A o Ipaakanyetsa Segopotso?

E ne e le ka Nisane 13, 33 C.E. Jesu o ne a itse gore ke maitseboa a gagwe a bofelo a na le ditsala tsa gagwe tse dikgolo pele a bolawa. O ne a tla keteka Tlolaganyo ya bofelo le bone a bo a tlhoma moletlo o mosha e leng Sejo sa Morena sa Maitseboa. Tiragalo eo e e botlhokwa e ne e tlhoka go baakanyediwa. Ka jalo o ne a roma Petere le Johane gore ba baakanye dilo. (Luke 22:7-13) Fa e sa le ka nako eo, go botlhokwa gore Bakeresete ba baakanyetse Segopotso ngwaga le ngwaga. (Luke 22:19) Ke dilo dife tsa konokono tse re tshwanetseng go di dira go ipaakanyetsa Segopotso se se tla tshwarwang ka Moranang 3?

Se Bagolwane ba Tshwanetseng go se Dira:

Dirang dithulaganyo tsa go dirisa Holo ya Bogosi kgotsa lefelo le lengwe le le siameng. Le tshwanetse go nna le ditulo tse di lekaneng, dipone e bile le kgona go tsenya moya. Tlhomamisang gore lefelo leo le phepafadiwa sentle go sa le gale.
Tlhophang sebui se se tshwanelegang, modulasetulo le bakaulengwe ba ba tla rapelelang ditshwantshetso.
Fa e le gore go tla nna le diphuthego di le mmalwa tse di dirisang lefelo, rulaganyang dinako tsa dipokano le gore batho ba tla tsena le go tswa jang mo lefelong leo le mo go phakiwang dikoloi gone.
Tlhophang le go rulaganya batlhokomedi le ba ba tla tsamaisang ditshwantshetso.
Rulaganyang gore go nne le ditshwantshetso tse di tshwanetseng, dijana, digalase tsa beine, tafole e e siameng le letsela la tafole.

Se Baboledi Ba ka Se Dirang:

Dira dithulaganyo tsa gore o nne le seabe ka botlalo mo letsholong la go tsamaisa ditaletso tsa Segopotso.
Dira lenaane la batho ba o ithutang Baebele le bone, ba masika, ba o tsenang sekolo le bone, badirimmogo le ba o ba tlwaetseng o bo o ba laletse.
Bala o bo o tlhatlhanye ka mmalo wa Baebele wa Segopotso.
Tla Segopotsong o ipaakanyeditse go amogela baeng.