Sokololang Batho go Tswa Kwa Lefifing go ya Kwa Leseding
1 Lefifi la semoya le bipa lefatshe. (Isa. 60:2) Fa e sale motho a wela mo boleong, Satane, “modimo oa lehatshe yeno,” o bolokile batho ba le mo lefifing la semoya, mme seno se ile sa felela ka go wela tlase ga boitshwaro.—2 Bakor. 4:4.
2 Ereka jaanong re neetswe lesedi ka boammaaruri, a re tlhomogela batho pelo jaaka fa Jesu a ne a dira? (Math. 9:36) Fa go le jalo, re tla anaanela kafa thomo eo a e neetseng moaposetoloi Paulo e leng botlhokwa ka gone ya go ‘budulola matlho a batho, gore ba tswe mo lefifing ba sokologele mo leseding, ba tswe mo thateng ea ga Satane ba sokologele mo Modimong.’—Dit. 26:16-18.
SEDIFATSA MEGOPOLO LE DIPELO
3 Ereka Satane a foufaditse megopolo ebile a dirile dipelo tsa batho ba gagwe gore di se ka tsa utlwa sepe, re ka dirang gore re ba thuse? Re tshwanetse ra fitlhelela megopolo ya bone le dipelo tsa bone ka Lefoko la Modimo. Paulo o ne a rapelela Baefesia gore matlho a dipelo tsa bone a sedifadiwe. (Baef. 1:17, 18) Ga go na sepe se se maatla go gaisa Lefoko la Modimo mo go fitlheleleng pelo. (Baheb. 4:12) Fa re itse seno re tshwanetse ra tlhotlheletsega gore re nne le botswerere mo go diriseng Bibela fa re bua le ba bangwe.
4 Dikarabo tsa gago mo dipotsong tse di latelang di ka nna tsa go thusa gore o nne le bokgoni mo bodiheding. A o baakanyeletsa tirelo ya tshimo sentle? A o na le thulaganyo ya go ithapisa gore o itlwaelanye le dilo tseo di bulang motlotlo tseo di gapang kgatlhego ya motho? A o dira gore o ithute Setlhogo sa bosheng sa Motlotlo o bo o leka go se dirisa? A o leka go fetola ba bangwe ka Dikwalo ka tsela e e tlhotlheletsang mo matlong?—Dit. 17:2.
TORA YA TEBELO KE THUSO
5 Tora ya Tebelo e thusitse ba le dimilione gore ba tswe mo lefifing mme ba sokologele kwa leseding. E re bontsha ka moo re ka dirisang ka gone melaometheo ya Bibela ya boitshwaro, ka moo re ka tlhaloganyang dipolelelopele tsa yone mo motlheng wa rona, ebile e kgona go farologanya gareng ga bodumedi jwa boammaaruri le jwa maaka e le gore re sepele ka tsela eo Jehofa a e amogelang.
6 Boammaaruri jwa Bibela jaaka fa bo tlotlomadiwa ke Tora ya Tebelo bo tlhagisitseng? Batho ba mefuta yotlhe ba thusitswe gore ba tle polokong ka kitso ya boammaaruri ya Modimo le Morwawe. (Yoh. 17:3; 1 Tim. 2:4) Mmadi mongwe o ne a bolela jaana: ‘Ke rata Tora ya Tebelo thata! Ditlhogo tsa yone di tshwanetse tsa thusa botlhe gore ba bone sentle gore re tshela mo dinakong dife le mo metlheng efe. Ke lebogela dipatlisiso tse dikgolo, thuto, le tiro eo lo e dirang fa lo kwala Tora ya Tebelo, eo tota eleng dijo tsa semoya.’
DIRISA BOTLHALE
7 Mo kgweding eno ya bobedi ya tlhabano ya peeletso ya Tora ya Tebelo, re tshwanetse ra batlana le ditshono tsa go sokolola batho go tswa kwa lefifing go ya kwa leseding. Metlotlo ya Bibela eo re nnang le yone le batho bao re ba etelang ka ntlo le ntlo e re thusa gore re dire seno. Fa re fitlhela batho bao ba bontshang kgatlhego ya mmatota mo molaetseng wa Bogosi, re ka nna ra ba bontsha kafa go bala Tora ya Tebelo ka metlha go leng molemo ka gone. Fa mong wa ntlo a tlwaelane le makasine ono ebile a o rata, o ka nna wa mmotsa gore a ga a rate go dira peeletso ya one. Fa a sa batle go dira peeletso ya ngwaga otlhe, o ka nna wa mmontsha peeletso ya dikgwedi di le thataro. Tswelela o ntse o etela botlhe bao ba dirileng dipeeletso ka maikaelelo a go simolola thuto ya legae ya Bibela eo e nang le matswela.
8 Jaaka fa re tsamaya ka ntlo le ntlo, re nna le seabe mo go neeleng bosupi jwa mmila, kana re neela bosupi jo eseng jwa ka tlwaelo mo go bao re berekang le bone, bao re tsenang sekolo le bone, le balosika, re nna le seabe mo go anamiseng boammaaruri jo bo ka gololang batho. (Yoh. 8:32) Tora ya Tebelo ke sedirisiwa se se kgethegileng seo se ka ba thusang gore ba bone kgololesego mme ba nne le tsholofelo ya botshelo jo bo sa khutleng, e ba sokolola go tswa kwa lefifing go ya kwa leseding.