Tsayang Baporofeti e le Sekao—Hosea
1. O ka tswa o kile wa ipotsa potso efe?
1 ‘Ke iketleeditse go itima dilo dife gore ke direle Jehofa?’ Gongwe o kile wa ipotsa potso eo fa o ne o tlhatlhanya ka bomolemo le boutlwelobotlhoko jwa gagwe jo bogolo. (Pes. 103:2-4; 116:12) Hosea o ne a dira ka go rata dilo tse Jehofa a neng a mo laela gore a di dire le fa seo se ne se tlhoka gore a itime dilo dingwe mo botshelong. Re ka etsa Hosea jang?
2. Re ka etsa jang sekao se se molemo sa ga Hosea sa go itshoka mo tirong ya go rera?
2 Rera ka Paka ya Matshwenyego: Molaetsa wa ga Hosea o ne o lebisitswe thata kwa bogosing jwa ditso di le lesome tsa Iseraele, kwa kobamelo ya boammaaruri e neng e batla e fedile gone. Kgosi Jeroboame II o ne a dira selo se se makgapha mo matlhong a ga Jehofa mme a tsweletsa pele kobamelo ya namane e e neng e simolotswe ke Jeroboame I. (2 Dikg. 14:23, 24) Dikgosi tse di neng tsa latela di ne tsa dira gore bogosi jwa ditso di le lesome bo tswelele bo wa semoyeng go fitlha kgabagare bo senngwa ka 740 B.C.E. Mme le fa kobamelo ya maaka e ne e atile, Hosea o ne a tswelela ka boikanyegi e le moporofeti ka dingwaga di ka nna 59. A le rona re iketleeditse go rera dingwaga di ntse di latelana, tota le fa batho ba sa kgatlhege kgotsa ba re ganetsa?—2 Tim. 4:2.
3. Botshelo jwa ga Hosea bo ne jwa tshwantshetsa boutlwelobotlhoko jwa ga Jehofa jang?
3 Tlhoma Mogopolo mo Kutlwelobotlhokong ya ga Jehofa: Jehofa o ne a laela Hosea gore a nyale “mosadi wa kgokafalo.” (Hos. 1:2) Tota le fa mosadi wa gagwe e bong Gomere a ile a mo tsholela ngwana wa mosimane, moragonyana go lebega a ile a tshola bana ba bangwe ba babedi ka monna o sele. Go iketleetsa ga ga Hosea go itshwarela mosadi wa gagwe go ne go tshwantshetsa boutlwelobotlhoko jo bogolo jwa ga Jehofa mo Baiseraeleng ba ba sa utlweng fa ba ne ba ikwatlhaya. (Hos. 3:1; Bar. 9:22-26) A re iketleeditse go beela kwa thoko dilo tse re di ratang e le gore re itsise batho ba mefuta yotlhe ka boutlwelobotlhoko jwa ga Jehofa?—1 Bakor. 9:19-23.
4. Dingwe tsa dilo tse re ka di itimang gore re direle Jehofa ke dife?
4 Batlhanka bangwe ba ga Jehofa ba ne ba tlogela ditiro tse di duelang madi a mantsi gore ba fetse nako e e oketsegileng mo bodireding. Ba bangwe ba tlhophile go nna ba sa nyala kgotsa go se nne le bana gore ba tsweletse dilo tse di direlwang Bogosi pele. Fa re akanya ka botshelo jwa ga Hosea, re ka nna ra ipolelela jaana, ‘Nna ke ne nka se dire se a se dirileng.’ Le fa go ntse jalo, fa re ntse re anaanela le go feta bopelonomi jo bo sa re tshwanelang jwa ga Jehofa e bile re ikaega ka moya wa gagwe o o boitshepo gore o re nonotshe, a ka re dirisa ka ditsela tse re neng re sa di akanya, fela jaaka a dirisitse Hosea.—Math. 19:26; Bafil. 2:13.