rapelelang mo go Jehofa. Fa re rapela Jehofa malebana le tirelo ya rona ya tshimo, seo se re gakolola gore re badirimmogo le ene. (1 Bakor. 3:9) Ka thuso ya ga Jehofa, re ka kgona go nna pelotelele mo tirelong ya rona le eleng fa re sa bone matswela ka bonako. Mo mafelong a mangwe, go ile ga nna le koketsego fela morago ga dingwaga di le dintsi tsa go nna bopelotelele ka boikanyegi ga baboledi ba Bogosi. Jaaka fa re lebile pele kwa isagweng jaana, go botlhokwa gore ka metlha re batle kaelo le thuso ya bomodimo gore re tle re seka ra tlogela mme re swetse bodihedi jwa rona ka botlalo. (2 Tim. 4:5) Go santse go na le maungo a mantsi ao a tlhagisiwang mo tirong ya go rera ka Bogosi le ya go dira barutwa.

⁹ Jesu o ne a gatelela kafa go leng botlhokwa ka gone gore re rapele ka metlha. (Luke 18:1) Paulo o ne a tlhagisa jaana: “Lo rapeleñ ka go bisa go khutla.” (1 Bathes. 5:17) Go na le mabaka a a botlhokwa a go bo re tshwanetse go rapela re sa kgaotse gone jaanong. Go na le maikarabelo a le mantsi ao a kopanyelediwang mo go tlhokomeleng letsomane le le golang go dirwa jalo ngwaga le ngwaga. Re batla go thusa ba bangwe gore ba ungwe leungo ka bopelotelele. Go tshwanetse ga tlhokomelwa dilo tse di farologaneng tse baboledi ka bongwe ba di tlhokang le tse di tlhokwang ke phuthego yotlhe. Ereka re bona kafa meneelo e tlhokafalang ka gone gore go tshegediwe tiro le gore go tswelwe pele ka go gatisiwa ga dibuka tse di theilweng mo Bibeleng, re batla go rapela Jehofa gore a tswelele pele a tlhotlheletsa batho ba ba boifang Modimo gore ba nne pelotshweu mo ntlheng eno.—2 Bakor. 9:8-11.

¹⁰ Jaaka fa dikarolo dingwe tsa tshimo ya lefatshe lotlhe di ntse di bulega jaana gore tiro ya bolegodimo e tswelele pele mo go tsone go ya bokgakaleng jwa go feta le fa e le leng pele, tlhagiso eno ya Dikwalo e e mo go Bakolosa 4:2 e nna le bokao le go feta: “Cwèlèlañ ka tlhōmamō mo thapeloñ, lo nntse lo lebeletse mo go eōna ka go ntsha malebogō.” Dithapelo tsa rona e tshwanetse go nna tseo mo go tsone re rapelelang bakaulengwe ba rona gongwe le gongwe gore ba tswelele ba ungwa leungo, ba thusa ba bangwe ba sekadinku bao ba bonweng mo mafelong ao go neela bosupi go neng go le boima mo go one mo nakong e fetileng.

BONTSHA TEBOGO

¹¹ Abo re lebogela letlotlo la dipaakanyetso tsa semoya jang ne tseo re di ipelelang thata jaana! Re batla go lebogela Jehofa dilo tseno, mme gape re rapelela gore a tswelele pele a segofatsa tiro ya motlhanka yo o boikanyo le Setlhopha sa gagwe se se Laolang. Matsapa a bone a ka boikokobetso, ao ba a dirang ba sa lape ba a direla rona mmogo le ba sekadinku go dikologa lefatshe a anaanelwa thata.

¹² Go ile ga jalwa peo ya Bogosi ka go tsamaisiwa ga selekanyo seo se seng kana ka sepe sa dibuka. (Math. 13:3-8, 18-23) Lefa go le jalo, go santse go na le tlhokafalo e e tswelang pele ya Dibibela le dibuka tsa Bibela mo tshimong. Pego ya lefatshe lotlhe e bontsha gore go ile ga jalwa thata ga bo ga nosediwa thata ka tsela ya maeto a go boela le ka dithuto tsa Bibela tsa magae. Fa re ntse re tswelela pele go dira seabe sa rona mo dikarolong tse di botlhokwa tseno tsa bodihedi jwa rona, re lebogela Jehofa go bo a tswela pele a re segofatsa eleng seo se dirang gore go nne le kgolo. Eleruri, re rapelela tshegofatso eo.—1 Bakor. 3:6, 7.

