Go Tokafatsa Bokgoni Jwa Rona mo Bodireding—Go Bontsha Kafa Thuto ya Baebele e Tshwarwang ka Gone ka Buka ya Baebele e Ruta Eng?

Lebaka La go Bo go Le Botlhokwa: Batho ba bantsi ba ka tswa ba sa tlhaloganye se re se kayang fa re re re tshwarela batho dithuto tsa mahala tsa Baebele. Ba ka tswa ba akanya gore ba tshwanetse go ikopanya le setlhopha sengwe go ithuta kgotsa go tsenela dikhoso dingwe. Go na le go ba bolelela fela gore re tshwarela batho thuto ya Baebele, goreng o sa ba bontshe gore e tshwarwa jang? O ka dirisa metsotso e le mmalwa, tota le fa o eme mo kgorong, go bontsha motho gore thuto ya Baebele e tshwarwa jang le gore go motlhofo go ithuta.

Kafa O ka Go Dirang ka Gone:

Fa o sena go ikitsise, botsa mong wa ntlo gore a o tshwenyegile ka isagwe.
Mmolelele gore batho ba bantsi le bone ba tshwenyegile ka isagwe, o bo o mmontsha diteng tsa buka ya Baebele e Ruta Eng? Mo tlhalosetse gore buka eno e na le dithuto tse go leng motlhofo go di tlhaloganya tse di buang ka se Baebele e se rutang ka isagwe ya batho, o bo o mmotsa gore o kgatlhegela setlhogo sefe.
Mo neye buka lo bo lo ya kwa kgaolong e a e tlhophileng. Mo tlhalosetse gore dipotso tse di mo tshimologong ya kgaolo di tla arabiwa mo dirapeng tse di latelang.
Kopa mong wa ntlo gore a bale serapa sa ntlha fa a phuthologile go dira jalo. Go tswa foo, bala potso ya serapa seo lo bo lo batla karabo mmogo. Balang ditemana tse di umakilweng tse di tshegetsang karabo lo bo lo tlotle ka tsone. Mmontshe gore o thaletse karabo jang mo bukeng ya gago.
Sekasekang serapa se se latelang, mme mo lekgetlong leno kopa mong wa ntlo go araba potso ka mafoko a gagwe.
Mo akgole o bo o dire dithulaganyo tsa go boa lo tla go feleletsa thuto eo.
Fa go tshwanela, mmontshe bidio ya Thuto ya Baebele e Tshwarwa Jang? e e mo jw.org/tn.

Leka Seno mo Kgweding Eno:

Kopa Jehofa gore a segofatse maiteko a o tla a dirang go simolola thuto ya Baebele.—Bafil. 2:13.
Leka go bontsha mong wa ntlo gore thuto ya Baebele e tshwarwa jang o dirisa buka ya Baebele e Ruta Eng? kgotsa lwela go bontsha mongwe bidio ya Thuto ya Baebele e Tshwarwa Jang? bobotlana gangwe fa o le mo bodireding.