Go Nna Pelokgale Mme Gone re le Kagisano
1 Batho ba le bantsi ba re ba rerelang ba dumela ka bopeloephepa dilo tse di sa dumalaneng le boammaaruri jwa Baebele. Le fa re tshwanetse go rera ka bopelokgale, gape re batla go ‘agisana le batho botlhe’ le go tila go ba kgopisa go sa tlhokege. (Bar. 12:18; Dit. 4:29) Re ka nna jang pelokgale, mme gone re le kagisano, fa re rera molaetsa wa Bogosi?
2 Batla Dilo Tse lo Dumalanang ka Tsone: Motho yo o kagisano o tila dikganetsano. Go ganetsa dilo tse mong wa ntlo a di dumelang go sa tlhokege ga go kitla go dira gore a reetse molaetsa wa rona. Fa a bua sengwe se se phoso, gongwe re ka nna ra tlhagisa ntlha nngwe ka botlhale e re ka dumalanang le ene ka yone. Fa re tlotla ka se re dumalanang ka sone, re ka nna ra kgona go dira gore a se ka a nna le maikutlo a a sa siamang le go fitlhelela pelo ya gagwe.
3 Fa re tlhokomologa dilo tse di phoso tse mong wa ntlo a di buileng, a re a bo re ineela kgotsa re tseela boammaaruri kwa tlase? Nnyaa. Tiro ya rona re le badiredi ba Bakeresete ke go rera dikgang tse di molemo tsa Bogosi jwa Modimo e seng go ganetsa dikgopolo dingwe le dingwe tse di phoso tse batho ba di buang. (Math. 24:14) Go na le gore re tseege maikutlo fa mong wa ntlo a bua sengwe se se phoso, re ka leba seo e le tshono ya go lemoga tsela e motho yoo a akanyang ka yone.—Dia. 16:23.
4 Go Tshwara Mong wa Ntlo ka Seriti: Go na le dinako tse re tshwanetseng go nna pelokgale ka tsone fa re ganetsa dithuto tse di phoso. Le fa go ntse jalo, e re ka re le batho ba ba kagisano, re tila go sotla le go dirisa mafoko a a sa nyenyefatsang batho ba ba dumelang dilo tse di phoso le ba ba di rutang. Moya wa go itseela kwa godimo o ka dira gore batho ba bangwe ba re katoge, mme go nna bonolo le pelonomi go ka dira gore batho ba ba ratang boammaaruri ba batle go reetsa molaetsa wa rona. Go tlotla bareetsi ba rona le se ba se dumelang go ba naya seriti, mme seo se dira gore go nne motlhofo gore ba amogele molaetsa wa rona.
5 Moaposetoloi Paulo o ne a sekaseka dilo tse batho ba a neng a ba rerela ba neng ba di dumela a bo a ba rerela dikgang tse di molemo ka tsela e e neng e tla ba fitlhelela dipelo. (Dit. 17:22-31) Ka go rata o ne a nna “dilo tsotlhe mo bathong ba mefuta yotlhe,” gore a “boloke bangwe.” (1 Bakor. 9:22) Le rona re ka dira se se tshwanang ka go nna kagisano fa re rera dikgang tse di molemo ka bopelokgale.