Kopano ya Kgaolo e re Rotloetsa go Tsamaya le Modimo
Kopano ya Kgaolo ya “Tsamaya le Modimo” e ile ya re gakolola ka botlalo taelo eno ya ga Jehofa: “Tsela ke e. Tsamayang ka yone.” (Isa. 30:21) Fa re dirisa taelo e re e neilweng seno se tla re thusa go ‘tlhokomela ka kelotlhoko e kgolo kafa re tsamayang ka gone.’ (Baef. 5:15) Go tlhatlhanya ka se re ithutileng sone go tla re thusa fa re ntse re ‘tswelela re tsamaya mo boammaaruring.’—3 Joh. 3.
O dirisa dipotso tse di latelang mmogo le dintlha tse o di kwadileng, baakanyetsa o bo o nne le seabe mo poeletsong ya thulaganyo ya kopano. Poeletso e tla tshwarwa mo Pokanong ya Tirelo ka beke ya February 21.
1. Enoke o ne a kgona jang go tsamaya le Modimo le fa a ne a tshela mo dinakong tsa matshwenyego? (Baheb. 11:1, 5, 6; Jude 14, 15; “Tsamaya le Modimo mo Dinakong Tseno Tsa Matshwenyego”)
2. Molaomotheo o o mo go Luke 16:10 o ka dirisiwa mo dikarolong dife tsa botshelo? (“A o ‘Ikanyega Mo go Se Sebotlana Thata’?”)
3. (a) Umaka dithuto tse nnè tse di molemo tse re di ithutileng mo kgaolong ya 6 go ya go 9 ya ga Hosea tse di tla re thusang go tsamaya le Modimo. (Hos. 6:6, 7; 7:14; 8:7) (b) Ke dintlha dife tse di oketsegileng mo kgaolong ya 10 go ya go 14 ya ga Hosea tse di re thusang go tsamaya le Modimo? (“Boporofeti Jwa ga Hosea bo re Thusa go Tsamaya le Modimo”—Puo ya Neeletsano)
4. Banna le basadi ba ba nyetsweng ba Bakeresete ba ka dira dilo dife go nonotsha lenyalo la bone? (Dia. 12:4; Baef. 5:29; “O se Ka wa Kgaoganya ‘se Modimo a se Kopantseng Mmogo’”)
5. Re bontsha jang gore re tlotla dikokoano tsa rona tse di boitshepo? (Mor. 5:1; Isa. 66:23; “Go Tlotla Dikokoano Tsa Rona Tse di Boitshepo”)
6. (a) Ke dintlha dife tse tharo tse di botlhokwa tsa tiro ya rona ya go rera tse re tshwanetseng go di sekaseka go tlhomamisa gore bodiredi jwa rona bo na le matswela? (Isa. 52:7; Seka. 8:23; Mar. 6:34) (b) Ke dintlha dife tsa bukana ya Good News for People of All Nations tse o di fitlhelang di le mosola thata? (“Dikgang Tse di Molemo Tsa Batho ba Ditšhaba Tsotlhe”; “Go Thusa ba ba Buang Puo e Sele”)
7. Re ka thusa jang ba ba sa tswang go kopanela gore ba itshepe fa ba neela molaetsa wa Bogosi? (Baatlh. 7:17; “Go Thusa Batho ba Bantsintsi Gore ba Kopanele le Rona mo Bodireding”)
8. Re ka bontsha jang gore ruri re tlhomamisegile gore “letsatsi le legolo la ga Jehofa le gaufi”? (Sefa. 1:14; “Re Tsamaya ka Tumelo, e Seng ka Pono”)
9. (a) Kgang ya go kgopisega e masisi go le kana kang? (Mar. 9:42-48) (b) Re ka tila jang go kgopisega? (Pes. 119:165) (c) Re ka dirang go tila go kgopisa ba bangwe? (1 Bakor. 10:24; “Se Neye ‘Lebaka Lepe la go Kgopisa’”)
10. Re ka nna le mogopolo o o lekalekaneng jang mo kgannyeng ya go batla molekane wa lenyalo, go batla go nna le botsogo jo bontle le mo ditumalanong tsa kgwebo? (Pes. 26:4; Math. 6:25; 1 Tim. 6:9; “Nnang lo Thantse ka Botlalo mo Ditlhaloganyong”)
11. (a) Ke eng se re se lemogang ka dinako tse Jesu a neng a di fetsa le ba bangwe go itlosa bodutu le bone? (Luke 10:42; 24:32) (b) Re ka itlosa bodutu jang ka tsela e e tla dirang gore rona le ba bangwe re lapologe? (1 Bakor. 10:31-33; “Ditiro Tse di Molemo Tse di Lapolosang”)
12. Go ya ka Pesalema ya bo23, Jehofa o re segofatsa jang e re ka re le dinku tsa gagwe, mme re na le maikarabelo afe? (1 Bakor. 10:21; “Jehofa ke Modisa wa Rona”)
13. Bakeresete ba latela jang kgakololo e e tlhotlheleditsweng ya go ‘ithekela nako e e ba siametseng’? (Baef. 5:16; “Go Ithekela Nako E e Re Siametseng”)
14. (a) ‘Nako ya go atlhola’ e e umakiwang mo go Tshenolo 14:7 e akaretsa eng? (b) Re bontsha jang gore ruri ga re karolo ya Babelona o Mogolo? (“‘Nnang lo Disitse’—Nako ya Katlholo e Gorogile”) (c) Ke dintlha dife tse di ileng tsa go kgatlha mo boroutšhareng jwa Nnang Lo Disitse!?
15. Ke dinonofo dife tse tharo tse re di tlhokang gore re se ka ra ‘tlogela tselana e tlhamaletseng’? (2 Pet. 2:15; “Itise Gore O se Ka wa ‘Tlogela Tselana e Tlhamaletseng’”)
16. Basha ba ka tila jang ‘tselana ya baikepi’? (Dia. 4:14; “Basha—Tsamayang mo Tseleng ya Tshiamo”)
17. (a) Paulo o ne a nna sekao sa go itshoka ka ditsela dife? (Dit. 14:19, 20; 16:25-33) (b) Ke ka ntlha yang fa re sa tlhoke go boifa ba ba ganetsang kobamelo ya boammaaruri? (Terama le puo e e reng “Neela Bosupi ka Botlalo Gompieno Le fa O Ganediwa”)
18. Ke masego afe a a tla tlelang ba ba tsamayang le Modimo? (“Go Tsamaya le Modimo go Lere Masego Gone Jaanong le ka Bosakhutleng”)
E kete re ka iketleeletsa go reetsa ‘lefoko kwa morago ga rona’ gore re kgone go tsamaya le Rraarona yo o kwa legodimong ka bosakhutleng.—Isa. 30:21; Joh. 3:36.