“Agisanang le Batho Botlhe”
1. Ke kgakololo efe ya Baebele e re tshwanetseng go e dirisa fa re kopana le beng ba matlo ba ba sa rateng fa re ba etela?
1 Batho ba ga Jehofa ba rata kagiso e bile bodiredi jwa rona ke jwa kagiso. (Isa. 52:7) Le fa go ntse jalo, ka dinako dingwe re kopana le batho ba ba sa rateng fa re ba etela. Ke eng se se tla re thusang go agisana le bone mo maemong ao?—Bar. 12:18.
2. Ke ka ntlha yang fa go le botlhokwa gore re nne le temogo?
2 Nna le Temogo: Le fa batho bangwe ba nna bogale ka gonne ba ganetsa boammaaruri, ba bangwe bone ba ka tswa ba itshwara jalo ka ntlha ya mabaka a mangwe a a sa amaneng le molaetsa wa rona. Gongwe re ba etetse ka nako e e sa tshwanelang. Mong wa ntlo a ka tswa a galefisitswe ke mathata a gagwe. Tota le fa e le dikgang tse di molemo tse di mo galefisitseng, re tshwanetse go gopola gore a ka tswa a itshwara jalo ka gonne a tsieditswe. (2 Bakor. 4:4) Go nna le temogo go ka re thusa go nna re ritibetse le go lemoga gore tota ga a galefela rona.—Dia. 19:11.
3. Re ka bontsha jang gore re tlotla mong wa ntlo?
3 Bontsha Tlotlo: Batho ba le bantsi mo tshimong ba tshwareletse thata mo dilong tse ba di dumelang. (2 Bakor. 10:4) Ba na le tshwanelo ya go tlhopha go reetsa kgotsa go sa reetse. Le ka motlha ga re batle go nyatsa se mong wa ntlo a se dumelang kgotsa go mo naya kgopolo ya gore re itse Baebele botoka go mo gaisa. Fa re kopiwa gore re tsamaye, re tshwanetse go dira jalo ka tlotlo.
4. Go bua ka bopelontle go kaya eng?
4 Bua ka Bopelontle: Tota le fa batho ba re kgoba ka mafoko, re tshwanetse go ba araba ka bonolo le ka bopelontle. (Bakol. 4:6; 1 Pet. 2:23) Go na le gore lo ngangisane, leka go batla sengwe se lo dumalanang ka sone. Gongwe ka bonolo re ka kopa mong wa ntlo gore a re bolelele mabaka a go bo a ganetsa. Le fa go ntse jalo, ka dinako dingwe go botoka gore re kgaotse motlotlo gore re se ka ra mo galefisa le go feta.—Dia. 9:7; 17:14.
5. Go na le melemo efe ya go dira kagiso fa re le mo bodireding?
5 Fa re dira kagiso, mong wa ntlo a ka gopola tsela e re ileng ra itshwara ka yone a bo a reetsa mo nakong e e tlang fa mongwe a leka go mo rerela. (Bar. 12:20, 21) Tota le fa a lebega a ganetsa thata, letsatsi lengwe a ka nna mokaulengwe wa rona. (Bagal. 1:13, 14) Go sa kgathalesege gore a o tla kgatlhegela boammaaruri kgotsa nnyaa, re tla bo re tlotla Jehofa e bile re kgabisa thuto ya rona fa re tswelela re na le boikgapo e bile re nna kagiso.—2 Bakor. 6:3.