Masego a go Bontsha go Anaanela Lorato Lwa ga Jehofa—Karolo 2
1 Mo puong ya kgwedi e e fetileng e e neng e bua ka setlhogo seno, re ile ra gatelela ditsela di le nnè tse re ka bontshang mo bodireding jwa rona gore re anaanela lorato lwa ga Jehofa ka tsone. (1 Joh. 4:9-11) Fano re tlile go tlotla ka ditsela tse dingwe gape tse tlhano tse re ka dirang seno ka tsone. Fa re nna le seabe ka botlalo mo go thuseng ba bangwe semoyeng, re a segofadiwa.
2 Go Neela Bosupi jo e Seng Jwa ka Tlwaelo: Eno ke tsela e e nang le matswela thata ya go bona batho ba ba tshwerweng ke tlala le ba ba nyoretsweng tshiamo le go ba tsamaisetsa dibuka tse di tla ba thusang. Go molemo thata go ‘ithekela nako e e siameng’ le go naya bosupi ka dinako tsotlhe e bile re bo naya mongwe le mongwe yo re kopanang le ene. (Baef. 5:16) Re ka nna ra tshwanelwa ke go nna pelokgale gore re neye bosupi ka tsela eno, mme fa re bontsha gore re anaanela lorato lwa Modimo le go bontsha gore re lemoga dilo tse batho ba di tlhokang, re tla naya bosupi ka sebaka sengwe le sengwe.—2 Tim. 1:7, 8.
3 Morongwa mongwe o ne a segofadiwa thata ka ntlha ya go simolola puisano le monna mongwe yo a neng a palame le ene mo sepalangweng sa botlhe. Monna yono o ne a bontsha kgatlhego. Go ne ga dirwa loeto lwa go boela, mme thuto ya Baebele ya simololwa. Monna yono o ne a amogela boammaaruri mme a gatela pele go fitlha e nna mogolwane mo phuthegong!
4 Go Kwala Makwalo: Gongwe ga re kgone go ya ka ntlo le ntlo ka ntlha ya bokoa bongwe mo mmeleng kana maemo a a sa itumediseng a bosa. Re ka kwala makwalo, re a dirisa go naya batho ba re ba itseng bosupi ka bokhutshwane, e bong batho ba ba swetsweng ke baratiwa ba bone, kana ba re sa ba fitlhelang mo gae fa re le mo tshimong. Re ka tsenya mo lekwalong leo nngwe ya dipampitshana tsa rona tse di mo nakong tse di nang le molaetsa o o kgatlhang o o theilweng mo Baebeleng le tse di kgothaletsang motho yo o di amogetseng gore a kwale fa a na le dipotso dipe fela. Dirisa aterese ya gago kana ya Holo ya Bogosi; tsweetswee o se dirise aterese ya ofisi ya lekala.
5 Go Naya Bosupi ka Thelefouno: Eno ke tsela e e molemo ya go fitlhelela batho ba re sa kgoneng go kopana le bone mo tirong ya ntlo le ntlo. Fa re e dirisa ka botlhale, ka bopelonomi, ka matsetseleko, le ka botswerere re ka nna ra kopana le batho ba ba tla arabelang ka tsela e e molemo thata. Tirelo ya Rona ya Bogosi ya February 2001, ditsebe 5-6, e naya dikakantsho tse di mosola tsa kafa re ka nnang le matswela a a molemo ka teng.
6 Fa kgaitsadi mongwe a ne a neela bosupi ka thelefouno, o ne a botsa mosadi mongwe gore a o kile a akanya ka kelotlhoko gore go tlile go diregang ka ene le ba lelapa la gagwe mo isagweng. Mosadi yono o ne a araba ka gore o kile a akanya jalo. O ne a bontsha gore e re ka a ne a itlhobogile, o ne a itlhaotse mo go ba bangwe kwa gae. Ka ntlha ya go tlhotlhelediwa ke go amega ga kgaitsadi yono ka tsela ya mmatota, mosadi yono o ne a dumela go kopana le ene kwa mmarakeng mongwe o o gaufi. Ka ntlha ya seno, mosadi yono o ne a amogela thuto ya Baebele ka yone nako eo!
7 Go Amogela Baeng: Fa re rata baagelani ba rona, re tla nna kelotlhoko thata go lemoga motho ope fela yo re sa mo itseng yo o etetseng dipokano tsa rona mme re tla dira gore a ikutlwe a amogelesegile. (Bar. 15:7) Re tshwanetse go dira gore a bone gore o dikologilwe ke batho ba ba kgatlhegelang bomoya jwa gagwe eleruri. Fa re bontsha gore re amega ka ene ka tsela ya mmatota e bile re mo laletsa go ithuta Baebele le rona, seno se ka nna sa mo tlhotlheletsa go amogela thuso ya rona.
8 Boitshwaro Jwa Rona jo bo Molemo: Re kgabisa boammaaruri ka boitshwaro jwa rona jo bo molemo. (Tito 1:10) Fa batho ba lefatshe ba bua dilo tse di molemo ka rona Basupi ba ga Jehofa, ba galaletsa Modimo wa rona. (1 Pet. 2:12) Seno le sone se ka thusa ba bangwe go simolola tsela e e isang botshelong.
9 Ke eng fa o sa boeletse le go dirisa ditsela tseno tse tlhano tse re ka bontshang ka tsone gore re anaanela lorato lo logolo lwa ga Jehofa? (1 Joh. 4:16) Fa o ntse o dira jalo, o tla bona masego a magolo.