Lebokoso la Dipotso

◼ Ke dikgatiso dife tse re tshwanetseng go di ithuta le batho ba basha pele ba kolobediwa?

Pele motho a ka neela botshelo jwa gagwe go Jehofa le go kolobediwa, o tshwanetse go anya kitso ya boammaaruri. (Joh. 17:3) O tla bona tshedimosetso e a e tlhokang ka go ithuta boroutšhara jwa Modimo o Batla Gore re Direng? mmogo le buka ya Kitso E E Isang Botshelong Jo bo Sa Khutleng. Gantsi boroutšhara jwa Re Direng? ke jone jo bo tla ithutiwang pele. Le fa go ntse jalo, fa go simolotswe thuto ka buka ya Kitso, boroutšhara jwa Re Direng? bo tshwanetse jwa ithutiwa kwa bofelong jwa buka eno. Ke ka ntlha yang fa seno se le botlhokwa?

Boroutšhara jwa Re Direng? bo sobokanya dithuto tsa motheo tsa Baebele. Fa moithuti a bo ithutile pele, o tla tlhaloganya thata dilo tse di tlhokegang gore a itumedise Jehofa. Fa bo ithutiwa kwa bofelong, e tla bo e le tsela e e molemo ya go boeletsa se se ithutilweng mo bukeng ya Kitso. Mo mabakeng oomabedi, kgothaletsa moithuti go leba dikwalo tse di tshegetsang dintlha le go tlhatlhanya ka tsone. Tlhomamisa gore o tlhalosa ditshwantsho, ka gonne di thusa thata mo go ruteng.—Bona Tora ya Tebelo ya January 15, 1997, ditsebe 16-17.

Fa moithuti wa Baebele a setse a feditse dibuka tseno tse pedi, a ka kgona go araba dipotso tsotlhe tse bagolwane ba tla mmotsang tsone e le go ipaakanyetsa go ya go kolobediwa. Fa go le jalo, go ka nna ga se ka ga tlhokega gore go tshwarwe thuto ka metlha le ene ka buka epe e sele, le mororo go tlhokega gore motshwari wa thuto a tswelele pele a mo thusa gore a gatele pele.—Bona Tora ya Tebelo ya January 15, 1996, ditsebe 14, 17.