Etsa Keresete mo Bodireding Jwa Gago
1 Jesu o ne a re tlhomela sekao se re ka se latelang mo bodireding jwa rona. Tsela e a neng a rata Modimo le batho thata ka yone e ne ya bonala ka makgetlo a le mantsi le ka ditsela di le dintsi. O ne a ruta batho ba ba pelonolo boammaaruri e bile a dira ditiro tse di bontshang bopelonomi jwa lorato go thusa ba ba bogisiwang le ba ba gateletsweng.—Math. 9:35.
2 Sekao sa ga Jesu le Dithuto Tsa Gagwe: Jesu o ne a se ka a itewa tsebe ke go nna le seabe mo dikgannyeng tsa bopolotiki kgotsa go leka go direla ba bangwe molemo gore a tlhabolole setšhaba. Le gone o ne a sa letle gore go dira dilo tse dingwe tse di siameng go mo iteye tsebe kgotsa go tle pele ga tiro ya gagwe ya konokono. (Luke 8:1) O ne a tlhomile mogopolo mo go rereng dikgang tse di molemo tsa Bogosi jwa Modimo gore ke jone fela tharabololo e e nnelang ruri ya mathata a batho. Jesu o ne a na le tiro e e botlhokwa e a neng a tshwanetse go e dira le nako e nnye go e dira ka yone. Fa batho ba kwa Kaperenama ba ne ba batla gore Jesu a nne koo, o ne a raya barutwa ba gagwe a re: “A re yeng golo gongwe go sele, . . . gore ke tle ke rere le koo, gonne ke tletse jone boikaelelo jono.”—Mar. 1:38.
3 Fa Jesu a sena go thapisa barutwa ba gagwe, o ne a ba roma a ba neela ditaelo tseno tse di tlhamaletseng: “Lo rere, lo re, ‘Bogosi jwa magodimo bo atametse.’” (Math. 10:7) O ne a ruta balatedi ba gagwe gore dilo tse di direlwang Bogosi di tshwanetse go tla pele mo matshelong a bone. (Math. 6:33) Mafoko a bofelo a Jesu a neng a a bolelela barutwa ba gagwe pele ga a tlhatlogela kwa legodimong a ne a bontsha sentle se ba neng ba tshwanetse go se dira. O ne a re: “Jalo tsamayang mme lo dire batho ba ditšhaba tsotlhe barutwa.”—Math. 28:19.
4 Botlhokwa Jwa Bogosi: Setlhogo se segolo se Jesu a neng a bua ka sone e ne e le Bogosi jwa Modimo, mme o ne a rotloetsa barutwa ba gagwe go latela sekao sa gagwe. Maiteko a batho a go rarabolola mathata a batho ga a ka ke a atlega. (Jer. 10:23) Bogosi jwa Modimo ke jone fela jo bo tla itshepisang leina la Modimo le go golola batho ka bosakhutleng. (Math. 6:9, 10) Go ruta batho dithuto tsa Bogosi, ba ba “fegelwang le ba ba sonelang ka ntlha ya dilo tsotlhe tse di makgapha tse di dirwang” go ba thusa go tshela ba itumetse gone jaanong le go ngangatlela tsholofelo e e tlhomameng ka isagwe.—Esek. 9:4.
5 Jesu o tswelela pele go nna le seabe se se tlhagafetseng mo go rerweng ga dikgang tse di molemo tsa Bogosi jwa Modimo, mme o re tlhomamisetsa gore o tla re tshegetsa. (Math. 28:20) Bodiredi jwa rona bo tshwana le sekao se Jesu a re tlhometseng sone go ya bokgakaleng bofe? (1 Pet. 2:21) Mo metlheng eno ya bofelo e e botlhokwa, e kete re ka dira sotlhe se re ka se kgonang go latela thata sekao se Jesu a se tlhomileng mo bodireding!