DITLHOKAFALO TSE DINGWE

¹³ Ereka Bakeresete ba le mo lefatsheng lemororo ba se karolo ya lona, ba tla tswelela ba ntse ba lebana le diteko le dithaelo, mme di bile di tla oketsega mo metlheng eno ya bofelo. Bangwe gone jaanong ba itshokela pogiso kana mathata a mangwe. Bangwe ba tshwanelwa ke gore ba tsweletse ditiro tsa bone tsa Bokeresete mo mafatsheng a a garasantsweng ke ntwa. Bakaulengwe ba rona ba ile ba diragalelwa ke masetlapelo a a ntseng jaaka dithoromo tsa lefatshe, dithaefune, le dikgwanyape. Fa seno se diragala, re tshwanetse ra rapelela bakaulengwe ba rona ba ba mo mafelong a a ntseng jalo. (Bapisa Ditihō 12:5; 2 Bakorintha 1:11.) Ka dinako tse dingwe go tlhokafala gore go buisanwe le batlhankedi ba ba mo maemong a a kwa godimo kana ba kwalelwe malebana le dithibelo tse di beilweng mo tirong ya rona, go bogisiwa ga bakaulengwe ba rona, kana malebana le mabaka a mangwe ao a amang dikgatlhego tsa Bogosi. Kafa tlase ga maemo a a ntseng jalo, re dira bojotlhe jwa rona ka namana, mme re ntse re rapelela batho ba ba ntseng jalo gore ba tle ba nne le maikutlo a a molemo go batlhanka ka rona.—1 Tim. 2:1, 2.

¹⁴ Go na le dikgatelelo di le dintsi tseo di welang malapa ao a tshelang mo lefatsheng le le boikepo leno la ga Satane. (2 Bakor. 4:4) Banyalani ba ka nna ba lebana le mathata a a masisi. Ba tshwanetse ba kgothalediwa gore ba rapelele gore Modimo o ba kaele, mme gape le rona re tshwanetse go ba rapelela. (1 Bakor. 7:5; 1 Pet. 3:7) Ditlhogo tsa malapa di tshwanetse go lemoga gore Jehofa o tla utlwa dithapelo tsa bone tse ba di dirang ka tlhoafalo ba rapelela kaelo ya go ka laola malapa a eleng a bone sentle. (Baatlh. 13:8; Bafil. 4:6, 7) Basha mmogo le ba ba godileng ba lebana le maemo a a thata. Seno se ka nna sa diragala kwa sekolong, kwa tirong ya boitshediso, mo loetong, kana mo maemong a mangwe. Thapelo e re thusa go ganana le moya wa lefatshe leno le le boikepo le gore re tswelele pele re ungwa maungo jaaka fa re ntse re tswela pele re dira dilo tseo di kgatlhang mo matlhong a Modimo.—Math. 6:13; Baef. 6:13-18; 1 Yoh. 3:22.

¹⁵ Jehofa ke Moutlwi yo mogolo wa thapelo. (Pes. 65:2) Ka dinako tsotlhe re tshwanelwa ke gore re latlhele ditlhobaelo tsa rona mo go ene. (Pes. 55:22) Re na le ditshono tsa go bontsha kafa re amegileng ka gone re bontsha seo ka thapelo re rapelela dikgatlhego tsotlhe tsa Bogosi mmogo le kafa bakaulengwe ba rona ba tshelang ka gone gongwe le gongwe. Fa re akanya ka tiro ya bao ba etelelang pele mo phuthegong le ya bao ba kaelang thulaganyo ya kgolo e e diragalang lefatshe ka bophara, fa re dirisana le bao ba lwalang semoyeng, kana fa re berekana le mathata a mangwe a mannye kana a magolo, rotlhe re tshwanetse go baya dikgang tse di ntseng jalo fa pele ga ga Jehofa ka thapelo. (1 Bathes. 5:25; Yak. 5:14-16) Ee, ditlhobaelo tsa rona di tshwanetse tsa latlhelwa mo go Jehofa re na le tsholofelo ka botlalo gore go sa kgathalesege gore ke eng seo re se kopang re se kopa tumalanong le thato ya gagwe, o tla re utlwa. (1 Pet. 5:7; 1 Yoh. 5:14) Ekete re ka tlhagafala mo tirelong ya Bogosi mme ka metlha re lebe kwa go Jehofa gore a re thuse go tswelela pele re ungwa leungo ka bopelotelele.