A o Jala ka Bogolo?
1 Go na le polelo e e reng: “Fa o tsenya marapo dinameng o tla roba go le gontsi.” Go ntse fela jalo mo kobamelong ya rona. Fa re dirisa nako e ntsi le go dira maiteko a magolo re baakanyetsa dipokano, re rera molaetsa wa Bogosi, le go bontsha bakaulengwe ba rona lorato, re tlile go gola thata semoyeng. Fa re sa dire jalo re tla diragalelwa ke se se fapaaneng le seno. A ruri re ka lebelela go bona matswela a a kgotsofatsang fa re ikgogona kana re sa dire ka pelo yotlhe?
2 Moaposetoloi Paulo o ne a bolela molaomotheo ono sentle mo go 2 Bakorintha 9:6 jaana: “Eo o yalañ ka boñoma, o tla rōba ga boñoma: me o eo yalañ ka bogolo, o tla rōba ga bogolo.” A o jala ka bogolo?
3 Thuto ya Gago ya Bibela: Re tshwanetse go jala pele ka bogolo mo thutong ya rona ka namana gore re kgone go nna le maungo jaaka badihedi. Re tshwanetse go eletsa dijo tsa semoya fela thata. (Pes. 119:97, 105; Math. 5:3) Re tshwanetse go dira maiteko tota gore re kgone go lemoga dilo tse re di tlhokang tsa semoya gonne re gatelelwa ke mathata a botshelo a letsatsi le letsatsi. Ba bantsi ba rona ba tlhoka go “shwèla lobaka molemō.” (Baef. 5:16) Ba bangwe ba rulaganya gore ba tsoge go sa le gale mo malatsing a mangwe gore ba ithute ka namana. Bangwe ba beetse nako nngwe ya maitseboa kwa thoko gore ba dire seno. Tota re roba ka bogolo ka tsela efe? Tumelo ya rona e a nonofa, tsholofelo ya rona e a phatsima, le ditlhaloganyo tsa rona di nna di itumetse e bile di akantse dilo tse di siameng.—Bar. 10:17; 15:4; 1 Pet. 1:13.
4 Dipokano tsa Phuthego: Dafide o ne a bolela jaana mo go Pesalema 122:1: “E rile ba nthaea, ba re, A re eeñ kwa tluñ ea ga Yehofa, ka itumèla.” A o ikutlwa jalo le wena? Go jala ka bogolo go raya go nna teng ka metlha mo dipokanong tsa rona tse tlhano tsa beke le beke. Swetsa gore ga o kitla o letla maemo a bosa a a sa nnang sentle go go kgoreletsa. Gantsi, re segofadiwa thata fa re ntse re fenya dikgoreletsi tse dintsi.
5 Goroga pele ga nako mme o nnenne lobakanyana gore o kgone go tlotla le bakaulengwe ba gago o ba aga. Tsalana le batho ba ba oketsegileng mme o akaretse ba bantsi ba ba farologaneng. Baakanyetsa Thuto ya Tora ya Tebelo le dipokano tse dingwe sentle gore o tle o kgone go jala ka bogolo ka go akgela fa o ka fiwa sebaka. Fa o ‘nosa’ ba bangwe kwa dipokanong, le wena o tla “nosiwa.”—Dia. 11:25.
6 Bodihedi jwa Tshimo: Gongwe e bile molaomotheo ono wa go jala ka bogolo ga o dire gope thata jaaka mo bodiheding jwa tshimo. Fa re dirisa nako e ntsi mo go jone, re tlile go nna le maitemogelo a a kgatlhang thata, maeto a go boela a a nang le maungo, le dithuto tse di gatelang pele tsa Bibela.
7 Go jala ka bogolo mo bodiheding jwa tshimo go akaretsa boleng mmogo le bontsi jo re bo robang. Buka ya Go Fetolana ke sedirisiwa se se molemo thata se se re thusang go tokafatsa boleng jwa bodihedi jwa rona. Ditsebe 9-15 di na le diketapele di le 40 tsa ditlhogo tse 18 tse di re thusang go tsosa kgatlhego kwa mejakong. Fa o fitlhela batho ba ba kgatlhegang, tlhomamisa gore o kwala seo gore o kgone go boela mme o robe maungo a se o se jadileng. Re solofela gore maiteko a gago a tla felela ka gore o nne le thuto ya Bibela mme o ka kgona go thusa ba bangwe gape go jala ka bogolo.
8 Fa re jala ka bogolo, re ka solofela gore Jehofa o tla re segofatsa ka mo go oketsegileng.—Mal. 3:10.