Go Anaanela Babulatsela ba Rona
1 Badirimmogo bao ba berekelang Bogosi jwa Modimo ba a nonotshana. (Bakol. 4:11) Fa re akanya ntlha ya gore tiro ya konokono ya phuthego ya Bokeresete ke go rera mafoko a a molemo, go na le mabaka ao a re pateletsang gore re anaanele badiredi ba nako e e tletseng bao ba leng mo gare ga rona.—Mar. 13:10; Bar. 16:2; Bafil. 4:3.
KA NTLHAYANG?
2 Babulatsela ba aga phuthego ka tsela e e tlhamaletseng ka go bereka mmogo le baboledi bao ba senang boitemogelo go le kalo mo dikarolong tse di farologaneng tsa tiro ya go rera. Seno se akaretsa go supa ka dimakasine, go baakanyetsa maeto a go boela le go a dira, le go simolola dithuto tsa magae tsa Bibela mmogo le go di tshwara ka tsela eo e nang le katlego. Mo godimo ga moo, babulatsela ba ka tlhoma sekao mo go neeleng bosupi jo eseng jwa ka tlwaelo ka bopelokgale. Tsela eo ba tshegetsang dithulaganyo tsa ditlhopha tse di supang mo gare ga beke ka yone e ba neela sebaka sa gore ba thuse ba bangwe. Tlhotlheletso e e molemo eo ba nang le yone mo tshimong e ka lemogiwa segolobogolo fa babulatsela ba ema tirelo ya tshimo nokeng ka mafelobeke, eleng nako eo ka yone baboledi ba bangwe ka bontsi ba kgonang go nna le seabe mo go yone.
3 Babulatsela ba thusa diphuthego mo go berekeng tshimo yotlhe ka botlalo le go dira jalo kgapetsa kgapetsa. Seno se kgonisa batho gore ba tlwaelane botoka le molaetsa wa rona le gore ba phuthologe ka mo go oketsegileng fa re ba etela ka gonne ba itse gore re batho ba ba ntseng jang. Diura di le dintsi tseo babulatsela ba di senyang ba le mo tshimong ba tlogela dibuka mo bathong ba ba kgatlhegang le go tlhagolela kgatlhego—tota, ba jala mmogo le go nosetsa dipeo tsa boammaaruri—go ka felela fela ka gore tshimo e nne e e tlhagisang maungo go ya pele.—1 Bakor. 3:6.
MO PHUTHEGONG
4 Ba le bantsi ba ile ba tlhotlhelediwa gore ba tsenele tirelo ya nako e e tletseng e le ka ntlha ya gore pelo ya bone e ile ya angwa ke tlhoafalo le matlhagatlhaga tsa babulatsela ba ba ikanyegang. Kgaitsadi yo mongwe o ne a etsaetsega malebana le go ka fetoga mmulatsela wa ka metlha ka gonne go ne go sena bape mo phuthegong. Mme lefa go ntse jalo e ne ya re fa a kgothalediwa go dira jalo ke molebedi wa potologo, a bo a tswela pele a ikwadisa. E ne ya re ka bonako fela ba bangwe le bone ba bo ba latela, mme phuthego eo jaanong e na le palo e e boitshegang ya babulatsela ba ba tlhoafetseng.
5 Go ka nna ga nna le dinako tseo ka tsone bagolwane ba ka nnang ba kopa mmulatsela gore a thuse motho mongwe yoo a sa tsweng ka metlha kana yo o tsidifetseng. Thuso eno e ka nna ya akaretsa go tshwara thuto ya Bibela le motho yoo. Ka gone tumelo mmogo le tlhoafalo tsa mmulatsela di ka thusa go tsosolosa lorato lwa motho yoo mo boammaaruring mme tsa bo tsa thusa go mo tsosolosa gore a diragatse maikarabelo a boineelo jwa gagwe.—1 Bathes. 5:14.
KGOTHATSANG BABULATSELA
6 Babulatsela, lemororo ba dira go le gontsi go kgothatsa ba bangwe, bone ka bobone ba tlhoka go kgothadiwa e le gore ba ke ba tswele pele ba na le boipelo mo tirelong ya bone. (Bar. 1:12) A o bua ka tsela e e molemo ka bodihedi jwa bobulatsela? Fa esale o ne wa feleletsa leng go akgola mmulatsela o mo akgolela tiro ya gagwe mmogo le moya wa gagwe wa go intsha setlhabelo? Babulatsela ba itumelela segolobogolo go nna le mongwe yoo ba ka berekang le ene mo tirelong ya tshimo mo diureng tseo tsa letsatsi tseo mo go tsone go a bong go dule baboledi ba sekae fela. A o ka pata babulatsela mme gongwe wa senya diura tse di telejana mo go tshegetseng tiro ya go rera?
7 Ke tsela efe e nngwe eo o ka kgothatsang babulatsela ka yone? Mo godimo ga go ba akgola, o ka nna wa bontsha kafa o anaanelang ka gone badiri ba ba ntseng jalo ba ba dirang ka natla o e bontsha ka tsela nngwe e e bonalang eleng ka go ja dijo mmogo le bone, ka go ithaopela go ba thusa ka ditshenyegelo tsa bone tsa go sepela, le ka go ba tshegetsa ka ditsela tse dingwe tseo o ka kgonang ka tsone.—Bapisa 1 Bathesalonia 5:12, 13.
8 Fa bagolwane mmogo le batlhanka ba bodihedi e nna bone ba di gogang kwa pele mo phuthegong, babulatsela le baboledi ba tla tshegetsa dithulaganyo tseo di rulagantsweng sentle tsa tirelo. Ka gone rotlhe re tla bo re dirisa dimpho tseo re nang le tsone re di dirisetsa go ‘direlana.’—1 Pet. 4:10, 11.