O Tla Araba Jang?
1. Ke ka ntlha yang fa re tshwanetse go etsa sekao sa ga Jesu fa re bodiwa potso?
1 Go fitlha le gompieno batho ba sa ntse ba gakgamalela tsela e e molemo e Jesu a neng a araba dipotso ka yone. Fa re bodiwa dipotso tse di farologaneng fa re le mo bodireding jwa rona, re tla bo re dira sentle fa re ka etsa Jesu mo kgannyeng eno.—1 Pet. 2:21.
2. Ke eng se se ka re thusang gore re arabe dipotso ka tsela e e tla solegelang motho molemo?
2 Reetsa Pele: Jesu o ne a akanya ka lebaka la go bo motho a botsa potso. Ka dinako tse dingwe se se tlhoka gore motho a botse dipotso gore a tle a tlhomamise gore motho o akanya eng tota. Fa motho a botsa gore, “A o dumela mo go Jesu?” a ka tswa tota a ipotsa gore ke ka ntlha yang fa o sa keteke Keresemose. Fa o setse o lemogile gore motho yo o botsang potso o batla go itse eng tota, o ka kgona go mmeela mabaka ka tsela e e tla mo solegelang molemo.—Luke 10:25-37.
3. Ke eng se re nang le sone se se ka re thusang go bona dikarabo tse di kgotsofatsang tsa Dikwalo?
3 Araba ka Lefoko la Modimo: Gantsi go molemo go bontsha motho kafa Baebele e arabang potso ka teng. (2 Tim. 3:16, 17; Baheb. 4:12) Buka ya Go Fetolana le “Ditlhogo Tsa Baebele Tsa Puisano” tse di mo go Thanolo ya Lefatshe le Lesha ya Dikwalo Tse di Boitshepo di itshupile di le mosola ka go neela karabo e e tshwanelang. Le fa motho yo o botsang potso a sa dumele mo Baebeleng, o ka nna wa kgona go mmolelela ka botlhale se Dikwalo di se rutang. Kgothaletsa motho go sekaseka botlhale jo bo mo Baebeleng jo bo itshupileng bo le boammaaruri. Ka go etsa Jesu, dikarabo tsa gago di tla tshwana “le diapole tsa gouta mo dilong tse di setilweng tsa selefera”—di na le seriti, di le monate e bile di solegela molemo.—Dia. 25:11.
4. Ke ka dinako dife go leng molemo gore re se ka ra leka go araba potso nngwe le nngwe?
4 A re Tshwanetse go Araba Potso Nngwe le Nngwe? Fa o sa itse karabo ya potso, o se ka wa tlhabiwa ke ditlhong go bolela jaana: “Ga ke itse, mme nka dira dipatlisiso ka potso eo ke bo ke boa ka karabo e ke e boneng.” Go nna boikokobetso jalo le go bontsha mong wa ntlo kgatlhego go ka nna ga mo tlhotlheletsa gore a go kope gore o boe gape. Fa o lemoga gore batho ba ba botsang potso ke baganetsi ba ba ka tswang ba leka go simolola kganetsano, etsa Jesu ka go araba go se kae fela. (Luke 20:1-8) Ka tsela e e tshwanang, fa motho yo o se nang kgatlhego ya mmatota mo boammaaruring a leka go dira gore o ganetsane le ene, fedisa motlotlo ka botlhale mme o dirise nako ya gago go batla batho ba ba peloephepa.—Math. 7:6.
5. Jesu o ne a tlhoma sekao sefe sa go araba dipotso?
5 Jesu o ne a itse gore go ikaega ka Jehofa go botlhokwa gore a diragatse tiro ya gagwe ya go ‘supa ka ga boammaaruri’ e leng sengwe se se akaretsang go araba dipotso tse di bodiwang ka bopeloephepa. (Joh. 18:37) A bo e le tshiamelo jang ne go etsa Jesu fa re araba batho ba ba nang le “tshekamelo e e siameng ya go bona botshelo jo bo sa khutleng”!—Dit. 13:48.