Go Tokafatsa Bokgoni Jwa Rona mo Bodireding—Go Araba Batho Ba ba Ka Kgoreletsang Puisano

Lebaka La go Bo go Le Botlhokwa: Akanya o itse gore go tla tloga go nna le masetlapelo a tlholego. Batho ba tla swa fa ba sa tshabele kwa lefelong le le babalesegileng. O ya kwa moagelaning wa gago go ya go mo tlhagisa, mme o go tsena ganong a go bolelela gore o tshwaregile. Ga go pelaelo gore ga o kitla o itlhaganelela go tlogela go mo thusa! Batho ba le bantsi mo tshimong ya rona ba a re leleka, ga ba lemoge botlhokwa jwa molaetsa o o bolokang matshelo o re o tshotseng. Gongwe ka nako e re ba etelang ka yone ba a bo ba akantse ka dilo di le dintsi. (Math. 24:37-39) Kgotsa gongwe ga ba batle go re reetsa ka gonne ba tlhotlheleditswe ke magatwe a a seng boammaaruri. (Math. 11:18, 19) Ba ka nna ba akanya gore ga re farologane le madumedi a mangwe a a ileng a nna le ditiro tse di bosula. (2 Pet. 2:1, 2) Fa kwa tshimologong mong wa ntlo a sa kgatlhege, ga re a tshwanela go itlhaganelela go itlhoboga.

Kafa O ka Go Dirang ka Gone:

Pele ga o ya go rera ka ntlo le ntlo, iphe metsotso e se kae ya go akanya gore o tla araba jang batho ba ba ka kgoreletsang puisano ba o ka kopanang le bone.
Fa mong wa ntlo a gana go reetsa, leka go tsweletsa motlotlo ka bonolo. Gongwe o ka dira seo ka go mo akgola. Ka sekai, fa a re o na le bodumedi jwa gagwe, o ka nna wa araba ka gore, “Ke ne ke solofetse go kopana le mongwe yo o tshwanang le wena yo o kgatlhegelang dilo tsa semoya.” Ka dinako tse dingwe, go amogela tsela e mong wa ntlo a ikutlwang ka yone kgotsa maemo a gagwe go tla go thusa gore o tswelele pele go neela bosupi. Ka sekai, fa a re o tshwaregile, o ka nna wa re: “Ke a tlhaloganya. Mme pele ga ke tsamaya, nka rata go naya seno.” Tsela e nngwe e o ka e dirisang, ke go botsa potso fa mong wa ntlo a re ga a kgatlhege. O ka nna wa re, “A o raya gore ga o kgatlhegele Baebele, kgotsa a ga o kgatlhegele bodumedi?”
Dirisa temogo. Gakologelwa gore Jehofa ga a pateletse batho go reetsa. (Dute. 30:19) Mongwe le mongwe o tshwanetse go rwala morwalo wa gagwe wa boikarabelo jwa dilo tsa semoya. (Bagal. 6:5) Fa mong wa ntlo a tswelela a gana go reetsa, go botoka gore re tsamaye. Ka go bontsha gore re tlotla maikutlo a gagwe, re tla bo re dira gore mmoledi yo mongwe a nne le tshono ya go neela bosupi mo nakong e e tlang.—1 Pet. 3:15.

Leka Seno mo Kgweding Eno:

Fa o kopana le batho ba ba ka kgoreletsang puisano, fa o sena go tswa mo ntlong eo, tlotla le motho yo o tsamayang le ene malebana le tsela e e botoka e lo ka bong lo ile lwa araba ka yone.