Go Tokafatsa Bokgoni Jwa Rona mo Bodireding—Go Araba Mong wa Ntlo yo o Bogale

Lebaka La go Bo go Le Botlhokwa: Batho ba bantsi ba re kopanang le bone mo bodireding ba botsalano. Le fa go ntse jalo, Jesu o ne a bolelela pele gore batho ba bangwe ba tla re tlhoa. (Joh. 17:14) Ka jalo, ga re a tshwanela go gakgamala fa mong wa ntlo a re galefela. Fa re lebana le boemo jono, re batla go mo araba ka tsela e e tla itumedisang Jehofa, yo re mo direlang. (Bar. 12:17-21; 1 Pet. 3:15) Go dira jalo go tla dira gore boemo bo se ka jwa nna maswe le go feta. Gape go tla naya mong wa ntlo le batho bape ba ba re lebileng bosupi go bo go dira gore ba batle go reetsa Basupi ba ga Jehofa mo nakong e e tlang fa ba ba etela.—2 Bakor. 6:3.

Kafa O ka Go Dirang ka Gone:

Tswelela o ritibetse e bile o le maitseo. Seno se ka reba mong wa ntlo bogale. O se ka wa kgopisiwa ke se a se buang. (Mor. 7:9) A ka tswa a na le mathata kgotsa re ka tswa re mo etetse ka nako e e sa siamang. Tota le fa a sa rate molaetsa wa rona, gantsi seno se direga ka gonne a boleletswe maaka ka rona.—2 Bakor. 4:4.
Araba ka bonolo le ka tlotlo. (Dia. 15:1) A o mo tsositse kgotsa o mo iteile tsebe? Le fa gone re sa kope maitshwarelo ka go bo re rera, re ka kopa maitshwarelo ka boikokobetso ka go bo re etile ka nako e e sa siamang. A o galefisitswe ke magatwe a a a utlwileng ka rona? Fa go le jalo, o ka nna wa re: “Ke tlhaloganya lebaka la go bo o galefile. Mme go bonala se o se utlwileng ka rona se se boammaaruri. A nka go tlhalosetsa lebaka la seo?” A ga a dumalane le se re se dumelang, gongwe malebana le go kgaolwa kgotsa go tshelwa madi? O ka nna wa re: “Ke a tlhaloganya. Batho ba bangwe le bone ba kile ba bua jalo. A nka go bontsha se Baebele e se rutang ka kgang eno?”
Fa motho a galefile thata, go ka nna botoka gore re itsamaele re sa mo araba. Fa a kopa gore Basupi ba ga Jehofa ba se ka ba tlhola ba mo etela gape, o ka mo tlhomamisetsa gore re tla dira jalo.

Leka Seno mo Kgweding Eno:

Ikatisetseng boemo jono ka nako ya kobamelo ya lelapa.
Fa lo sena go kgaogana le mong wa ntlo yo o bogale, bua le mmoledi yo o tsamayang le ene gore o ka bo o mo arabile jang ka tsela e e molemo.