A o Ka Thusa?
1 Moaposetoloi Paulo o ne a tlhagisa maloko a phuthego gore a “tlhokomelane ka tsela e e tshwanang.” (1 Bakor. 12:25) Ka gone, re tshwanetse go bontsha gore re kgatlhegela ba bangwe ka tsela ya mmatota re bo re iketleetse go ba thusa ka lorato fa go tlhokega. Ka sekai, bangwe ba bokgaitsadiarona ba semoya ba godisetsa bana ba bone mo boammaaruring ba se na balekane. Bokgaitsadi bano ba sikere boikarabelo jwa go thapisa bana ba bone semoyeng. Eleruri re tshwanetse go ba kgothatsa ka bopelonomi le go ba thusa “go ya ka dilo tse ba di tlhokang.” (Bar. 12:13a) A o ka ba thusa?
2 Ditsela Tse O ka Ba Thusang ka Tsone: Go ithaopela go pega ba ba tshwanelwang ke go tsamaya ka dipalangwa tsa botlhe go ba isa kwa dipokanong le kwa dikopanong go ka dira gore lelapa leo le boloke madi thata. Go thusa mmè go tlhokomela bana ba gagwe ba bannye kwa dipokanong go ka dira gore a solegelwe molemo thata mo thulaganyong. Ka mo go tshwanang, go mo thusa fa a ya le bana ba gagwe kwa tirelong ya tshimo go ka mo thusa fela thata. Go bontsha bana gore o a ba kgatlhegela eleruri—go tsalana le bone—go ka dira go le gontsi go tlhotlheletsa basha ba rona ka tsela e e siameng. Go laletsa lelapa la motsadi yo o se nang molekane go nna teng mo thutong ya lona ya lelapa nako le nako go tla ba nonotsha thata semoyeng.
3 Nna Botlhale: Re tshwanetse go nna kelotlhoko gore re se ke ra gatelela go thusa motho yo o sa tlhokeng thuso. E bile ga re batle go sunya nko mo dilong tsa lelapa la motho yoo, fa re mo naya thuso e a e tlhokang. Ee, bokgaitsadi le banyalani e ka nna bone ba ba mo seemong se se molemo thata go ka thusa kgaitsadi yo o tlhokang thuso.
4 Bakeresete botlhe ba kgothalediwa go ‘latela tsela ya tsholo e ntle’ mo go ba bangwe. (Bar. 12:13b) Go thusa bakaulengwe ba rona le bokgaitsadi ba semoya ke nngwe ya ditsela tse dintsi tse re ka bontshang ka tsone lorato lo lo jaaka lwa ga Keresete lo re nang le lone mo gare ga rona.—Joh. 13:35.