Thulaganyo ya Lelapa—Bodiredi Jwa Tshimo Jwa Lelapa
1 Jehofa o itumelela go bona bana ba baka leina la gagwe. (Pes. 148:12, 13) Mo motlheng wa ga Jesu, Modimo o ne a ‘lere pako ka . . . masea le ba ba anyang.’ (Math. 21:15, 16) Seno se sa ntse se direga le gompieno. Batsadi, lo ka thusa jang bana ba lona gore ba gole e le babaki ba ba tlhagafetseng ba ga Jehofa mo bodireding jwa Bokeresete? Fela jaaka go ile ga gatelelwa mo setlhogong se se fa godimo se se buang ka dipokano tsa phuthego, selo sa botlhokwa ke go ba tlhomela sekao. Rre mongwe o ne a bua mo boemong jwa batsadi botlhe fa a ne a re: “Bana ga ba dire se o se buang; ba dira se wena o se dirang!”
2 Kgaitsadi mongwe yo o godisitsweng ke batsadi ba ba boifang Modimo o gakologelwa jaana: “Fa re tsoga mo mosong go le Lamatlhatso, re ne re sa botse gore a re ya bodireding. Re ne re itse gore re a ya.” Ka tsela e e tshwanang, le wena o ka bontsha bana ba gago botlhokwa jwa tiro ya go rera ka go nna le thulaganyo e e tlhomameng ya beke le beke ya go nna le seabe mo bodireding jwa tshimo le lelapa la gago. Seno ga se dire fela gore bana ba gago ba ithute mo go wena ka go leba se o se dirang mme gape o tla kgona go ela tlhoko tsela e ba ikutlwang ka yone, tsela e ba itshwarang ka yone le gore ba na le bokgoni jo bo kana kang.
3 Go ba Thapisa Kgato ka Kgato: Gore bana ba itumelele bodiredi, ba tshwanetse ba bo ba ipaakanyeditse go nna le seabe ka tsela e e nang le matswela. Kgaitsadi yo go builweng ka ene fa godimo o ne a bolela jaana gape: “Re ne re sa tsamaye fela le batsadi ba rona mo tirong ya bone re sa dire sepe. Re ne re itse gore re na le seabe, tota le fa e ne e ka nna fela go kokota mo kgorong kgotsa go tlogela pampitshana ya taletso. Ka ntlha ya go baakanyetsa ka kelotlhoko pele ga tiro nngwe le nngwe ya mafelobeke, re ne re itse se re tlileng go se bua.” O ka thapisa bana ba gago ka tsela e e ntseng jalo ka go dirisa metsotso e le mmalwa beke le beke o ba baakanyetsa bodiredi, e ka tswa e le ka nako ya thuto ya lelapa kgotsa ka nako e nngwe e sele.
4 Go rera mmogo le lelapa la gago go go naya tshono ya go tsenya boammaaruri ka iketlo mo megopolong ya bana ba gago. Rre mongwe wa Mokeresete o ne a tle a tsamaye ka dinao le morwadie sekgala sa dikilometara di le lesome go ya le go boa, ba ya kwa motseng o o kwa mokgatšheng o mongwe go ya go tsamaisetsa batho ba teng dipampitshana. Morwadie o gakologelwa jaana ka boitumelo: “Rre o ne a dirisa tsone dinako tseno tsa fa re ntse re tsamaya go tsenya boammaaruri ka iketlo mo pelong ya me.” (Dute. 6:7) E kete le wena o ka segofadiwa ka go dira gore bodiredi jwa tshimo bo nne gone mo thulaganyong ya lelapa la gago ya beke le beke.