Re Neilwe Letlotlo
1 Moaposetoloi Paulo o ne a tsaya thomo ya gagwe e a e neilweng ke Modimo ya go rera e le botlhokwa thata mme o ne a re ke “letlotlo.” (2 Bakor. 4:7) O ne a itshokela mathata le pogiso fa a dira thomo eo. O ne a rerela mongwe le mongwe yo o neng a kopana nae a sa lape. O ne a tsaya maeto a le mantsi a a boima le a a kotsi a tsamaya mo ditseleng le mo lewatleng. Re ka etsa Paulo jang le go bontsha gore re rata bodiredi jwa rona? (Bar. 11:13) Ke eng se se dirang gore bodiredi jwa rona e nne letlotlo le le ka se bapisiweng le sepe?
2 Letlotlo la Maemo a a Kwa Godimo: Gantsi matlotlo a mo lefatsheng a lere mahutsana a le mantsi mme a na le melemo e se kae fela kgotsa ya nakwana. Kafa letlhakoreng le lengwe, bodiredi jwa rona bo lere melemo ya leruri e e solegelang rona le ba bangwe molemo. (1 Tim. 4:16) Bo thusa batho ba ba peloephepa go itse Jehofa, go dira diphetogo tse di tlhokegang mo matshelong a bone le go nna le tsholofelo ya mmatota ya botshelo jo bo sa khutleng. (Bar. 10:13-15) Ka go tsaya bodiredi jwa rona e le sengwe sa maemo a a kwa godimo, re nna le boikaelelo jo bo kgotsofatsang mo botshelong, boikutlo jwa go fitlhelela sengwe, le go nna le tsholofelo e e kgothatsang ka isagwe.—1 Bakor. 15:58.
3 Bontsha Gore o Tsaya Letlotlo la Gago le le Botlhokwa: Tsela e re tsayang selo sengwe se le botlhokwa ka yone e bonala ka se re ikemiseditseng go se dira. A bo e le tshiamelo jang ne go dirisa nako le maatla a rona go baka Jehofa! (Baef. 5:16, 17) Tsela e re dirisang nako ya rona ka yone e tshwanetse ya bontsha gore re tsaya dilo tsa semoya e le tsone tse di botlhokwa thata go na le dilo tse di bonalang. E re ka re na le sengwe se se botlhokwatlhokwa go se bolelela ba bangwe, re tla batla go rera ka tlhagafalo le go tlhagafala go bolela dikgang tse di molemo ka sebaka sengwe le sengwe.
4 Gantsi matlotlo a a tlhwatlhwakgolo ga a fitlhiwe mme a bontshiwa ba bangwe. Fa re leba bodiredi jwa rona e le letlotlo, bo tla nna karolo e kgolo ya botshelo jwa rona. (Math. 5:14-16) Ka ditebogo, e kete ka dinako tsotlhe re ka etsa moaposetoloi Paulo le go sola sebaka sengwe le sengwe molemo go bontsha gore tota re tsaya bodiredi jwa rona bo le botlhokwa, re bo tseela kwa godimo jaaka letlotlo.